ದೆಹಲಿ ಎಟಿಎಂ ನಲ್ಲಿ 2 ಸಾವಿರ ರೂ. ಮುಖಬೆಲೆಯ ಅರೆಮುದ್ರಿತ ನೋಟು ಪತ್ತೆ!

ನವದೆಹಲಿ: ದೆಹಲಿಯ ಶಹೀನ್ ಬಾಗ್ ಎಟಿಎಂ ಒಂದರಲ್ಲಿ 2 ಸಾವಿರ ರೂ. ಮುಖಬೆಲೆಯ ಅರೆಮುದ್ರಿತ ನೋಟು ಸಿಕ್ಕಿದೆ! ಅರ್ಧ 2  ಸಾವಿರ ರೂ. ನೋಟಿಗೆ ಇನ್ನರ್ಧ ಬಿಳಿ ಹಾಳೆಯನ್ನು ಕತ್ತರಿಸಿ ಅಂಟಿಸಿದ ಸ್ಥಿತಿಯಲ್ಲಿರುವ ನೋಟು ಮಹಮದ್ ಶಾದಾಬ್ ಎನ್ನುವವರಿಗೆ ದೊರಕಿದೆ.

ಡಿಸಿಬಿ ಬ್ಯಾಂಕ್ ಎಟಿಎಂ ನಲ್ಲಿ ಈ ನಕಲಿ ನೋಟು ಸಿಕ್ಕಿದ್ದು ಬೆಳಗ್ಗೆ 11.55ಕ್ಕೆ ಬ್ಯಾಂಕ್ ಎಟಿಎಂ ನಿಂದ ಹಣ ವಿತ್ ಡ್ರಾ ಮಾಡಿದ್ದ ವೇಳೆ ಶಾದಾಬ್ ಈ ನೋಟನ್ನು ಕಂಡು ಬೆಚ್ಚಿ ಬಿದ್ದರು. ತಕ್ಷಣ ಈ ವಿಷಯವನ್ನು ಬ್ಯಾಂಕ್ ಸಿಬ್ಬಂದಿಯ ಗಮನಕ್ಕೆ ತಂದ ಶಾದಾಬ್ ಗೆ ಸರಿಯಾದ ಪ್ರತಿಕ್ರಿಯೆ ದೊರಕಲಿಲ್ಲ. ಆವರು ಈ ಕುರಿತಂತೆ ಪೋಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಿಸಿದ್ದಾರೆ.

ಕೆಲವೇ ದಿನಗಳ ಹಿಂದೆ ಸಂಗಮ್ ವಿಹಾರ್ ಮತ್ತು ಅಮರ್ ಕಾಲೋನಿ ಎಟಿಎಂ ಗಳಲ್ಲಿ ಚಿಲ್ಡ್ರೆನ್ ಬ್ಯಾಂಕ್ ಆಫ್ ಇಂಡಿಯಾ ಹೆಸರಿನ 2 ಸಾವಿರದ ನಕಲಿ ನೋಟು ಪತ್ತೆಯಾಗಿತ್ತು.