ಲೇಖಾನುದಾನಕ್ಕೆ ಅಮೆರಿಕ ಸೆನೆಟ್ ಅನುಮೋದನೆ, ಹಣಕಾಸಿನ ಬಿಕ್ಕಟ್ಟು ಅಂತ್ಯ

ವಾಷಿಂಗ್ಟನ್: ಲೇಖಾನುದಾನಕ್ಕೆ ಅಮೆರಿಕ ಕಾಂಗ್ರೆಸ್ ಶುಕ್ರವಾರ ಅನುಮೋದನೆ ನೀಡಿದ್ದು, ಇದರೊಂದಿಗೆ ವಿಶ್ವದ ದೊಡ್ಡಣ್ಣ ಡೊನಾಲ್ಡ್ ಟ್ರಂಪ್ ಸರ್ಕಾರ ಹಣಕಾಸಿನ ಬಿಕ್ಕಟ್ಟಿನಿಂದ ಪಾರಾಗಿದೆ.

ಇಂದು ಮಿಲಿಟರಿ ಮತ್ತು ದೇಶಿಯ ಕಾರ್ಯಕ್ರಮಗಳಿಗೆ ಅನುದಾನ ಕೊರತೆಯಾಗದಂತೆ ನೋಡಿಕೊಳ್ಳಲು ಅಮೆರಿಕದ ಮೇಲ್ಮನೆ ಸೆನೆಟ್​ನಲ್ಲಿ ಆಡಳಿತಾರೂಢ ರಿಪ್ಲಬಿಕನ್ ಮತ್ತು ಪ್ರತಿಪಕ್ಷ ಡೆಮಾಕ್ರಟಿಕ್ ಪಕ್ಷಗಳ ನಡುವೆ ಎರಡು ವರ್ಷಗಳ ಅವಧಿಯ ಲೇಖಾನುದಾನಕ್ಕೆ ಒಪ್ಪಂದ ಏರ್ಪಟ್ಟ ಬಳಿಕ ಲೇಖಾನುದಾನಕ್ಕೆ ಅಮೆರಿಕ ಸೆನೆಟ್ ಒಪ್ಪಿಗೆ ನೀಡಿದ್ದು, ಅದನ್ನು ಅಧ್ಯಕ್ಷರ ಸಹಿಗಾಗಿ ಶ್ವೇತ ಭವನಕ್ಕೆ ರವಾನಿಸಲಾಗಿದೆ

ಈ ಒಪ್ಪಂದದನ್ವಯ ಮಿಲಿಟರಿ ಮತ್ತು ದೇಶಿಯ ಕಾರ್ಯಕ್ರಮಗಳಿಗಾಗಿ 19.3 ಲಕ್ಷ ಕೋಟಿ ರೂ. ಅನುದಾನ ಬಳಕೆಗೆ ಸೆನೆಟ್​ನ ಅನುಮೋದನೆ ದೊರೆತಂತಾಗಿದೆ.

ಕಳೆದ ಜನವರಿ 20ರಂದು ಅಲ್ಪಾವಧಿಯ ಖರ್ಚುವೆಚ್ಚಗಳ ಲೇಖಾನುದಾನಕ್ಕೆ ಸೆನೆಟ್​ನಲ್ಲಿ ಅನುಮೋದನೆ ನೀಡಲು ಡೆಮಾಕ್ರಾಟ್ ಪಕ್ಷದ ನಾಯಕರು ನಿರಾಕರಿಸಿದ್ದರಿಂದ, ಅಮೆರಿಕದಲ್ಲಿ ಆಡಳಿತ ಯಂತ್ರ ಸ್ಥಗಿತಗೊಂಡಿತ್ತು.

ಹಣಕಾಸು ಪೂರೈಸಲು ಅಮೆರಿಕಾ ಕಾಂಗ್ರೆಸ್ ವಿಫಲವಾದರೆ ಸರ್ಕಾರದ ಸಂಸ್ಥೆಗಳು ತಮ್ಮ ಕಾರ್ಯವನ್ನು ಸ್ಥಗಿತಗೊಳಿಸುವ ಅವಕಾಶ ಒಕ್ಕೂಟ ಕಾನೂನಿನಲ್ಲಿದೆ.