ರಾಜಸ್ಥಾನ ರಾಯಲ್ ಹೋರಾಟ ಅಂತ್ಯ, ರಾಜಮಹಲ್ ಅರಮನೆ ಗೇಟ್ ತೆರೆಯಲು ಆದೇಶ

ಜೈಪುರ: ಜೈಪುರ ಅಭಿವೃದ್ಧಿ ಪ್ರಾಧಿಕಾರ(ಜೆಡಿಎ) ರಾಜಮಹಲ್ ಅರಮನೆಯ ಮುಖ್ಯ ದ್ವಾರವನ್ನು ಭಾನುವಾರ ಪುನಾ ತೆರೆದಿದ್ದು, ಈ ಮೂಲಕ ಕಳೆದ ಒಂದು ವಾರದಿಂದ ನಡೆಯುತ್ತಿದ್ದ ರಾಜಮನೆತನದ ಹೋರಾಟಕ್ಕೆ ತೆರೆ ಬಿದ್ದಿದೆ.

ನಿನ್ನೆ ರಾತ್ರಿ ರಾಜಮಾತೆ ಪದ್ಮಿನಿ ದೇವಿ ಅವರು ರಾಜಸ್ಥಾನ ಮುಖ್ಯಮಂತ್ರಿ ವಸುಂಧರಾ ರಾಜೆ ಅವರನ್ನು ಭೇಟಿ ಮಾಡಿದ ಚರ್ಚಿಸದ್ದರು. ನಂತರ ವಸುಂಧರಾ ರಾಜೆ ಅವರು ಅರಮನೆ ಮುಖ್ಯ ದ್ವಾರಕ್ಕೆ ಸಂಬಂಧಿಸಿದಂತೆ ಸಚಿವರ ಸಮಿತಿಯೊಂದರನ್ನು ರಚಿಸಿದ್ದರು. 

ಸಚಿವರ ಸಮಿತಿ ರಾಜಮಹಲ್ ಗೇಟ್ ಅನ್ನು ಪುನಾ ಆರಂಭಿಸಲು ಶಿಫಾರಸು ಮಾಡಿದ ಹಿನ್ನೆಲೆಯಲ್ಲಿ ಜೆಡಿಎ ಇಂದು ಗೇಟ್ ತೆರೆದಿದೆ.

ಕಳೆದ ಗುರುವಾರ ರಾಜಮಾತೆ ಪದ್ಮಿನಿ ದೇವಿ ಅವರು ಸಾವಿರಾರು ಬೆಂಬಲಿಗರೊಂದಿಗೆ ಬೀದಿಗಿಳಿದು ಹೋರಾಟ ನಡೆಸಿದ್ದರು. ಈ ವೇಳೆ ಮಾತನಾಡಿದ್ದ ಪದ್ಮಿನಿ ದೇವಿ ಅವರು, ಜೆಡಿಎ ಅಧಿಕಾರಿಗಳು ಅರಮನೆಯ ಮುಖ್ಯ ದ್ವಾರವನ್ನು ಬಂದ್ ಮಾಡುವ ರಾಜಮನೆತನಕ್ಕೆ ಅಗೌರವ ತೋರಿದ್ದಾರೆ ಎಂದು ಆರೋಪಿಸಿದ್ದರು. ಮುಖ್ಯ ದ್ವಾರ ತನ್ನ ಜಾಗದಲ್ಲಿದೆ ಎಂದು ಕಳೆದ ವಾರ ಜೆಡಿಎ ಅದನ್ನು ಬಂದ್ ಮಾಡಿತ್ತು.