'ಬೇಕಾದರೆ ಸ್ವಂತ ಪಕ್ಷ ಆರಂಭಿಸಲಿ, ಇಲ್ಲಿರುವುದು ಬೇಡ': ಪುತ್ರ ಡಾ ಅಣ್ಬುಮನಿ ರಾಮದಾಸ್ ನ್ನು ಉಚ್ಛಾಟಿಸಿದ PMK ಸ್ಥಾಪಕ ಡಾ ಎಸ್ ರಾಮದಾಸ್

ಚೆನ್ನೈ: ಪಟ್ಟಾಳಿ ಮಕ್ಕಳ್ ಕಚ್ಚಿ (PMK) ಸ್ಥಾಪಕ ಡಾ. ಎಸ್. ರಾಮದಾಸ್ ಗುರುವಾರ ತಮ್ಮ ಪುತ್ರ ಡಾ. ಅನ್ಬುಮಣಿ ರಾಮದಾಸ್ ಅವರನ್ನು ಪಕ್ಷದ ಕಾರ್ಯಕಾರಿ ಅಧ್ಯಕ್ಷರ ಪ್ರಮುಖ ಪಾತ್ರ ಸೇರಿದಂತೆ ಪಕ್ಷದ ಎಲ್ಲಾ ಹುದ್ದೆಗಳಿಂದ ಮತ್ತು ಪ್ರಾಥಮಿಕ ಸದಸ್ಯತ್ವದಿಂದಲೂ ವಜಾಗೊಳಿಸಿದ್ದಾರೆ.

ಈ ನಿರ್ಧಾರವನ್ನು ಪ್ರಕಟಿಸಿದ ಡಾ. ರಾಮದಾಸ್, ಅನ್ಬುಮಣಿ ಅವರು ಪ್ರತ್ಯೇಕ ಬಣವನ್ನು ನಡೆಸುತ್ತಿರುವಂತೆ ಕಾರ್ಯನಿರ್ವಹಿಸುತ್ತಿದ್ದರು. ಪಕ್ಷದ ಸಾಮೂಹಿಕ ನಾಯಕತ್ವವನ್ನು ಪಾಲಿಸಲು ನಿರಾಕರಿಸುತ್ತಿದ್ದರು. ಒಬ್ಬ ಜವಾಬ್ದಾರಿಯುತ ರಾಜಕಾರಣಿಗೆ ಅನರ್ಹ ರೀತಿಯಲ್ಲಿ ವರ್ತಿಸುತ್ತಿದ್ದಾರೆ. ಅವರಿಗೆ ಇಷ್ಟವಿದ್ದರೆ ತಮ್ಮದೇ ಆದ ಪಕ್ಷವನ್ನು ಪ್ರಾರಂಭಿಸಲಿ ಎಂದರು.

ಆಗಸ್ಟ್ 17 ರಂದು ರಾಮದಾಸ್ ಅವರ ಅಧ್ಯಕ್ಷತೆಯಲ್ಲಿ ಪುದುಚೇರಿಯಲ್ಲಿ ನಡೆದ ವಿಶೇಷ ಸಾಮಾನ್ಯ ಮಂಡಳಿ ಸಭೆಯ ನಂತರ ಬಿಕ್ಕಟ್ಟು ಉಲ್ಬಣಗೊಂಡಿತು, ಈ ಸಂದರ್ಭದಲ್ಲಿ ಪಕ್ಷದ ಶಿಸ್ತು ಸಮಿತಿಯು ಅನ್ಬುಮಣಿ ವಿರುದ್ಧ 16 ಆರೋಪಗಳನ್ನು ಹೊರಿಸಿತು.

ಆಗಸ್ಟ್ 31 ರೊಳಗೆ ವಿವರಣೆ ನೀಡುವಂತೆ ಕೋರಿ ಶೋಕಾಸ್ ನೋಟಿಸ್ ನೀಡಲಾಯಿತು. ಅವರು ಪ್ರತಿಕ್ರಿಯಿಸಲು ವಿಫಲವಾದಾಗ, ಎರಡನೇ ನೋಟಿಸ್ ನೀಡಿ ಸೆಪ್ಟೆಂಬರ್ 10 ರವರೆಗೆ ಸಮಯ ನೀಡಲಾಯಿತು. ಸಮಯ ನೀಡಿದ್ದರೂ ಉತ್ತರಿಸದಿರುವುದರಿಂದ ರಾಮದಾಸ್ ಆರೋಪಗಳು ಸಾಬೀತಾಗಿವೆ ಎಂದು ಘೋಷಿಸಿದರು.

ಪದೇ ಪದೇ ಅವಕಾಶಗಳು, ಹಿರಿಯರ ಸಲಹೆ ಮತ್ತು ಹಿತೈಷಿಗಳ ಮಾರ್ಗದರ್ಶನದ ಹೊರತಾಗಿಯೂ, ಅನ್ಬುಮಣಿ ರಾಮದಾಸ್ ಅವರು ತಮ್ಮ ಹಾದಿಯನ್ನು ಸರಿಪಡಿಸಿಕೊಳ್ಳಲು ವಿಫಲರಾಗಿದ್ದಾರೆ. ಶಿಸ್ತು ಸಮಿತಿಯು ಅವರ ಕ್ರಮಗಳು ಪಕ್ಷದ ಹಿತಾಸಕ್ತಿಗೆ ವಿರುದ್ಧವಾಗಿವೆ ಎಂದು ತೀರ್ಮಾನಿಸಿದೆ. ಆದ್ದರಿಂದ, ಅವರನ್ನು ಪ್ರಾಥಮಿಕ ಸದಸ್ಯತ್ವ ಸೇರಿದಂತೆ ಎಲ್ಲಾ ಜವಾಬ್ದಾರಿಗಳಿಂದ ತೆಗೆದುಹಾಕಲಾಗಿದೆ ಎಂದು ಡಾ ಎಸ್ ರಾಮದಾಸ್ ಇಂದು ಚೆನ್ನೈಯಲ್ಲಿ ಸುದ್ದಿಗಾರರಿಗೆ ತಿಳಿಸಿದರು.

ಅನ್ಬುಮಣಿ ಅವರೊಂದಿಗೆ ಸಂಪರ್ಕವನ್ನು ಕಾಯ್ದುಕೊಳ್ಳುವುದರ ಬಗ್ಗೆ ಪಿಎಂಕೆ ಕಾರ್ಯಕರ್ತರಿಗೆ ಎಚ್ಚರಿಕೆ ನೀಡಿದ ಅವರು, ಈ ನಿರ್ದೇಶನವನ್ನು ಧಿಕ್ಕರಿಸುವವರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಲಾಗುವುದು ಎಂದು ಹೇಳಿದರು. ನಾನು ಈ ಪಕ್ಷವನ್ನು ವರ್ಷಗಳ ಹೋರಾಟದಿಂದ ನಿರ್ಮಿಸಿದ್ದೇನೆ. ಆದರೆ ಅನ್ಬುಮಣಿ ಅದನ್ನು ಬಲಪಡಿಸುವ ಯಾವುದೇ ಉದ್ದೇಶವನ್ನು ತೋರಿಸಿಲ್ಲ ಎಂದರು.