ನವದೆಹಲಿ: ಆರ್ಥಿಕ ಅಭಿವೃದ್ಧಿ ಕುಂಠಿತವಾಗಲಿದೆ ಎಂಬ ತಮ್ಮ ಊಹೆ ನಿಜವಾಗಿದ್ದು, ನೋಟು ಹಿಂಪಡೆತ ನಿರ್ಧಾರ ಅದನ್ನು ಇನ್ನಷ್ಟು ಬಿಗಡಾಯಿಸಿದೆ ಎಂದು ಹಿರಿಯ ಕಾಂಗ್ರೆಸ್ ಮುಖಂಡ ಪಿ ಚಿದಂಬರಂ ಹೇಳಿದ್ದಾರೆ.
"ನೋಟು ಹಿಂಪಡೆತ ನಿರ್ಧಾರ ಅಭಿವೃದ್ಧಿಯನ್ನು ೧ ರಿಂದ ೧.೫% ಕುಂಠಿತಗೊಳಿಸಲಿದೆ ಎಂದಿದ್ದೆ. ಈಗ ಹಾಗೆಯೇ ಆಗಿದೆ. ಜಿವಿಎ ೧.೩% ಕುಂಠಿತವಾಗಿದೆ" ಎಂದು ಮಾಜಿ ಕೇಂದ್ರ ವಿತ್ತ ಸಚಿವ ಚಿದಂಬರಂ ತಮ್ಮ ಅಧಿಕೃತ ಟ್ವಿಟ್ಟರ್ ಖಾತೆಯಲ್ಲಿ ಬರೆದಿದ್ದಾರೆ.
"ಜುಲೈ ೨೦೧೬ ರಲ್ಲಿಯೇ ಆರ್ಥಿಕ ಅಭಿವೃದ್ಧಿ ನಿಧಾನವಾಗುತ್ತಿತ್ತು ಮತ್ತು ಡಿಮಾನೆಟೈಸೇಶನ್ ಅದನ್ನು ಮತ್ತಷ್ಟು ಬಿಗಡಾಯಿಸಿತು" ಎಂದು ಕೂಡ ಅವರು ಹೇಳಿದ್ದಾರೆ.
ಈ ವರ್ಷ ಮಾರ್ಚ್ ಗೆ ಅಂತ್ಯವಾಗುವ ತ್ರೈಮಾಸಿಕದಲ್ಲಿ ಜಿಡಿಪಿ ತೀವ್ರ ಕುಂಠಿತವಾಗಿದ್ದು, ಇದಕ್ಕೆ ಡಿಮಾನೆಟೈಸೆಷನ್ ಕಾರಣ ಎಂದು ಊಹಿಸಲಾಗಿದೆ. ಇದು ೬.೧% ಇಳಿದಿದ್ದು ಆರ್ಥಿಕವಲಯದಲ್ಲಿ ಕಳವಳಕಾರಿ ಅಲೆಗಳನ್ನು ಎಬ್ಬಿಸಿದೆ.
ಕಳೆದ ವಿತ್ತೀಯ ವರ್ಷದಲ್ಲಿ ಜಿಡಿಪಿ ಅಭಿವೃದ್ಧಿ ೭.೧% ಇತ್ತು ಎಂದು ಅಧಿಕೃತವಾಗಿ ಬಿಡುಗಡೆಯಾದ ಮಾಹಿತಿಯಲ್ಲಿ ತಿಳಿಸಲಾಗಿದೆ.
