ಬ್ಯಾಡ್ಮಿಂಟನ್: ಸ್ವಿಸ್ ಓಪನ್ ಗೆದ್ದ ಕಿಡಂಬಿ ಶ್ರೀಕಾಂತ್

ಬಾಸೆಲ್: ಭಾರತದ ಬ್ಯಾಡ್ಮಿಂಟನ್ ತಾರೆ ಕೆ. ಶ್ರೀಕಾಂತ್ ಭಾನುವಾರ ಸ್ವಿಸ್ ಓಪನ್ ಗ್ರ್ಯಾಂಡ್ ಪ್ರೀ ಬ್ಯಾಡ್ಮಿಂಟನ್ ಟೂರ್ನಿಯನ್ನು ಗೆದ್ದು ಇತಿಹಾಸ ನಿರ್ಮಿಸಿದ್ದಾರೆ.

ಫೈನಲ್ ನಲ್ಲಿ ಹಾಲಿ ಚಾಂಪಿಯನ್ ಡೆನ್ಮಾರ್ಕ್ ನ ವಿಕ್ಟರ್ ಅಕ್ಸೆಲ್ಸೆನ್ ವಿರುದ್ಧ ಸೆಣೆಸಿದ ಕಿಡಂಬಿ ಶ್ರೀಕಾಂತ್ 21-15, 12-21, 21-14 ಸೆಟ್ ಗಳಿಂದ ಮಣಿಸಿದ್ದಾರೆ.

47 ನಿಮಿಷಗಳ ಕಾಲ ನಡೆದ ಈ ಪಂದ್ಯದಲ್ಲಿ ಇಬ್ಬರೂ ಆಟಗಾರರ ನಡುವೆ ನಿಕಟ ಪೈಪೋಟಿ ನಡೆದಿತ್ತು. 2ನೇ ಸೆಟ್ ನಲ್ಲಿ ಶ್ರೀಕಾಂತ್ ಸೋತರೂ ಅಂತಿಮ ಸೆಟ್ ನಲ್ಲಿ ಚಾಕಚಕ್ಯತೆಯ ಪ್ರದರ್ಶನ ನೀಡಿ ಎದುರಾಳಿ ವಿರುದ್ಧ ಮೇಲುಗೈ ಸಾಧಿಸಿದರು.

ಈ ಟೂರ್ನಿಯನ್ನು ಸೈನಾ ನೆಹ್ವಾಲ್ ಅವರು ಎರಡು ಬಾರಿ ಗೆದ್ದಿದ್ದರು. ಆದರೆ ಭಾರತೀಯ ಪುರುಷ ಆಟಗಾರನೊಬ್ಬ ಸ್ವಿಸ್ ಓಪನ್ ಗೆಲ್ಲುತ್ತಿರುವುದು ಇದೇ ಮೊದಲು.