ಗುಜರಾತ್ ಶಾಸಕರ ಪೈಕಿ ಶೇ.83 ರಷ್ಟು ಮಂದಿ ಕೋಟ್ಯಾಧಿಪತಿಗಳು: ವರದಿ

ಅಹ್ಮದಾಬಾದ್: ಗುಜರಾತ್ ವಿಧಾನಸಭಾ ಚುನಾವಣೆಯಲ್ಲಿ ಈ ಬಾರಿ ಆಯ್ಕೆಯಾಗಿರುವ ಶಾಸಕರ ಪೈಕಿ ಶೇ.83 ರಷ್ಟು ಮಂದಿ ಕರೋಡ್ ಪತಿಗಳಾಗಿದ್ದಾರೆ. 

182 ಶಾಸಕರ ಪೈಕಿ 151 ಮಂದಿ ಕನಿಷ್ಠ 1 ಕೋಟಿಗೂ ಹೆಚ್ಚಿನ ಆಸ್ತಿಯನ್ನು ಹೊಂದಿದ್ದಾರೆ. ಈ ಅಂಕಿ-ಅಂಶ 2017 ಕ್ಕಿಂತ ಹೆಚ್ಚಾಗಿದೆ ಎಂದು ಅಸೋಸಿಯೇಷನ್ ಫಾರ್ ಡೆಮಾಕ್ರೆಟಿಕ್ ರಿಫಾರ್ಮ್ಸ್ ವರದಿ ಪ್ರಕಟಿಸಿದೆ. 2017 ರಲ್ಲಿ 141 ಮಂದಿ ಶಾಸಕರು ಕರೋಡ್ ಪತಿಗಳಾಗಿದ್ದರು.

ಈ ಅಧ್ಯಯನ ವರದಿಯ ಪ್ರಕಾರ ಬಿಜೆಪಿ 132 ಕೋಟ್ಯಾಧಿಪತಿ ಶಾಸಕರಿದ್ದು, ಕಾಂಗ್ರೆಸ್ ನಲ್ಲಿ 14 ಮಂದಿ ಕೋಟ್ಯಾಧಿಪತಿ ಶಾಸಕರಿದ್ದಾರೆ. ಆಮ್ ಆದ್ಮಿ ಪಕ್ಷ ಹಾಗೂ ಸಮಾಜವಾದಿ ಪಕ್ಷದಲ್ಲಿ ತಲಾ ಒಬ್ಬರು ಕೋಟ್ಯಾಧಿಪತಿ ಶಾಸಕರಿದ್ದಾರೆ. 

ಇದನ್ನೂ ಓದಿ: ಗುಜರಾತ್ ಚುನಾವಣಾ ಫಲಿತಾಂಶ ಭಾರತ್ ಜೋಡೋ ಯಾತ್ರೆ ಮೇಲೆ ಪರಿಣಾಮ ಬೀರಲ್ಲ: ಕಾಂಗ್ರೆಸ್ 

ಗುಜರಾತ್ ವಿಧಾನಸಭಾ ಚುನಾವಣೆಯಲ್ಲಿ 182 ಸ್ಥಾನಗಳಲ್ಲಿ 156 ಸ್ಥಾನಗಳನ್ನು ಗೆಲ್ಲುವ ಮೂಲಕ 7 ನೇ ಬಾರಿಗೆ ಬಿಜೆಪಿ ಅಧಿಕಾರಕ್ಕೇರಿತ್ತು.

151 ಕೋಟ್ಯಾಧಿಪತಿ ಶಾಸಕರು 73 ಮಂದಿ 5 ಕೋಟಿ ರೂಪಾಯಿಗಿಂತ ಹೆಚ್ಚು ಆಸ್ತಿಯನ್ನು ಹೊಂದಿದ್ದರೆ, 73 ಮಂದಿ 2 ಕೋಟಿಯಿಂದ 5 ಕೋಟಿ ವರೆಗೆ ಆಸ್ತಿ ಹೊಂದಿದ್ದಾರೆ. ಗುಜರಾತ್ ನಲ್ಲಿ ಗೆದ್ದಿರುವ ಅಭ್ಯರ್ಥಿಗಳ ಸರಾಸರಿ ಆಸ್ತಿ 16.41 ಕೋಟಿ ರೂಪಾಯಿಗಳಷ್ಟಿದ್ದು, 2017 ರಲ್ಲಿ 8.46 ಕೋಟಿ ರೂಪಾಯಿ ಇತ್ತು.