ನವದೆಹಲಿ: ಅಕ್ರಮ ಆಸ್ತಿ ಪ್ರಕರಣಕ್ಕೆ ಸಂಬಂಧಿಸಿ ಹಿಮಾಚಲ ಪ್ರದೇಶ ಸಿಎಂ ವೀರಭದ್ರ ಸಿಂಗ್ ಸಲ್ಲಿಸಿದ್ದ ಅರ್ಜಿಯ ವಿಚಾರಣೆಯನ್ನು ಸುಪ್ರೀಂ ಕೋರ್ಟ್ ಗುರುವಾರ ಹಿಮಾಚಲಪ್ರದೇಶ ಹೈಕೋರ್ಟ್‍ನಿಂದ ದೆಹಲಿ ಹೈಕೋರ್ಟ್‍ಗೆ ವರ್ಗಾಯಿಸಿದೆ.
ನ್ಯಾಯದ ಹಿತಾಸಕ್ತಿಯಿಂದ ಹಾಗೂ ನ್ಯಾಯಾಂಗವು ಮುಜುಗರಕ್ಕೀಡಾಗುವು ದನ್ನು ತಪ್ಪಿಸುವ ಉದ್ದೇಶದಿಂದ ಈ ನಿರ್ಧಾರ ಕೈಗೊಂಡಿರುವುದಾಗಿ ಸುಪ್ರೀಂ ಕೋರ್ಟ್ ಸ್ಪಷ್ಟಪಡಿಸಿದೆ.
ಹೈಕೋರ್ಟ್ ಜಡ್ಜ್ ಮತ್ತು ಸಿಬಿಐ ಪರ ವಕೀಲರ ವಿರುದ್ಧದ ಆರೋಪಗಳಿಗೆ ಸಂಬಂಧಿಸಿ ವಾದ- ಪ್ರತಿವಾದಗಳನ್ನು ತೆಗೆದುಹಾಕುವಂತೆಯೂ ಸುಪ್ರೀಂ ಆದೇಶಿಸಿದೆ. ವೀರಭದ್ರಸಿಂಗ್ ಪರ ವಾದ ಮಂಡಿಸಿದ ನ್ಯಾಯವಾದಿ ಕಪಿಲ್ ಸಿಬಲ್, ಈ ವರ್ಗಾವಣೆಯನ್ನು ವಿರೋಧಿಸಿದರು.
