ಮುಂಬೈ: ಸಚಿವೆ ಪಂಕಜಾ ಮುಂಡೆ ವಿರುದ್ಧ 206 ಕೋಟಿ ರೂಪಾಯಿಗಳ ಚಿಕ್ಕಿ ಹಗರಣ ಆರೋಪ ಬಂದ ನಂತರ ಇದೀಗ ಕೃಷಿಭೂಮಿಯಲ್ಲಿ ಬೀಜಗಳನ್ನು ಬಿತ್ತಲು ಉಪಯೋಗಿಸುವ ಬ್ರಾಡ್ ಬೆಡ್ ಫರೋ(ಬಿಬಿಎಫ್) ಯಂತ್ರಗಳ ಖರೀದಿಯಲ್ಲಿ ಭಾರೀ ಹಗರಣ ನಡೆದಿರುವ ಮತ್ತೊಂದು ಆರೋಪ ಮಹಾರಾಷ್ಟ್ರ ಸರ್ಕಾರದ ವಿರುದ್ಧ ಕೇಳಿಬರುತ್ತಿದೆ ಎಂದು ದಿ ನ್ಯೂ ಇಂಡಿಯನ್ ಎಕ್ಸ್ ಪ್ರೆಸ್ ಪತ್ರಿಕೆ ವರದಿ ಮಾಡಿದೆ.
ರಾಜ್ಯದಲ್ಲಿ ಇದುವರೆಗೆ 125ರಿಂದ 150 ಕೋಟಿ ರೂಪಾಯಿಗಳವರೆಗೆ ಬೆಲೆಬಾಳುವ ಯಂತ್ರಗಳನ್ನು ರೈತರಿಗೆ ವಿತರಿಸಲಾಗಿದೆ ಎಂದು ಅಧಿಕಾರಿಗಳು ಅಂದಾಜಿಸುತ್ತಾರೆ. ಆದರೆ ಎಷ್ಟು ಯಂತ್ರಗಳನ್ನು ರೈತರಿಗೆ ಇದುವರೆಗೆ ವಿತರಿಸಲಾಗಿದೆ ಎಂಬುದಕ್ಕೆ ಅಂಕಿಅಂಶಗಳಿಲ್ಲ ಎಂದು ಹೇಳಲಾಗುತ್ತಿದೆ.
ಕೇಂದ್ರ ಸರ್ಕಾರದ ಕೃಷಿ ಯಂತ್ರೀಕರಣ ಯೋಜನೆಯಡಿ ಮಳೆ-ಆಧಾರಿತ ಪ್ರದೇಶಗಳಲ್ಲಿ ರೈತರಿಗೆ ಬೀಜ ಬಿತ್ತುವ ಯಂತ್ರಗಳನ್ನು ನೀಡಲು ಮಹಾರಾಷ್ಟ್ರ ಸರ್ಕಾರ ಮುಂದಾಗಿತ್ತು. ಈ ಯಂತ್ರ ಕೃಷಿಗೆ ಬಹಳ ಉಪಯುಕ್ತವಾದುದು ಎಂದು ರಾಜ್ಯ ಕೃಷಿ ಇಲಾಖೆ ಬೃಹತ್ ಪ್ರಮಾಣದಲ್ಲಿ ಮುಖ್ಯವಾಗಿ ಅಲ್ಲಿನ ಮರಾಠವಾಡ ಮತ್ತು ವಿದರ್ಭ ಜಿಲ್ಲೆಗಳಲ್ಲಿ ಜಾಹೀರಾತುಗಳನ್ನು ಪ್ರಕಟಿಸಿ ಯಂತ್ರಗಳನ್ನು ವಿತರಿಸಿತ್ತು. ಇಲ್ಲಿ ಕೃಷಿ ಸಂಬಂಧಿತ ಸಮಸ್ಯೆಗಳಿಂದ ಕಳೆದ ಜನವರಿಯಿಂದ ಇಲ್ಲಿಯವರೆಗೆ ಒಂದೂವರೆ ಸಾವಿರ ರೈತರು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ.
ಆದರೆ ಈ ಯಂತ್ರ ಖರೀದಿಯಲ್ಲಿ ಭಾರೀ ಅಕ್ರಮ ನಡೆದಿದೆ ಎಂಬ ಆರೋಪ ಕೇಳಿಬರುತ್ತಿದೆ. ಇಂಡಿಯನ್ ಎಕ್ಸ್ ಪ್ರೆಸ್ ಪತ್ರಿಕೆಗೆ ಸಿಕ್ಕಿರುವ ಮಾಹಿತಿ ಪ್ರಕಾರ, ಕೃಷಿ ಇಲಾಖೆ ಅತ್ಯಂತ ಕಡಿಮೆ ಬಿಡ್ಡಿಂಗ್ ನ್ನು ಬಿಟ್ಟು ದುಬಾರಿ ಬೆಲೆ ನೀಡಿ ಯಂತ್ರಗಳನ್ನು ಖರೀದಿಸಿದೆ. ಸಾಗರ್ ಇಂಟರ್ ನ್ಯಾಶನಲ್ ಕಂಪೆನಿ ಪ್ರತಿ ಯಂತ್ರಕ್ಕೆ 21 ಸಾವಿರದ 120 ರೂಪಾಯಿಗಳಂತೆ ನೀಡಲು ಬಿಡ್ಡಿಂಗ್ ಗೆ ಒಪ್ಪಿದ್ದರೂ ಅದಕ್ಕಿಂತ ದುಬಾರಿ ಬೆಲೆಗೆ ಇತರ ಐದು ಕಂಪೆನಿಗಳಿಂದ ಯಂತ್ರಗಳನ್ನು ಖರೀದಿಸಲಾಗಿದೆ ಎಂಬ ಆರೋಪ ಕೇಳಿಬರುತ್ತಿದೆ.
ನಿಯಮದ ಪ್ರಕಾರ, ಜಿಲ್ಲಾ ಮಟ್ಟದಲ್ಲಿ ಕೃಷಿ ಅಧಿಕಾರಿಗಳು, ಕೃಷಿ ಯಂತ್ರಗಳು ಬೇಕೆಂದು ರಾಜ್ಯ ಕೃಷಿ ಮತ್ತು ಕೈಗಾರಿಕೋದ್ಯಮ ಅಭಿವೃದ್ಧಿ ಇಲಾಖೆಗೆ(ಎಂಎಐಡಿಸಿ) ಅರ್ಜಿ ಸಲ್ಲಿಸಬೇಕು. ಅದು ಯಂತ್ರಗಳ ಪೂರೈಕೆದಾರರನ್ನು ನಿರ್ಧರಿಸುತ್ತದೆ. ಯಂತ್ರಗಳನ್ನು ರೈತರಿಗೆ ಕೊಡುವ ಮೊದಲು ಪಂಜಾಬ್ ರಾವ್ ಕೃಷಿ ವಿಶ್ವವಿದ್ಯಾಲಯದಿಂದ ಗುಣಮಟ್ಟ ಪರಿಶೀಲಿಸಬೇಕು. ಆದರೆ ಇಲ್ಲಿ ರೈತರಿಗೆ ಯಂತ್ರಗಳನ್ನು ನೀಡುವ ಮುಂಚೆ ಹೈದರಾಬಾದ್ ಮೂಲದ ಒಣಭೂಮಿ ಬೇಸಾಯಕ್ಕೆ ಕೇಂದ್ರ ಸಂಶೋಧನಾ ಸಂಸ್ಥೆಯಿಂದ ಒಪ್ಪಿಗೆ ಪಡೆದಿದೆ.ಅದಕ್ಕೂಮುನ್ನ ಪಂಜಾಬ್ ರಾವ್ ಕೃಷಿ ವಿಶ್ವವಿದ್ಯಾಲಯ ಅದರ ವಿನ್ಯಾಸ ನೋಡಿ ಬದಲಾವಣೆ ಮಾಡುವಂತೆ ಸಲಹೆ ನೀಡಿತ್ತು. ಆದರೆ ಅದನ್ನು ಕಡೆಗಣಿಸಲಾಗಿದೆ ಎಂದು ಕೃಷಿ ಇಲಾಖೆಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
ಯಂತ್ರದ ಗುಣಮಟ್ಟ ಉತ್ತಮವಾಗಿಲ್ಲ ಎನ್ನುತ್ತಾರೆ ಯಂತ್ರ ಖರೀದಿಸಿದ ಬಿಜೆಪಿ ಹಿರಿಯ ಶಾಸಕ ಸುನಿಲ್ ದೇಶ್ ಮುಖ್. ಯಂತ್ರದ ಕೈಪಿಡಿಯನ್ನು ರೈತರಿಗೆ ಕೊಟ್ಟಿಲ್ಲ. ಅದನ್ನು ಜೋಡಿಸಲು ನನಗೆ 4 ಗಂಟೆ ಹಿಡಿಯಿತು. ಬೀಜ ಉಳುಮೆ ಮಾಡಲು, ಬೆಳೆ ಬೆಳೆಯಲು ಈ ಯಂತ್ರ ಸಹಕಾರಿಯಾಗುವುದಿಲ್ಲ ಎನ್ನುತ್ತಾರೆ ಅವರು.
ಯಂತ್ರವನ್ನು ವಿತರಿಸಿದ ಕಂಪೆನಿ ಕಡೆಯವರು ಹೊಂದಾಣಿಕೆ ಮಾಡಿಕೊಳ್ಳುವಂತೆ ತಮ್ಮನ್ನು ಕೋರಿದ್ದರು, ಅದಕ್ಕೆ ನಾವು ಒಪ್ಪಲಿಲ್ಲ ಎಂದು ಸುನಿಲ್ ದೇಶ್ ಮುಖ್ ಅವರ ಮತ್ತೊಬ್ಬ ನಿಕಟವರ್ತಿ ಶಾಸಕ ಹೇಳುತ್ತಾರೆ. ತಾವು ಈ ಅಕ್ರಮದ ವಿರುದ್ಧ ಕಾನೂನು ಹೋರಾಟ ನಡೆಸುವುದಾಗಿ ಅವರು ತಿಳಿಸಿದರು. ಒಂದು ಯಂತ್ರದಿಂದ ಒಬ್ಬ ರೈತರಿಗೆ 13 ಸಾವಿರದ 500 ರೂಪಾಯಿಗಳಷ್ಟು ಮತ್ತು ರಾಜ್ಯಸರ್ಕಾರದ ಬೊಕ್ಕಸಕ್ಕೆ 34 ಸಾವಿರ ರೂಪಾಯಿಗಳಷ್ಟು ನಷ್ಟವಾಗುವ ಸಾಧ್ಯತೆಯಿದೆ. ರಾಜ್ಯದ ಅನೇಕ ಭಾಗಗಳಲ್ಲಿನ ರೈತರು ಈಗಾಗಲೇ ಸಾಲದ ಬಾಧೆಯಿಂದ ಬಳಲುತ್ತಿದ್ದು, ಅವರ ಮೇಲೆ ಇನ್ನಷ್ಟು ಸಾಲದ ಹೊರೆ ಬೀಳುತ್ತದೆ. ಯಂತ್ರಗಳನ್ನು ವಿತರಿಸಿದ ನಂತರ ರೈತರ ಅಭಿಪ್ರಾಯಗಳನ್ನು ಸಹ ಕೃಷಿ ಇಲಾಖೆ ಪಡೆದುಕೊಂಡಿಲ್ಲ ಎಂದು ಆರೋಪಿಸಿದರು.
ಮಹಾರಾಷ್ಟ್ರ ರಾಜ್ಯದಲ್ಲಿ ಮಾತ್ರ ಈ ಯಂತ್ರವನ್ನು ಖರೀದಿಸುವುದನ್ನು ರೈತರಿಗೆ ಕಡ್ಡಾಯ ಮಾಡಲಾಗಿದೆ. ಯಂತ್ರದ ವಿತರಕರು ಇದನ್ನು ಗುಜರಾತ್ ನಿಂದ ತರಿಸಿಕೊಂಡಿದ್ದಾರೆ. ಯಂತ್ರಗಳನ್ನು ರೈತರ ಉಪಯೋಗಕ್ಕೆ ತಕ್ಕಂತೆ ವಿನ್ಯಾಸಗೊಳಿಸದಿರುವುದು ನಿಯಮದ ಗಂಭೀರ ಉಲ್ಲಂಘನೆಯಾಗಿದೆ ಎಂದು ಮಾಜಿ ಆಡಳಿತಗಾರರೊಬ್ಬರು ಹೇಳುತ್ತಾರೆ.
