ಮತ್ತೊಮ್ಮೆ ಅಮೆರಿಕಾಗೆ ಭೇಟಿ ನೀಡಿ; ನಿಮ್ಮ ನಿರೀಕ್ಷೆಯಲ್ಲಿ... ಟ್ರಂಪ್

ವಾಷಿಂಗ್ ಟನ್: ಪ್ರಧಾನಿ ನರೇಂದ್ರ ಮೋದಿಗೆ ಅಮೆರಿಕಾದ ಶ್ವೇತ ಭವನದಲ್ಲಿ ಅದ್ಧೂರಿ ಸ್ವಾಗತ, ಗೌರವ ದೊರೆತಿದ್ದು, ಟ್ರಂಪ್ ನೇತೃತ್ವದ ಸರ್ಕಾರದಲ್ಲಿ ಶ್ವೇತ ಭವನದ ಔತಣಕೂಟದಲ್ಲಿ ಭಾಗವಹಿಸಿದ್ದ ಮೊದಲ ಅಂತಾರಾಷ್ಟ್ರೀಯ ನಾಯಕ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. 

ಟ್ರಂಪ್ ಮಾರ್ಗದರ್ಶನದಲ್ಲಿ ಶ್ವೇತಭವನದಲ್ಲಿರುವ ಅಮೆರಿಕ ಅಧ್ಯಕ್ಷರ ನಿವಾಸವನ್ನು ವೀಕ್ಷಿಸಿದ ಪ್ರಧಾನಿ ಮೋದಿ, ಅಮೆರಿಕದ ಅಧ್ಯಕ್ಷ, ಉಪಾಧ್ಯಕ್ಷ, ಪ್ರಮುಖ ಸಚಿವರೊಂದಿಗೆ ಔತಣಕೂಟದಲ್ಲಿ ಭಾಗಿಯಾಗಿದ್ದರು. ಅಮೆರಿಕದ ಆತಿಥ್ಯದ ಬಗ್ಗೆ ಪ್ರಧಾನಿ ಮೋದಿ ಮೆಚ್ಚುಗೆ ವ್ಯಕ್ತಪಡಿಸಿದ್ದು, ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್, ಫಸ್ಟ್ ಲೇಡಿ ಮಿಲೇನಿಯಾ ಟ್ರಂಪ್ ಅವರ ಆಹ್ವಾನ, ಆತಿಥ್ಯಕ್ಕೆ ಕೃತಜ್ಞತೆ ವ್ಯಕ್ತಪಡಿಸುತ್ತೇನೆ. ಅಮೆರಿಕಾದಲ್ಲಿ ಕೇವಲ ಕೆಲವೇ ಕಾಲ ಇದ್ದರೂ, ನಮ್ಮ ದೇಶದಲ್ಲಿದ್ದೇನೆ ಎನಿಸಿತ್ತು. ಅಮೆರಿಕ ನನಗೆ ತೋರಿರುವ ಗೌರವ, ಆತಿಥ್ಯವೆಲ್ಲವೂ ಕೇವಲ ನನಗಷ್ಟೇ ಅಲ್ಲ, 1.25 ಬಿಲಿಯನ್ ಭಾರತೀಯರಿಗೆ ಸಲ್ಲುತ್ತದೆ, ಅಮೆರಿಕದ ಆತಿಥ್ಯಕ್ಕೆ ಧನ್ಯವಾದ ಹೇಳುತ್ತೇನೆ ಎಂದು ಮೋದಿ ಹೇಳಿದ್ದಾರೆ.  

ಈ ವೇಳೆ ಪ್ರತಿಕ್ರಿಯೆ ನೀಡಿದ ಡೊನಾಲ್ಡ್ ಟ್ರಂಪ್ ನಾವಿಬ್ಬರೂ ಯಶಸ್ವಿ ಮಾತುಕತೆ ನಡೆಸಿದ್ದೇವೆ. ಅತ್ಯುತ್ತಮ ಬಾಂಧವ್ಯ ಹೊಂದಿದ್ದೇವೆ. ನಿಮಗೆ ಇಷ್ಟವಾದಾಗ ಮತ್ತೊಮ್ಮೆ ಅಮೆರಿಕಾಗೆ ಭೇಟಿ ನೀಡಿ; ನಿಮ್ಮ ನಿರೀಕ್ಷೆಯಲ್ಲಿರುತ್ತೇವೆ ಎಂದು ಟ್ರಂಪ್ ಹೇಳಿದ್ದಾರೆ.