ರಾನಿಲ್ ವಿಕ್ರಮಸಿಂಘೆ ಪ್ರಧಾನಿ ಎಂದು ಗುರುತಿಸಿದ ಲಂಕಾ ಸ್ಪೀಕರ್

ಕೊಲಂಬೊ: ಶ್ರೀಲಂಕಾದಲ್ಲಿ ರಾಜಕೀಯ ಬಿಕ್ಕಟ್ಟು ತೀವ್ರ ಸ್ವರೂಪ ಪಡೆದುಕೊಳ್ಳುತ್ತಿದ್ದು,  ಉಚ್ಚಾಟಿತ ಪ್ರಧಾನಿ ರಾನಿಲ್ ವಿಕ್ರಮಸಿಂಘೆ ಅವರೇ ಈಗಲೂ ಪ್ರಧಾನಿ ಎಂದು ಶ್ರೀಲಂಕಾ ಸಂಸತ್ ಸ್ಪೀಕರ್ ಕರು ಜಯಸೂರ್ಯ ಅವರು ಗುರುತಿಸಿದ್ದಾರೆ.

ಜಯಸೂರ್ಯ ಅವರು ಈ ಸಂಬಂಧ ಶ್ರೀಲಂಕಾ ಅಧ್ಯಕ್ಷ ಮೈತ್ರಿಪಾಲ ಸಿರಿಸೇನಾ ಅವರಿಗೆ ಪತ್ರ ಬರೆದಿದ್ದು, ನವೆಂಬರ್ 16ರವರೆಗೆ ಸಂಸತ್ ಕಲಾಪ ಅಮಾನತುಗೊಳಿಸಿದ್ದನ್ನು ಪ್ರಶ್ನಿಸಿದ್ದಾರೆ.

ವಿಕ್ರಮಸಿಂಘೆ ಅವರು ಜನಾದೇಶ ಪಡೆದಿದ್ದು, ಅವರನ್ನೇ ಪ್ರಧಾನಿಯಾಗಿ ಪುನರ್ ಸ್ಥಾಪಿಸಿ. ಈ ಮೂಲಕ ಪ್ರಜಾಪ್ರಭುತ್ವ ಮತ್ತು ಉತ್ತಮ ಸರ್ಕಾರ ರಕ್ಷಿಸುವಂತೆ ಸ್ಪೀಕರ್ ಸಿರಿಸೇನಾ ಅವರಿಗೆ ಮನವಿ ಮಾಡಿದ್ದಾರೆ. ಅಲ್ಲದೆ ಸಂಸತ್ ಅಮಾನತುಗೊಳಿಸಿರುವುದು ಅನಪೇಕ್ಷಿತ ಎಂದಿದ್ದಾರೆ.

ಸಿರಿಸೇನಾ ಅವರು ಕಳೆದ ಶುಕ್ರವಾರ ಪ್ರಧಾನಿ ರಾನಿಲ್​ ವಿಕ್ರಮಸಿಂಘೆ ಅವರನ್ನು ಉಚ್ಚಾಟಿಸಿ, ಮಹಿಂದ ರಾಜಪಕ್ಸೆ ಅವರನ್ನು ಪ್ರಧಾನಿಯಾಗಿ ನೇಮಕ ಮಾಡಿದ್ದಾರೆ.