ಚೆನ್ನೈ: ಎಂಜಿಆರ್ ಸ್ಮಾರಕದಲ್ಲೇ ಜಯಲಲಿತಾ ಸಮಾಧಿಗೆ ನಿರ್ಧಾರ

ಚೆನ್ನೈ: ಮರೀನಾ ಬೀಚ್ ಸಮೀಪ ಇರುವ ಮಾಜಿ ಸಿಎಂ ಎಂಜಿಆರ್ ಸಮಾಧಿ ಸಮೀಪವೇ ಜಯಲಲಿತಾ ಅಂತ್ಯಕ್ರಿಯೆಗೆ ಸಿದ್ಧತೆ ನಡೆದಿದ್ದು, ಜಯಲಲಿತಾ ಪಾರ್ಥಿವ ಶರೀರವನ್ನು ಮರೀನಾ ಬೀಚ್ ಗೆ ಮೆರವಣಿಗೆ ಮೂಲಕ ಕೊಂಡೊಯ್ಯಲಾಗುತ್ತಿದೆ. 

ಜಯಲಲಿತಾ ಅವರ ಅಂತ್ಯಕ್ರಿಯೆ ವಿಧಾನದ ಬಗ್ಗೆ ಇದ್ದ ಗೊಂದಲಗಳಿಗೆ ತೆರೆ ಬಿದ್ದಿದ್ದು, ಬೀಚ್ ಬಳಿ ಇರುವ ಮಾಜಿ ಸಿಎಂ ಎಂಜಿ ರಾಮಚಂದ್ರನ್ (ಎಂಜಿಆರ್) ಸಮಾಧಿ ಸಮೀಪವೇ ಜಯಲಲಿತಾ ಅವರ ಪಾರ್ಥಿವ ಶರೀರವನ್ನೂ ಸಮಾಧಿ ಮಾಡಲು ನಿರ್ಧರಿಸಲಾಗಿದೆ.

ಜಯಲಲಿತಾ ನಿಧನದ ನಂತರ ಅವರಿಗೆ ದಹನ ಕ್ರಿಯೆಯ ಮೂಲಕ ಅಂತ್ಯ ಸಂಸ್ಕಾರ ಮಾಡಲಾಗುತ್ತದೋ ಅಥವಾ ಸಮಾಧಿ ಮಾಡುವ ವಿಧಾನದ ಮೂಲಕ ಅಂತ್ಯಕ್ರಿಯೆ ನಡೆಸಲಾಗುತ್ತದೋ ಎಂಬ ಬಗ್ಗೆ ಸಾಕಷ್ಟು ಗೊಂದಲಗಳಿದ್ದವು. ಆದರೆ ಈಗಾಗಲೇ ಎಂಜಿಆರ್ ಸಮಾಧಿ ಸಮೀಪ ಸಮಾಧಿ ನಿರ್ಮಿಸಲಾಗಿದ್ದು ಕೆಲವೇ ಕ್ಷಣಗಳಲ್ಲಿ ಜಯಲಲಿತಾ ಅವರ ಪಾರ್ಥಿವ ಶರೀರ ಮರೀನಾ ಬೀಚ್ ಗೆ ಆಗಮಿಸಲಿದೆ.