ಪಾನಿಯಲ್ಲಿ ಶೌಚಾಲಯ ಕ್ಲೀನರ್ ಮಿಶ್ರಣ: ಪಾನಿಪುರಿ ಮಾರಾಟಗಾರನಿಗೆ 6 ತಿಂಗಳ ಜೈಲು ಶಿಕ್ಷೆ

ಅಹಮದಾಬಾದ್: ಪಾನಿಪೂರಿಯಲ್ಲಿ ಶೌಚಾಲಯ ಕ್ಲೀನರ್ ಮಿಶ್ರಣ ಮಾಡಿ ಪಾನಿಪೂರಿ ಮಾರಾಟ ಮಾಡುತ್ತಿದ್ದವನಿಗೆ ವಿಶೇಷ ಕೋರ್ಟ್ 6 ತಿಂಗಳ ಕಾಲ ಜೈಲು ಶಿಕ್ಷೆ ವಿಧಿಸಿದೆ. 

ಗುಜರಾತ್ ನ ಅಹಮದಾಬಾದ್ ಲಾಲ್ ದರ್ವಾಜಾ ಪ್ರದೇಶದಲ್ಲಿ ಪಾನಿಪೂರಿ ಮಾರಾಟ ಮಾಡುತ್ತಿದ್ದ ಜೇತನ್ ನಂಜೀ ಮಾರ್ವಾಡಿ ಎಂಬಾತನಿಗೆ ಆರು ತಿಂಗಳ ಜೈಲು ಶಿಕ್ಷೆ ವಿಧಿಸಿ ಆದೇಶ ನೀಡಿದೆ. 2009ರಲ್ಲಿ ಅಹಮದಾಬಾದ್ ಮುನಿಸಿಪಲ್ ಕಾರ್ಪೋರೇಷನ್(ಎಎಂಸಿ) ಚೇತನ್ ವಿರುದ್ಧ ಪ್ರಕರಣ ದಾಖಲಿಸಿತ್ತು. 

ಲಾಲ್ ದರ್ವಾಜಾ ಪ್ರದೇಶದ ನಿವಾಸಿಗಳು ಮಾರ್ವಾಡಿ ವಿರುದ್ಧ ದೂರು ನೀಡಿದ್ದರು. ಆತ ಪಾನಿಪೂರಿ ನೀರಿಗೆ ಶೌಚಾಲಯ ಕ್ಲೀನರ್ ಮಿಶ್ರಣ ಮಾಡುತ್ತಿರುವುದಾಗಿ ದೂರು ನೀಡಿದ್ದರು. ಈ ದೂರಿನ ಅನ್ವಯ ಮಾರ್ವಾಡಿ ವಿರುದ್ಧ ದೂರು ದಾಖಲಿಸಿದ್ದ ಎಎಂಸಿ ಪಾನಿಪೂರಿ ನೀರಿನ ಮಾದರಿಗಳನ್ನು ಆಹಾರ ಪರೀಕ್ಷೆ ಪ್ರಯೋಗಾಲಯಕ್ಕೆ ಕಳುಹಿಸಿತ್ತು. ಪರೀಕ್ಷೆಯಿಂದ ಆಘಾತಕಾರಿ ವಿಷಯವೊಂದು ತಿಳಿದುಬಂದಿದ್ದು, ಮಾರ್ವಾಡಿ ಪಾನಿಪೂರಿ ನೀರಿನ ಜತೆ ಆಕ್ಸಾಲಿಕ್ ಆಸೀಡ್ ಮಿಶ್ರಣ ಮಾಡಿರುವುದು ಬೆಳಕಿಗೆ ಬಂದಿತ್ತು. 

ಏಳು ವರ್ಷಗಳ ವಿಚಾರಣೆ ಬಳಿಕ ವಿಶೇಷ ಕೋರ್ಟ್ ಮಾರ್ವಾಡಿಗೆ ಆರು ತಿಂಗಳ ಜೈಲು ಶಿಕ್ಷೆ ವಿಧಿಸಿದೆ.