ಅಮೆರಿಕ ಸಚಿವ ರೆಕ್ಸ್ ಟಿಲರ್ಸನ್-ಸ್ವರಾಜ್ ಭೇಟಿ; ಭಯೋತ್ಪಾದನೆ, ಹೆಚ್1 ಬಿ ವೀಸಾ ಕುರಿತು ಚರ್ಚೆ

ನ್ಯೂಯಾರ್ಕ್: ಅಮೆರಿಕಾಗೆ ಭೇಟಿ ನೀಡಿರುವ ವಿದೇಶಾಂಗ ಸಚಿವ ಸುಷ್ಮಾ ಸ್ವರಾಜ್ ಅಮೆರಿಕ ಸಚಿವ ರೆಕ್ಸ್ ಟಿಲರ್ಸನ್ ಅವರನ್ನು ಭೇಟಿ ಮಾಡಿದ್ದು, ಭಯೋತ್ಪಾದನೆ ಹಾಗೂ ಹೆಚ್1 ಬಿ ವೀಸಾ ಕುರಿತು ಚರ್ಚೆ ಮಾಡಿದ್ದಾರೆ. 

ವಿಶ್ವಸಂಸ್ಥೆ ಮಾಹಾಸಭೆಯ ಪಾರ್ಶ್ವದಲ್ಲಿ ಇಬ್ಬರೂ ನಾಯಕರು ಭೇಟಿ ಮಾಡಿದ್ದು, ಅಮೆರಿಕ-ಭಾರತ ನಡುವಿನ ಆರ್ಥಿಕ ಸಹಕಾರದ ಬಲವರ್ಧನೆ ಬಗ್ಗೆ ಮಾತುಕತೆ ನಡೆಸಿದ್ದಾರೆ. ಇದೇ ವೇಳೆ ಅಫ್ಘಾನಿಸ್ತಾನದ ಅಭಿವೃದ್ಧಿ ಹಾಗೂ ಸ್ಥಿರತೆಗಾಗಿ ನೀಡಿರುವ ಸಹಕಾರಕ್ಕೆ ಅಮೆರಿಕ ಸಚಿವರು ಭಾರತ ಸರ್ಕಾರಕ್ಕೆ ಧನ್ಯವಾದ ತಿಳಿಸಿದ್ದಾರೆ. 

ದ್ವಿಪಕ್ಷೀಯ ಮಾತುಕತೆ ವೇಳೆ ಹೆಚ್ 1 ಬಿ ವೀಸಾ ಬಗ್ಗೆಯೂ ಸುಷ್ಮಾ ಸ್ವರಾಜ್ ಪ್ರಸ್ತಾಪಿಸಿದ್ದು, ಪಾಕಿಸ್ತಾನದ ಭಯೋತ್ಪಾದನೆಯ ಬಗ್ಗೆಯೂ ಚರ್ಚಿಸಿದ್ದಾರೆ ಎಂದು ವಿದೇಶಾಂಗ ಇಲಾಖೆ ವಕ್ತಾರ ರವೀಶ್ ಕುಮಾರ್ ಹೇಳಿದ್ದಾರೆ.