ಬ್ರಿಟಿಷರ ವಿರುದ್ಧ ಹುಲ್ಲುಕಡ್ಡಿ ಎತ್ತದೆ ಕಾಂಗ್ರೆಸ್ಸಿಗರು ಸ್ವಾತಂತ್ರ್ಯ ತಂದುಕೊಟ್ಟರು; ಭಗತ್ -ಬೋಸ್ ಗೋಲಿ ಆಡುತ್ತಿದ್ದರು!

ಬೆಂಗಳೂರು: ಕಾಂಗ್ರೆಸ್ ಗುಲಾಮಗಿರಿ ಪಕ್ಷ ಎಂಬ ಮುಖ್ಯಮಂತ್ರಿ ಹೇಳಿಕೆ ಬಿಜೆಪಿ ಮತ್ತು ಕಾಂಗ್ರೆಸ್ ನಾಯಕರ ವಾಕ್ಸಮರಕ್ಕೆ ಕಾರಣವಾಗಿದೆ.

ಬ್ರಿಟಿಷರ ಗುಲಾಮಗಿರಿ ವಿರುದ್ಧ ಹೋರಾಡಿ ಜೈಲು ಸೇರಿ, ದೇಶಕ್ಕೆ ಸ್ವಾತಂತ್ರ್ಯ ತಂದುಕೊಟ್ಟಿದ್ದು ಕಾಂಗ್ರೆಸ್ ನಾಯಕರು ಎಂದು ಮಾಜಿ ಸಿಎಂ ಸಿದ್ದರಾಮಯ್ಯ ಬಸವರಾಜ ಬೊಮ್ಮಾಯಿ ಹೇಳಿಕೆಗೆ ತಿರುಗೇಟು ನೀಡಿದ್ದಾರೆ.

ಬ್ರಿಟಿಷರಿಗೆ ಕ್ಷಮಾಪಣೆ ಬರೆದುಕೊಟ್ಟು ಶರಣಾಗಿದ್ದು ನಿಮ್ಮ ಪರಿವಾರದ ಸಾವರ್ಕರ್ ಮತ್ತು ದೇಶಭಕ್ತರು ಎನ್ನುವ ಇತಿಹಾಸವು ಕರ್ನಾಟಕ ಮುಖ್ಯಮಂತ್ರಿಗಳಿಗೆ ತಿಳಿದಿರಲಿ ಎಂದು ಸಿದ್ದರಾಮಯ್ಯ ಟ್ವೀಟ್ ಮಾಡಿದ್ದಾರೆ.

ಇನ್ನು ಸಿದ್ದರಾಮಯ್ಯ ಟ್ವೀಟ್ ಗೆ ಟಾಂಗ್ ನೀಡಿರುವ ಸಂಸದ ಪ್ರತಾಪ್ ಸಿಂಹ, ಹೌದು ಸಾರ್, ಬ್ರಿಟಿಷರ ವಿರುದ್ಧ ಹುಲ್ಲು ಕಡ್ಡಿಯನ್ನೂ ಎತ್ತದೆ ಕಾಂಗ್ರೆಸ್ಸಿಗರು ಸ್ವಾತಂತ್ರ್ಯ ತಂದುಕೊಟ್ಟರು. ಧಿಂಗ್ರಾ, ಭಗತ್ ಸಿಂಗ್, ಬೋಸ್ ಬ್ರಿಟಿಷರ ಜೊತೆ ಗೋಲಿ, ಬುಗುರಿ, ಆಡುತ್ತಿದ್ದರು. ಮುಂದೊಂದು ದಿನ ಇಂಥ ಬೊಗಳೆ ಬಿಡುತ್ತೀರಿ ಅಂಥ ಗೊತ್ತಿದ್ದೇ, ಸ್ವಾತಂತ್ರ್ಯಾ ನಂತರ ಕಾಂಗ್ರೆಸ್ಸನ್ನು ವಿಸರ್ಜನೆ ಮಾಡಬೇಕೆಂದು ಗಾಂಧೀಜಿ ಹೇಳಿದ್ದು! ಎಂದು ಕಿಡಿಕಾರಿದ್ದಾರೆ.