ಪೇಯ್ಡ್ ನ್ಯೂಸ್ ಪ್ರಕಟಿಸಿದರೆ 90 ದಿನ ಪತ್ರಿಕೆ ಅಮಾನತು?

ನವದೆಹಲಿ: ಚುನಾವಣೆ ಸಂದರ್ಭದಲ್ಲಿ ಪಾವತಿ ಸುದ್ದಿ (ಪೇಯ್ಡ್ ನ್ಯೂಸ್)ಯನ್ನು ಪ್ರಕಟಿಸುವುದು ಚುನಾವಣಾ ಅಪರಾಧ ಎಂದು ಪರಿಗಣಿಸಲು ಕೇಂದ್ರ ಸರ್ಕಾರ ಚಿಂತನೆ ನಡೆಸಿದೆ ಎಂದು ತಿಳಿದು ಬಂದಿದೆ. 

ಚುನಾವಣಾ ಅಪರಾಧಗಳ ಪಟ್ಟಿಯಲ್ಲಿ ಪೇಯ್ಡ್ ನ್ಯೂಸ್ ನ್ನು ಸೇರಿಸಲಿದ್ದು, ಪೇಯ್ಡ್ ನ್ಯೂಸ್ ಪ್ರಕಟಿಸುವ ಪತ್ರಿಕೆಗಳನ್ನು 45ರಿಂದ 90 ದಿನಗಳವರೆಗೆ ಅಮಾನತಿನಲ್ಲಿಡುವ ಬಗ್ಗೆಯೂ ಕೇಂದ್ರ ಸರ್ಕಾರ ಚಿಂತನೆ ನಡೆಸಿದೆ ಎಂದು ಮೂಲಗಳು ತಿಳಿಸಿವೆ. 

ಪೇಯ್ಡ್ ಸುದ್ದಿಯನ್ನು ಚುನಾವಣಾ ಅಪರಾಧವನ್ನಾಗಿ ಪರಿಗಣಿಸುವ ಕುರಿತಂತೆ 1951ರ ಪ್ರಜಾಪ್ರತಿನಿಧಿ ಕಾಯ್ದೆಗೆ ತಿದ್ದುಪಡಿ ತರುವ ಪ್ರಸ್ತಾವನೆ ತನ್ನ ಪರೀಶೀಲನೆಯಲ್ಲಿದೆ ಎಂದು ಕೇಂದ್ರ ಸರ್ಕಾರ ಸುಪ್ರೀಂಕೋರ್ಟ್ ಗೆ ಪ್ರಮಾಣ ಪತ್ರ ಸಲ್ಲಿಸಿದೆ.

ಅದಲ್ಲದೇ, ಭಾರತೀಯ ಪತ್ರಿಕಾ ಮಂಡಳಿ(ಪಿಸಿಐ)ಗೆ ಶಕ್ತಿ ತುಂಬುವ ಸಲುವಾಗಿ 1978ರ ಪತ್ರಿಕಾ ಮಂಡಳಿ ಕಾಯ್ದೆಗೆ ತಿದ್ದುಪಡಿ ತಂದು ಸ್ವಾಯತ್ತ, ಶಾಸನಬದ್ಧ ಅಧಿಕಾರ ನೀಡಲು ಸರ್ಕಾರ ಚಿಂತನೆ ನಡೆಸಿದೆ. ತಪ್ಪು ಮಾಡುವ ಪತ್ರಿಕೆಗಳು ಹಾಗೂ ಪತ್ರಕರ್ತರನ್ನು ದಂಡಿಸುವ ಸಲುವಾಗಿ ಈ ಕಾಯ್ದೆ ತಿದ್ದುಪಡಿ ತರಲು ಚಿಂತನೆ ನಡೆಸಲಾಗಿದೆ ಎಂದು ತಿಳಿದು ಬಂದಿದೆ.