ಮೊಜಾಂಬಿಕ್‌ನಲ್ಲಿ ಬೋಟ್ ದುರಂತ: ಮೂವರು ಭಾರತೀಯರ ಸಾವು; ಕುಟುಂಬಗಳೊಂದಿಗೆ ಹೈಕಮಿಷನ್ ಸಂಪರ್ಕ

ಮೊಜಾಂಬಿಕ್‌ನಲ್ಲಿ ನಡೆದ ದೋಣಿ ದುರಂತದಲ್ಲಿ ಮೂವರು ಭಾರತೀಯರು ಸಾವನ್ನಪ್ಪಿದ್ದು ಒಬ್ಬರು ಗಾಯಗೊಂಡಿದ್ದಾರೆ. ಇತರ ಐದು ಜನರನ್ನು ರಕ್ಷಿಸಲಾಗಿದೆ ಎಂದು ಭಾರತೀಯ ಹೈಕಮಿಷನ್ ತಿಳಿಸಿದೆ. ಸಾಮಾಜಿಕ ಮಾಧ್ಯಮ ಪೋಸ್ಟ್‌ನಲ್ಲಿ, ಭಾರತೀಯ ಮಿಷನ್ ಬೀರಾ ಬಂದರಿನ ಬಳಿ ನಡೆದ ದೋಣಿ ಅಪಘಾತದಲ್ಲಿ "ಮೂರು ಭಾರತೀಯ ನಾಗರಿಕರು ಸೇರಿದಂತೆ ಎಲ್ಲಾ ಜೀವಗಳ ನಷ್ಟಕ್ಕೆ ತನ್ನ ಆಳವಾದ ಸಂತಾಪ" ವ್ಯಕ್ತಪಡಿಸಿದೆ.

ಅಪಘಾತದಲ್ಲಿ ಪ್ರಾಣ ಕಳೆದುಕೊಂಡವರ ಕುಟುಂಬಗಳೊಂದಿಗೆ ಹೈಕಮಿಷನ್ ಸಂಪರ್ಕದಲ್ಲಿದೆ. ಅವರಿಗೆ ಸಾಧ್ಯವಿರುವ ಎಲ್ಲಾ ಸಹಾಯವನ್ನು ನೀಡುತ್ತಿದೆ ಎಂದು ತಿಳಿಸಿದೆ. ಮತ್ತೊಂದು ಪೋಸ್ಟ್‌ನಲ್ಲಿ, ಮಿಷನ್‌ನ ಕಾನ್ಸುಲರ್ ಅಧಿಕಾರಿಯೊಬ್ಬರು ಅಪಘಾತದಿಂದ ಬದುಕುಳಿದ ಮತ್ತು ಆಸ್ಪತ್ರೆಗೆ ದಾಖಲಾಗಿರುವ ಭಾರತೀಯ ನಾಗರಿಕರನ್ನು ಭೇಟಿ ಮಾಡಿದ್ದಾರೆ ಎಂದು ಹೈಕಮಿಷನ್ ತಿಳಿಸಿದೆ. ಇತರ ಐದು ಭಾರತೀಯ ನಾಗರಿಕರನ್ನು ರಕ್ಷಿಸಲಾಗಿದೆ ಎಂದು ಅದು ಹೇಳಿದೆ.

14 ಭಾರತೀಯ ನಾಗರಿಕರು ಸೇರಿದಂತೆ ಹಲವರನ್ನು ಹೊತ್ತೊಯ್ಯುತ್ತಿದ್ದ ದೋಣಿ ಮಧ್ಯ ಮೊಜಾಂಬಿಕ್‌ನ ಬೈರಾ ಬಂದರಿನ ಬಳಿ ಮಗುಚಿ ಬಿದ್ದಿದೆ ಎಂದು ಹೈಕಮಿಷನ್ ಶುಕ್ರವಾರ ಪತ್ರಿಕಾ ಪ್ರಕಟಣೆಯಲ್ಲಿ ತಿಳಿಸಿದೆ. ಅಪಘಾತದ ಕಾರಣ ಮತ್ತು ಹಡಗಿನಲ್ಲಿದ್ದ ಜನರ ಸಂಖ್ಯೆಯ ಬಗ್ಗೆ ವಿವರಗಳು ತಕ್ಷಣ ಲಭ್ಯವಿಲ್ಲ. ಭಾರತ ಮತ್ತು ಮೊಜಾಂಬಿಕ್ ನಿಕಟ ರಾಜತಾಂತ್ರಿಕ ಮತ್ತು ಆರ್ಥಿಕ ಸಂಬಂಧಗಳನ್ನು ಹೊಂದಿವೆ.

ಹೈಕಮಿಷನ್‌ನ ವೆಬ್‌ಸೈಟ್ ಪ್ರಕಾರ, ಮೊಜಾಂಬಿಕ್ ನಲ್ಲಿ ಸುಮಾರು 20,000 ಭಾರತೀಯ ಮೂಲದವರಿದ್ದಾರೆ. ಅವರಲ್ಲಿ ಹೆಚ್ಚಿನವರು ಗುಜರಾತ್, ಗೋವಾ ಮತ್ತು ದಮನ್ ಮತ್ತು ಡಿಯು ಮೂಲದವರು. ದೇಶದಲ್ಲಿ ಸುಮಾರು 3,000 ಭಾರತೀಯ ನಾಗರಿಕರಿದ್ದು, ಅವರು ವಿವಿಧ ಭಾರತೀಯ ಕಂಪನಿಗಳಲ್ಲಿ ಉದ್ಯೋಗಿಗಳಾಗಿದ್ದಾರೆ ಅಥವಾ ಮೊಜಾಂಬಿಕ್ ಕಂಪನಿಗಳಲ್ಲಿ ವೃತ್ತಿಪರರಾಗಿ ಕೆಲಸ ಮಾಡುತ್ತಿದ್ದಾರೆ ಎಂದು ಅದು ಹೇಳುತ್ತದೆ.