ಫೆಮಾ ಉಲ್ಲಂಘನೆ: ಶಿಯೋಮಿಯ 5,551 ಕೋಟಿ ರೂ. ಜಪ್ತಿ ಆದೇಶ ಎತ್ತಿಹಿಡಿದ ಹೈಕೋರ್ಟ್

ಬೆಂಗಳೂರು: ವಿದೇಶಿ ವಿನಿಮಯ ನಿರ್ವಹಣಾ ಕಾಯ್ದೆ(ಫೆಮಾ) ಉಲ್ಲಂಘಿಸಿದ ಆರೋಪದ ಮೇಲೆ ಶಿಯೋಮಿ ಇಂಡಿಯಾದಿಂದ  5,551.27 ಕೋಟಿ ರೂಪಾಯಿ ವಶಪಡಿಸಿಕೊಂಡಿದ್ದ ಜಾರಿ ನಿರ್ದೇಶನಾಲಯದ ಕ್ರಮವನ್ನು ಕರ್ನಾಟಕ ಹೈಕೋರ್ಟ್ ಶುಕ್ರವಾರ ಎತ್ತಿಹಿಡಿದಿದೆ.

ಜಾರಿ ನಿರ್ದೇಶನಾಲಯ(ಇಡಿ) ಶಿಯೋಮಿ ಕಂಪನಿಯ ಬ್ಯಾಂಕ್ ಖಾತೆಗಳಿಂದ 5,551.27 ಕೋಟಿ ರೂಪಾಯಿ ವಶಪಡಿಸಿಕೊಂಡಿತ್ತು ಮತ್ತು ಇದನ್ನು ಇಡಿ ಸಕ್ಷಮ ಪ್ರಾಧಿಕಾರ ಎತ್ತಿಹಿಡಿದಿತ್ತು.

ಶಿಯೋಮಿ ಇಂಡಿಯಾ, ಸಕ್ಷಮ ಪ್ರಾಧಿಕಾರದ ಆದೇಶವನ್ನು ಪ್ರಶ್ನಿಸಿ ಹೈಕೋರ್ಟ್‌ನಲ್ಲಿ ಅರ್ಜಿ ಸಲ್ಲಿಸಿತ್ತು. ಅರ್ಜಿ ವಿಚಾರಣೆ ನಡೆಸಿದ ನ್ಯಾಯಮೂರ್ತಿ ಎಂ. ನಾಗಪ್ರಸನ್ನ ಅವರ ನ್ಯಾಯಪೀಠ ಇಡಿ ಕ್ರಮವನ್ನು ಎತ್ತಿ ಹಿಡಿದಿದ್ದು, ಫೆಮಾ ಸೆಕ್ಷನ್ 37 ಎ ಅಡಿಯಲ್ಲಿ ಶಿಯೋಮಿ ಅರ್ಜಿಯನ್ನು ವಜಾಗೊಳಿಸಿದ್ದಾರೆ.

ಇದನ್ನು ಓದಿ: Xiaomi ಯ 5,551 ಕೋಟಿ ರೂ. ವಶಪಡಿಸಿಕೊಳ್ಳಲು FEMA ಪ್ರಾಧಿಕಾರ ಅನುಮೋದಿಸಿದೆ: ಇಡಿ

ಫೆಮಾ ನಿಯಮಗಳನ್ನು ಉಲ್ಲಂಘಿಸಿ ಭಾರತದ ಹೊರಗಿನ ಮೂರು ಕಂಪನಿಗಳಿಗೆ ರಾಯಧನದ ಸೋಗಿನಲ್ಲಿ ಹಣವನ್ನು ವರ್ಗಾಯಿಸಿದ ಆರೋಪದ ಮೇಲೆ ಶಿಯೋಮಿ ಖಾತೆಗಳಲ್ಲಿನ ರೂ.5,551.27 ಕೋಟಿಗಳನ್ನು ವಶಪಡಿಸಿಕೊಳ್ಳಲು ಇಡಿ 2022 ರಲ್ಲಿ ಆದೇಶಿಸಿತ್ತು.