ಬಿಜೆಪಿ ಕೆಲಸದಲ್ಲಿ ಝಿರೋ ಆದರೆ ಚುನಾವಣೆಯಲ್ಲಿ ಹಿರೋ: ಶಿವಸೇನೆ

ಮುಂಬೈ: ಮಿತ್ರ ಪಕ್ಷ ಬಿಜೆಪಿ ವಿರುದ್ಧ ಸೋಮವಾರ ಮತ್ತೆ ವಾಗ್ದಾಳಿ ನಡೆಸಿರುವ ಶಿವಸೇನೆ, ಬಿಜೆಪಿ ಯಾವುದೇ ಕೆಲಸ ಮಾಡದಿದ್ದರೂ ಚುನಾವಣೆಯಲ್ಲಿ ಮಾತ್ರ ಹಿರೋ ಆಗುತ್ತಿದೆ ಎಂದು ಆರೋಪಿಸಿದೆ.

ಇತ್ತೀಚಿಗೆ ನಡೆದ ಮಹಾರಾಷ್ಟ್ರ ಸ್ಥಳೀಯ ಸಂಸ್ಥೆಗಳ ಚುನಾವಣೆಯಲ್ಲಿನ ಸೋಲಿಗೆ ಇವಿಎಂಗಳನ್ನು ದೂರದ ಶಿವಸೇನೆ, ಒಂದು ಕಾಲದಲ್ಲಿ ಕಾಂಗ್ರೆಸ್ ಏನೂ ಅಭಿವೃದ್ಧಿ ಕೆಲಸಗಳನ್ನು ಮಾಡದಿದ್ದರೂ ಚುನಾವಣೆಯಲ್ಲಿ ಗೆಲ್ಲುವ ಮೂಲಕ ಹಿರೋ ಆಗುತ್ತಿತ್ತು. ಈಗ ಆ ಟೈಮ್ ಬಿಜೆಪಿಗೆ ಬಂದಿದ್ದು, ಕೆಲಸದಲ್ಲಿ ಝಿರೋ ಆಗಿದ್ದರೂ ಚುನಾವಣೆಯಲ್ಲಿ ಹಿರೋ ಆಗಿದೆ ಎಂದು ತನ್ನ ಮುಖವಾಣಿ ಸಾಮ್ನಾದಲ್ಲಿ ದೂರಿದೆ.

ಏಪ್ರಿಲ್ 19ರಂದು ನಡೆದ ಮೂರು ಮಹಾನಗರ ಪಾಲಿಕೆಗಳ ಚುನಾವಣೆಯ ಫಲಿತಾಂಶ ಕಳೆದ ಶುಕ್ರವಾರ ಹೊರಬಿದ್ದಿದ್ದು, ಲಾತೂರ್ ಮತ್ತು ಚಂದ್ರಪುರ ಪಾಲಿಕೆ ಬಿಜೆಪಿ ಪಾಲಾದರೆ, ಪರ್ಭನಿ ಮಹಾನಗರ ಪಾಲಿಕೆಯಲ್ಲಿ ಕಾಂಗ್ರೆಸ್ ಏಕೈಕ ಅತಿ ದೊಡ್ಡ ಪಕ್ಷವಾಗಿ ಹೊರಹೊಮ್ಮಿದೆ.

ಲಾತೂರ್ ಮಹಾನಗರ ಪಾಲಿಕೆಯಲ್ಲಿ ಆರು ಸ್ಥಾನಗಳನ್ನು ಹೊಂದಿದ್ದು ಶಿವಸೇನೆ ಈ ಬಾರಿ ಖಾತೆ ತೆರೆಯುವಲ್ಲೂ ವಿಫಲವಾಗಿದೆ.