ಮುಖೇಶ್ ಅಂಬಾನಿಯನ್ನು ಹಿಂದಿಕ್ಕಿದ ಚೀನಾ ಪಾನೀಯ ಕಂಪನಿ ದೊರೆ ಜಾಂಗ್ ಶನ್ಶನ್ ಈಗ 'ಏಷ್ಯಾದ ಅತ್ಯಂತ ಶ್ರೀಮಂತ'!

ಬೀಜಿಂಗ್: ಚೀನಾದ ಬಿಲಿಯನೇರ್ ಉದ್ಯಮಿ ಜಾಂಗ್ ಶನ್ಶನ್ ಇದೀಗ ಏಷ್ಯಾದ ಅತ್ಯಂತ ಶ್ರೀಮಂತನ ಪಟ್ಟಕ್ಕೇರಿದ್ದಾರೆ. ಭಾರತದ ಮುಖೇಶ್ ಅಂಬಾನಿ, ತಮ್ಮದೇ ದೇಶದ ಜಾಕ್ ಮಾ ಅವರನ್ನೂ ಹಿಂದಿಕ್ಕಿ ಈ ಸ್ಥಾನ ಅಲಂಕರಿಸಿದ್ದಾರೆ.

66 ವರ್ಷದ ಜಾಂಗ್ ಅವರ ನಿವ್ವಳ ಆಸ್ತಿ ಮೌಲ್ಯವು 2020 ರಲ್ಲಿ 70.9 ಬಿಲಿಯನ್ ಡಾಲರ್‌ಗಳಷ್ಟು ಏರಿಕೆಯಾಗಿ77.8 ಬಿಲಿಯನ್ ಡಾಲರ್‌ಗೆ ತಲುಪಿದೆ ಎಂದು ಬ್ಲೂಮ್‌ಬರ್ಗ್ ಬಿಲಿಯನೇರ್ಸ್ ಸೂಚ್ಯಂಕ ಹೇಳಿದೆ.  ಈ ಪ್ರಕಾರ ಜಾಂಗ್ ಇದೀಗ ವಿಶ್ವದ 11 ನೇ ಶ್ರೀಮಂತ ವ್ಯಕ್ತಿ.

ಜಾಂಗ್ ಚೀನಾದ ಅತಿದೊಡ್ಡ ಪಾನೀಯ ಕಂಪನಿಯಾದ  'ನಾಂಗ್‌ಫು ಸ್ಪ್ರಿಂಗ್ ಕಂಪನಿ' ಸ್ಥಾಪಿಸಿದರು. ಅವರು ಚೀನಾದ ಪ್ರಮುಖ ಫಾರ್ಮಾ ಸಂಸ್ಥೆಯಾಗಿರುವ  ವಾಂಟೈ ಬಯೋಲಾಜಿಕಲ್ ಫಾರ್ಮಸಿ ಯ ಮಾಲೀಕರೂ ಆಗಿದ್ದಾರೆ.

ಬಾಟಲಿ ನೀರಿನ ತಯಾರಕ ಸಂಸ್ಥೆ ನಾಂಗ್‌ಫು ಹಾಂಗ್ ಕಾಂಗ್‌ನ ಅತ್ಯುತ್ತಮ ಕಂಪನಿಗಳ ಪಟ್ಟಿಯಲ್ಲಿ ಸ್ಥಾನ ಪಡೆದಿದೆ. ಈ ಸಂಸ್ಥೆ ಷೇರುಪೇಟೆ ಪ್ರವೇಶಿಸಿದಾಗಿನಿಂದ ಶೇಕಡಾ 155 ರಷ್ಟು ಜಿಗಿತ ಕಂಡಿದೆ. ಲಸಿಕೆ ಕಂಪನಿಯ ಷೇರುಗಳು ಶೇಕಡಾ 2,000 ಕ್ಕಿಂತ ಹೆಚ್ಚಾಗಿದೆ. ನಾಂಗ್‌ಫು  ಸ್ಟಾಕ್ ಮಾರ್ಕೆಟ್ ಬ್ಲಾಕ್‌ಬಸ್ಟರ್ ಜಾಂಗ್ ಅವರ ಸ್ಥಾನವನ್ನು ಬಲಪಡಿಸಿತು. ಅವರ ಲಸಿಕೆ ತಯಾರಿಸುವ ಸಂಸ್ಥೆ ಕೋವಿಡ್ -19 ಲಸಿಕೆಗಳನ್ನು ಅಭಿವೃದ್ಧಿಪಡಿಸುವಲ್ಲಿ ಸಹ ತೊಡಗಿಸಿಕೊಂಡಿದೆ.

ರಿಲಯನ್ಸ್ ಇಂಡಸ್ಟ್ರೀಸ್ ಮಾಲೀಕ ಮುಖೇಶ್ ಅಂಬಾನಿ ಅವರ ಆಸ್ತಿ 76.9 ಬಿಲಿಯನ್ ಡಾಲರ್ ಆಗಿದೆ. ಜಾಗತಿಕವಾಗಿ, ಅವರು ಈಗ ವಿಶ್ವದ 12 ನೇ ಶ್ರೀಮಂತರಾಗಿದ್ದಾರೆ. ಅವರ ನಿವ್ವಳ ಮೌಲ್ಯವು 18.3 ಬಿಲಿಯನ್ ಡಾಲರ್ ಗಳಷ್ಟು ಹೆಚ್ಚಾಗಿದೆ.