ಕೋವಿಡ್-19: ಬ್ರಿಟನ್ ನಲ್ಲಿರುವ ವಿದೇಶಿ ನೌಕರರಿಗೆ ಭಾರತ ಮೂಲದ ಹಣಕಾಸು ಸಚಿವ ರಿಷಿ ಕೊಡುಗೆ! 

ಲಂಡನ್: ಬ್ರಿಟನ್ ನಲ್ಲಿ ಕೆಲಸ ಮಾಡುತ್ತಿರುವ ವಿದೇಶಿ ನೌಕರರಿಗೆ ಭಾರತ ಮೂಲದ ಅಲ್ಲಿನ ಹಣಕಾಸು ಸಚಿವ ರಿಷಿ ಸುನಕ್ ಕೆಲವು ಪರಿಹಾರ ಘೋಷಣೆಗಳನ್ನು ಮಾಡಿದ್ದಾರೆ. 

ಕೋವಿಡ್-19 ವಿರುದ್ಧದ ಹೋರಾಟದಲ್ಲಿ ತೊಡಗಿಸಿಕೊಂಡಿರುವ ಭಾರತೀಯರೂ ಸೇರಿದಂತೆ ಹೆಚ್ಚು ನುರಿತ ವಿದೇಶಿ ನೌಕರರಿಗೆ ತಾತ್ಕಾಲಿಕವಾಗಿ ಮೊದಲ 3 ತಿಂಗಳವರೆಗೆ ತೆರಿಗೆ ವಿನಾಯಿತಿಯನ್ನು ಘೋಷಿಸಿದ್ದಾರೆ. 

ಭಾರತೀಯ ಮೂಲದ ರಿಷಿ ಸುನಕ್ ಹೌಸ್ ಆಫ್ ಕಾಮನ್ಸ್ ಖಜಾನೆ ಸಮಿತಿಗೆ ಪತ್ರ ಬರೆದಿದ್ದು, ನಿರ್ದಿಷ್ಟ ಆರ್ಥಿಕ ವರ್ಷದಲ್ಲಿ ಬ್ರಿಟನ್ ನ ನಿವಾಸಿಗಳೆಂದು ಪರಿಗಣಿಸಲು ನಡೆಸಲಾಗುವ ರೆಸಿಡೆನ್ಸ್ ಟೆಸ್ಟ್ (ಎಸ್ ಆರ್ ಟಿ) ಗೆ ಮಾ.1 ರಿಂದ ಜೂ.1 ವರೆಗೆ ವಿನಾಯಿತಿ ನೀಡಬೇಕೆಂದು ಸೂಚನೆ ನೀಡಿದ್ದಾರೆ. ಪರಿಣಾಮ ಕೋವಿಡ್-19 ವಿರುದ್ಧ ಹೋರಾಡಲು ಬ್ರಿಟನ್ ಸರ್ಕಾರದ ಜೊತೆ ತೊಡಗಿಸಿಕೊಳ್ಳುವ ವಿದೇಶಿ ನುರಿತ ನೌಕರರಿಗೆ ತೆರಿಗೆ ಲಾಭ ದೊರೆಯಲಿದೆ. 

ಕೋವಿಡ್-19 ಪರಿಸ್ಥಿತಿಯನ್ನು ನಿಭಾಯಿಸುವುದಕ್ಕೆ ಬ್ರಿಟನ್ ಗೆ ಸಹಕರಿಸುವ ಅರಿವಳಿಕೆ ತಜ್ಞರು, ವೆಂಟಿಲೇಟರ್ ನ್ನು ವಿನ್ಯಾಸಗೊಳಿಸಿ ಉತ್ಪಾದಿಸುವ ಇಂಜಿನಿಯರ್ ಗಳ ಪರಿಣತಿ ಮತ್ತು ಸಂಪನ್ಮೂಲಗಳನ್ನು ನೀಡಲಿರುವವರನ್ನು ಸ್ವಾಗತಿಸುತ್ತೇವೆ ಎಂದು ರಿಷಿ ಸುನಕ್ ಹೇಳಿದ್ದಾರೆ.