ಅವಳ ಆತ್ಮೀಯ ಸ್ನೇಹಿತನಾಗಿದ್ದ ಅವನು, ತನ್ನ ಅಮೂಲ್ಯ ಸ್ನೇಹ ಕಳೆದುಕೊಂಡ- ಅವಳ ಗಂಡನಾದ!
=
'ಅಪಘಾತ' ಎಂಬ ಕಥೆ ಬರೆಯುತ್ತಿದ್ದ ಕಥೆಗಾರನೊಬ್ಬ, ಕಥೆಯ ಕಲ್ಪನೆಯಲ್ಲೇ ಸಾಗುತ್ತಿದ್ದಾಗ ಎದುರಿಗೆ ಬರುತ್ತಿದ್ದ ಲಾರಿಯೇಕೋ ಕಾಣಲೇ ಇಲ್ಲ!
=
ಅಂದು ಇಂಗ್ಲಿಷ್ ಬಾರದವನೆಂದು ಅವನ ಪ್ರೇಮವನ್ನು ನಿರಾಕರಿಸಿದ ಆಕೆ, ಇಂದು ಕನ್ನಡದಲ್ಲಿ ಭಗ್ನಪ್ರೇಮ- ಕವಿತೆಗಳನ್ನು ಬರೆದೇ ಪ್ರಸಿದ್ಧಿ ಪಡೆದ ಆತನನ್ನು ಕಂಡು ಹಲ್ಲು ಗಿಂಜುತ್ತಿದ್ದಾಳೆ!
=
'ತಾಯಿಯೆಲ್ಲಿ ರೊಟ್ಟಿಗೆ ಬಾಯಿ ಹಾಕುವಳೋ' ಎಂಬ ಆತಂಕದಿಂದ ಮರಿನಾಯಿಗಳು ಆಹಾರವನ್ನು ಗಬಗಬನೆ ಮುಕ್ಕುತ್ತಿದ್ದರೆ, 'ಇಷ್ಟೇ ರೊಟ್ಟಿ ತನ್ನ ನಾಲ್ಕು ಮರಿಗಳ ಹೊಟ್ಟೆ ತುಂಬಿಸುವುದಿಲ್ಲವಲ್ಲ' ಎಂಬ ಆತಂಕದಿಂದ ತಾಯಿನಾಯಿ ಮರಿಗಳೆಡೆಗೆ ಕನಿಕರದಿಂದ ನೋಡುತ್ತಿತ್ತು.
=
ವಿಚ್ಛೇದನವಾದ ನಂತರ ಬರೆದೂ ಬರೆದೂ ಪ್ರಸಿದ್ಧಿಯಾದ ಲೇಖಕಿಯೊಬ್ಬಳು ಸಾಯುವ ಮಾಜಿ ಗಂಡನಿಗೊಂದು ಪತ್ರ ಬರೆದಳು- 'ನೀವು ನನ್ನ ಕಡೆಗಣಿಸಿ ಒಂಟಿಯಾಗಿಸದೇ ಹೋಗದಿದ್ದರೆ ಲೇಖನಿ ನನ್ನ ಸಂಗಾತಿ ಆಗುತ್ತಿರಲಿಲ್ಲ!'
-ರಮ್ಯಾ ಸುಬ್ರಹ್ಮಣ್ಯ
