ಉತ್ತರ ಕೊರಿಯಾದಲ್ಲಿ 6ನೇ ಅಣ್ವಸ್ತ್ರ ಪರೀಕ್ಷೆ ಯಶಸ್ವಿ ಬೆನ್ನಲ್ಲೇ ಪ್ರಬಲ ಭೂಕಂಪ!

ಸಿಯೋಲ್: ಯುದ್ಧೋದಾಹದಲ್ಲಿರುವ ಉತ್ತರ ಕೊರಿಯಾದ ಸರ್ವಾಧಿಕಾರಿ ಕಿಮ್ ಜಾಂಗ್ ಉನ್ ಇಂದು 6ನೇ ಬಾರಿಗೆ ಪರಮಾಣು ಪರೀಕ್ಷೆ ನಡೆಸಿದ್ದು ಇದರ ಬೆನ್ನಲ್ಲೇ ಪ್ರಬಲ ಭೂಕಂಪ ಸಂಭವಿಸಿದೆ ಎಂದು ವರದಿಯಾಗಿದೆ.  

ಕಿಮ್ ಜಾಂಗ್ ಉನ್ ಹೈಡ್ರೋಜನ್ ಬಾಂಬನ್ನು ಖಂಡಾಂತರ್ಗಾಮಿ ಕ್ಷಿಪಣಿಗೆ ಅಳವಡಿಸಿರುವ ಕುರಿತು ಹೇಳಿರುವ ಬೆನ್ನಲ್ಲೇ ಪರೀಕ್ಷೆ ನಡೆಸಲಾಗಿದ್ದು ಅದು ಭೂಕಂಪನಕ್ಕೆ ಕಾರಣವಾಗಿದೆ ಎಂದು ಮಾಧ್ಯಮಗಳು ವರದಿ ಮಾಡಿವೆ. ಇನ್ನು ಅಣ್ವಸ್ತ್ರ ಪರೀಕ್ಷೆ ಆಂತಕದ ಬೆನ್ನಲ್ಲೇ ವೈರಿ ರಾಷ್ಟ್ರ ದಕ್ಷಿಣ ಕೊರಿಯಾ ಅಧ್ಯಕ್ಷ ಮೂನ್ ಜೇ ಇನ್ ರಾಷ್ಟ್ರೀಯ ಭದ್ರತಾ ಸಲಹಾ ಸಮಿತಿಯ ತುರ್ತು ಸಭೆ ಕರೆದಿದ್ದಾರೆ. 

ಉತ್ತರ ಕೊರಿಯಾದ ಸಾಂಗ್ ಜಿ ಬಾಗೇಮ್ ನ ಈಶಾನ್ಯ ಪ್ರಾಂತ್ಯದಲ್ಲಿ 5.1 ತೀವ್ರತೆಯ ಕೃತಕ ಭೂಕಂಪನ ಸಂಭವಿಸಿದೆ ಎಂದು ಅಮೆರಿಕದ ಭೂಗರ್ಭ ಶಾಸ್ತ್ರಜ್ಞರು ತಿಳಿಸಿದ್ದಾರೆ. ಭೂಕಂಪನ ವಾದ ಬಳಿಕ ದಕ್ಷಿಣ ಕೊರಿಯಾದ ಸೇನೆ ಹೇಳಿಕೆ ನೀಡಿದ್ದು 5.6 ತೀವ್ರತೆಯ ಕೃತಕ ಭೂಕಂಪವನ್ನು ಉತ್ತರ ಕೊರಿಯಾ ಸೃಷ್ಟಿ ಮಾಡಿದೆ ಎಂದು ವಿಶ್ಲೇಷಣೆ ಮಾಡಲಾಗಿದೆ.