ಬಿಹಾರ SIR: 3 ಕ್ಷೇತ್ರಗಳಲ್ಲಿ ತಪ್ಪು, ನಕಲಿ ವಿಳಾಸಗಳಲ್ಲಿ 80,000 ಮತದಾರರು ನೋಂದಣಿ

ಪಾಟ್ನಾ: ಬಿಹಾರದ ಮೂರು ವಿಧಾನಸಭಾ ಕ್ಷೇತ್ರಗಳಲ್ಲಿ ಸುಮಾರು 80,000 ಮತದಾರರು, ನಕಲಿ ಅಥವಾ ತಪ್ಪು ವಿಳಾಸಗಳನ್ನು ನೀಡಿ ನೋಂದಾಯಿಸಿಕೊಂಡಿದ್ದಾರೆ ಎಂದು ಅಂತರರಾಷ್ಟ್ರೀಯ ಪತ್ರಕರ್ತರ ಗುಂಪು ದಿ ರಿಪೋರ್ಟರ್ಸ್ ಕಲೆಕ್ಟಿವ್ ನಡೆಸಿದ ತನಿಖೆಯಲ್ಲಿ ತಿಳಿದುಬಂದಿದೆ.

ಕೇಂದ್ರ ಚುನಾವಣಾ ಆಯೋಗವು(ECI) ಇತ್ತೀಚೆಗೆ ಬಿಹಾರದಲ್ಲಿ ವಿವಾದಾತ್ಮಕ ಮತದಾರರ ಪಟ್ಟಿಯ ವಿಶೇಷ ಸಮಗ್ರ ಪರಿಷ್ಕರಣೆ(SIR)ಯ ಆರಂಭಿಕ ಹಂತವನ್ನು ಪೂರ್ಣಗೊಳಿಸಿದೆ.

ಆಗಸ್ಟ್ 1 ರಂದು ಚುನಾವಣಾ ಆಯೋಗ ಪ್ರಕಟಿಸಿದ ಕರಡು ಪಟ್ಟಿಯ ಪ್ರಕಾರ, ಭಾನುವಾರ ಬಿಡುಗಡೆಯಾದ ರಿಪೋರ್ಟರ್ಸ್ ಕಲೆಕ್ಟಿವ್ ವರದಿಯು ಪಿಪ್ರಾ, ಬಾಗಾಹಾ ಮತ್ತು ಮೋತಿಹಾರಿ ವಿಧಾನಸಭಾ ಕ್ಷೇತ್ರಗಳಲ್ಲಿ 3,590 ವಂಚನೆ ನೋಂದಣಿ ಪ್ರಕರಣಗಳನ್ನು ಬಹಿರಂಗಪಡಿಸಿದೆ.

ಈ ಪ್ರಕರಣಗಳಲ್ಲಿ ಹಲವಾರು ಜನರನ್ನು ಒಟ್ಟುಗೂಡಿಸಿ ಒಂದೇ ವಿಳಾಸದಡಿಯಲ್ಲಿ ನೋಂದಾಯಿಸಲಾಗಿದೆ. ಕೆಲವೊಮ್ಮೆ ಅಸ್ತಿತ್ವದಲ್ಲಿಲ್ಲದ ಮನೆ ಸಂಖ್ಯೆಗಳೊಂದಿಗೆ, ಇಲ್ಲದ ಹಳ್ಳಿಗಳು ಅಥವಾ ವಾರ್ಡ್‌ಗಳ ಹೆಸರುಗಳಿವೆ. ಗಮನಾರ್ಹವಾಗಿ, ಈ ಮತದಾರರಲ್ಲಿ ಕೆಲವರು 2003ರ ಮತದಾರರ ಪಟ್ಟಿಯಲ್ಲಿ ಅವರ ಸರಿಯಾದ ವಿಳಾಸದಲ್ಲಿ ನೋಂದಾಯಿಸಲ್ಪಟ್ಟಿದ್ದರು. ಅದನ್ನು ಈಗ ದೋಷಗಳನ್ನು ಸೃಷ್ಟಿಸಲು ಪರಿಷ್ಕರಿಸಲಾಗಿದೆ.

"ನಮ್ಮ ತನಿಖೆಯು SIR ನಲ್ಲಿ ವ್ಯವಸ್ಥಿತ ಮತ್ತು ದೊಡ್ಡ ಪ್ರಮಾಣದ ದೋಷಗಳ ಬಗ್ಗೆ ದಿಗ್ಭ್ರಮೆಗೊಳಿಸುವ ಪುರಾವೆಗಳನ್ನು ಬಹಿರಂಗಪಡಿಸಿದೆ. ಕನಿಷ್ಠ ಪಕ್ಷ, ECI ಆತುರದಿಂದ ಕಾರ್ಯಗತಗೊಳಿಸಿದ ಈ ಪರಿಷ್ಕರಣೆ, ಹಿಂದಿನ ಮತದಾರರ ಡೇಟಾಬೇಸ್‌ ಸಮಸ್ಯೆ, ದೋಷಗಳನ್ನು ಸರಿಪಡಿಸುವಲ್ಲಿ ವಿಫಲವಾಗಿದೆ ಎಂಬುದನ್ನು ದತ್ತಾಂಶ ತೋರಿಸುತ್ತದೆ" ಎಂದು ವರದಿ ಹೇಳಿದೆ.

ಪಿಪ್ರಾ ಕ್ಷೇತ್ರದ ಗಲಿಂಪುರ ಗ್ರಾಮದ ಎರಡು ಪಕ್ಕದ ಬೂತ್‌ಗಳಿಗೆ ಸಂಬಂಧಿಸಿದ ಪ್ರಕರಣವನ್ನು ಸಾಮೂಹಿಕವಾಗಿ ಗುರುತಿಸಲಾಗಿದೆ. ಅಲ್ಲಿ ಕ್ರಮವಾಗಿ 39 ಮತ್ತು 4 ಸಂಖ್ಯೆಯ ಮನೆಗಳಯಲ್ಲಿ 459 ಮತ್ತು 509 ವ್ಯಕ್ತಿಗಳು ಮತ ಚಲಾಯಿಸಲು ನೋಂದಾಯಿಸಿಕೊಂಡಿದ್ದಾರೆ. ಈ ವ್ಯಕ್ತಿಗಳು ವಿಭಿನ್ನ ಕುಟುಂಬಗಳು, ಜಾತಿಗಳು ಮತ್ತು ಸಮುದಾಯಗಳಿಗೆ ಸೇರಿದವರು ಎಂದು ವರದಿ ತಿಳಿಸಿದೆ.

"ಮಾಂಝಿ-ಮುಸಾಹರ್ ಜಾತಿ ಮತ್ತು ಬ್ರಾಹ್ಮಣ-ಬನಿಯಾ ಜಾತಿಯ ಸದಸ್ಯರು ಒಟ್ಟಿಗೆ ವಾಸಿಸಲು ಹೇಗೆ ಸಾಧ್ಯ? ಹೆಸರುಗಳು ಮತ್ತು ಸಂಖ್ಯೆಗಳನ್ನು ಭರ್ತಿ ಮಾಡುವವರ ದುಷ್ಕೃತ್ಯ ಇದು" ಎಂದು ಮನೆ ಸಂಖ್ಯೆ 4 ರ ಅಡಿಯಲ್ಲಿ ನೋಂದಾಯಿಸಲಾದ 509 ಮತದಾರರಲ್ಲಿ ಒಬ್ಬರು ವರದಿಯಲ್ಲಿ ಉಲ್ಲೇಖಿಸಿದ್ದಾರೆ.

ಗ್ರಾಮೀಣ ಬಿಹಾರದಲ್ಲಿ ವಾಸ್ತವಕ್ಕೆ ದೂರವಾದ, ಮಾಂಝಿ ಮತ್ತು ಮುಸಾಹರ್‌ನಂತಹ ದಲಿತ ಸಮುದಾಯಗಳ ಅತ್ಯಂತ ಹಿಂದುಳಿದವರನ್ನು ಬ್ರಾಹ್ಮಣ ಮತ್ತು ಬನಿಯಾಗಳಂತಹ ಸವಲತ್ತು ಪಡೆದ ಜಾತಿಗಳೊಂದಿಗೆ ಒಂದೇ ಸೂರಿನಡಿ ಇರಿಸಿದ ಚುನಾವಣಾ ಅಧಿಕಾರಿಗಳ "ಧೈರ್ಯ"ವನ್ನು ಮತದಾರರು ಪ್ರಶ್ನಿಸಿದ್ದಾರೆ.

ಏತನ್ಮಧ್ಯೆ, 2003 ರ ಮತದಾರರ ಪಟ್ಟಿಯಲ್ಲಿ ತಮ್ಮ ಸರಿಯಾದ ವಿಳಾಸಗಳ ಅಡಿಯಲ್ಲಿ ನೋಂದಾಯಿಸಲ್ಪಟ್ಟಿದ್ದ 459 ಮತದಾರರನ್ನು ಒಟ್ಟುಗೂಡಿಸಿ ಹೊಸದಾಗಿ ಬಿಡುಗಡೆಯಾದ ಕರಡು ಪಟ್ಟಿಯಲ್ಲಿ ಅಸ್ತಿತ್ವದಲ್ಲಿಲ್ಲದ ಮನೆ ಸಂಖ್ಯೆಯಲ್ಲಿ ನೋಂದಾಯಿಸಲಾಗಿದೆ ಎಂದು ಕಂಡುಬಂದಿದೆ.