ಮ್ಯಾಗಿ ನಿಷೇಧ ಹಿಂಪಡೆಯುವ ನಿರ್ಧಾರ ಕೇಂದ್ರಕ್ಕೆ ಬಿಟ್ಟಿದ್ದು: ಗೋವಾ ಸಿಎಂ

ಪಣಜಿ: ನೆಸ್ಲೆ ಕಂಪನಿಯ ಮ್ಯಾಗಿ ನ್ಯೂಡಲ್ಸ್ ಮಾರಾಟಕ್ಕೆ ಹೇರಲಾಗಿರುವ ನಿಷೇಧವನ್ನು ಹಿಂಪಡೆಯುವುದು ಕೇಂದ್ರ ಸರ್ಕಾರಕ್ಕೆ ಬಿಟ್ಟಿದ್ದು ಎಂದು ಗೋವಾ ಮುಖ್ಯಮಂತ್ರಿ ಲಕ್ಷ್ಮೀಕಾಂತ್ ಪರ್ಸೇಕರ್ ಗುರುವಾರ ಹೇಳಿದ್ದಾರೆ. 

ಮ್ಯಾಗಿ ಉತ್ಪನ್ನಗಳ ಮೇಲೆ ಹೇರಲಾಗಿರುವ ನಿಷೇಧವನ್ನು ಕೇಂದ್ರ ಸರ್ಕಾರ ಹಿಂಪಡೆದರೆ ಮಾತ್ರ ಮಾರಾಟಕ್ಕೆ ಅವಕಾಶ ಮಾಡಿಕೊಡಲಾಗುವುದು. ಮ್ಯಾಗಿ ಮಾರಾಟ ಆರಂಭದಲ್ಲಿ ರಾಜ್ಯ ಸರ್ಕಾರದ ಯಾವುದೇ ಪಾತ್ರವಿಲ್ಲ. ಮ್ಯಾಗಿಯನ್ನು ಕೇಂದ್ರ ಸರ್ಕಾರ ನಿಷೇಧಗೊಳಿಸಿರುವುದು. ಹಾಗಾಗಿ, ಮ್ಯಾಗಿ ನಿಷೇಧ ಹಿಂಪಡೆಯುವುದು ಕೇಂದ್ರ ಸರ್ಕಾರಕ್ಕೆ ಬಿಟ್ಟಿದ್ದು ಎಂದು ಪರ್ಸೇಕರ್ ಸ್ಪಷ್ಟ ಪಡಿಸಿದ್ದಾರೆ.

ಅ.26ರಿಂದ ಕರ್ನಾಟಕ, ಗೋವಾ, ಪಂಜಾಬ್ ನಲ್ಲಿ ನೆಸ್ಲೆ ಕಂಪೆನಿ ಮ್ಯಾಗಿ ಉತ್ಪಾದನೆ ಆರಂಭಿಸಿದೆ. ಹೊಸ ಉತ್ಪನ್ನದಲ್ಲಿ ಸೀಸದ ಪ್ರಮಾಣ ಕಡಿಮೆ ಇದ್ದು, ಸೇವನೆಗೆ ಸುರಕ್ಷಿತವಾಗಿದೆ ಎಂದು ಸರಕಾರದ ಮಾನ್ಯತೆ ಪಡೆದಿರುವ ಮೂರು ಪ್ರಯೋಗಾಲಯಗಳು ಸ್ಪಷ್ಟಪಡಿಸಿವೆ. ಹೀಗಾಗಿ ಮ್ಯಾಗಿ ನೂಡಲ್ಸ್‌ ಮಸಾಲಾವನ್ನು ಮಾಸಾಂತ್ಯದೊಳಗೆ ಮಾರುಕಟ್ಟೆಗೆ ಬಿಡುಗಡೆ ಮಾಡಲಾಗುವುದು ಎಂದು ನೆಸ್ಲೆ ಕಂಪೆನಿ ಹೇಳಿತ್ತು.