ಮುಂಗಾರು ಕೊರತೆ: ಕಾಫಿ ಉತ್ಪಾದನೆ ಮೇಲೆ ಹೊಡೆತ

ಚೆನ್ನೈ/ಕೊಚ್ಚಿ: ಈ ವರ್ಷ ದಕ್ಷಿಣ ಭಾರತದಲ್ಲಿ ಮಾನ್ಸೂನ್ ಕೊರತೆಯಿಂದ ಕಾಫಿ ಉತ್ಪಾದನೆ ಮೇಲೆ ಪರಿಣಾಮ ಬೀರಿದೆ. 

ಅಕ್ಟೋಬರ್ 2016ರಿಂದ ಸೆಪ್ಟೆಂಬರ್ 2017ರವರೆಗಿನ ಬೆಳೆ ವರ್ಷದ ಪರಿಷ್ಕೃತ ಅಂದಾಜು ಮುನ್ಸೂಚನೆ ಪ್ರಕಾರ  ಕಳೆದ ವರ್ಷಕ್ಕಿಂತ ಶೇಕಡಾ 7ರಷ್ಟು ಉತ್ಪಾದನೆ ಕಡಿಮೆಯಾಗಿದೆ. 2015-16ನೇ ಸಾಲಿನಲ್ಲಿ 3,48,000 ಟನ್ ಗಳಷ್ಟು ಕಾಫಿ ಉತ್ಪಾದನೆಯಾಗಿತ್ತು. ಈ ವರ್ಷ ಇದುವರೆಗೆ 3,16,700 ಟನ್ ಗಳಷ್ಟು ದಕ್ಷಿಣ ಭಾರತದಲ್ಲಿ ಕಾಫಿ ಬೆಳೆ ಉತ್ಪಾದನೆ ಕಂಡಿದೆ.

ಕೇವಲ ಒಂದು ರಾಜ್ಯ ಅಥವಾ ಒಂದು ಪ್ರದೇಶದಲ್ಲಿ ಮಾತ್ರ ಉತ್ಪಾದನೆಯಲ್ಲಿ ಕುಸಿತ ಕಂಡುಬಂದಿಲ್ಲ. ಅರೇಬಿಕಾ ಉತ್ಪಾದನೆ ಕಳೆದ ವರ್ಷ 1,03,500 ಟನ್ ಗಳಷ್ಟಿದ್ದು, ಈ ವರ್ಷ 96,200 ಟನ್ ಗಳಷ್ಟಾಗಿದೆ. ರೊಬಸ್ಟಾ 2,44,500 ಟನ್ ಗಳಿಂದ 2,20,500 ಟನ್ ಗಳಿಗೆ ಕುಸಿದಿದೆ. ಕರ್ನಾಟಕದಲ್ಲಿ ಕಾಫಿ ಉತ್ಪಾದನೆ ಕಳೆದ ವರ್ಷ 2,51,520 ಟನ್ ಗಳಷ್ಟಿತ್ತು. ಈ ವರ್ಷ 2,26,300 ಟನ್ ಗಳಿಗೆ ಕುಸಿದಿದೆ.

ಕೇರಳದಲ್ಲಿ 69,230 ಟನ್ ನಿಂದ 63,290 ಟನ್ ಗೆ, ತಮಿಳುನಾಡಿನಲ್ಲಿ 17,295 ಟನ್ ಗಳಿಂದ 16,560 ಟನ್ ಗಳಿಗೆ ಕಾಫಿ ಬೆಳೆ ಉತ್ಪಾದನೆ ಕುಸಿದಿದೆ. ತಾಪಮಾನ, ಹಿಂಗಾರು ಮಾರುತ ಕೊರತೆ, ತಡವಾಗಿ ಹೂವು ಬಿಟ್ಟಿರುವುದು ಇದಕ್ಕೆ ಕಾರಣ ಎಂದು ಕಾಫಿ ಮಂಡಳಿ ತನ್ನ ಹೇಳಿಕೆಯಲ್ಲಿ ತಿಳಿಸಿದೆ.