ದುಬಾರಿ ದುನಿಯಾ: ಪ್ರೀಮಿಯಂ ಪೆಟ್ರೋಲ್ ದರ, ಜೆಟ್ ಇಂಧನದ ಬೆಲೆ ಏರಿಕೆ; ದೇಶೀಯ ಏರ್ ಲೈನ್ಸ್ ಗಳ ರಕ್ಷಣೆಗೆ ಕೇಂದ್ರ ಸರ್ಕಾರ ಕ್ರಮ

ನವದೆಹಲಿ: ವಿಮಾನ ಟರ್ಬೈನ್ ಇಂಧನ (ATF) ಅಂದರೆ ಜೆಟ್ ಇಂಧನದ ಬೆಲೆ ಇಂದು ಬುಧವಾರ ದಾಖಲೆಯ ಮಟ್ಟಕ್ಕೆ ಏರಿಕೆಯಾಗಿ, ಪ್ರತಿ ಕಿಲೋ ಲಿಟರ್‌ಗೆ 2.07 ಲಕ್ಷ ರೂಪಾಯಿಗೆ ತಲುಪಿದೆ. ಆದರೆ ದೇಶೀಯ ವಿಮಾನಯಾನ ಸಂಸ್ಥೆಗಳು ಈ ಭಾರೀ ಏರಿಕೆಯನ್ನು ನೇರವಾಗಿ ಹೊರುವ ಅವಶ್ಯಕತೆ ಇಲ್ಲದಂತೆ ಒಂದು ವ್ಯವಸ್ಥೆ ರೂಪಿಸುವ ಕಾರ್ಯ ನಡೆಯುತ್ತಿದೆ.

ಇದರ ಜೊತೆಗೆ, ಪಶ್ಚಿಮ ಏಷ್ಯಾ ಸಂಘರ್ಷದಿಂದ ಜಾಗತಿಕ ತೈಲ ಬೆಲೆ ಏರಿಕೆಯ ಪರಿಣಾಮವಾಗಿ ವಾಣಿಜ್ಯ ಎಲ್‌ಪಿಜಿ ದರವನ್ನು ಪ್ರತಿ ಸಿಲಿಂಡರ್‌ಗೆ 195.50 ರೂಪಾಯಿ ಹೆಚ್ಚಿಸಲಾಗಿದೆ.

ದೆಹಲಿ ನಗರದಲ್ಲಿ ATF ದರವನ್ನು ಪ್ರತಿ ಕಿಲೋ ಲಿಟರ್‌ಗೆ 1,10,703.08 (114.5ಶೇಕಡಾ) ಹೆಚ್ಚಿಸಿ 2,07,341.22 ರೂಪಾಯಿಗೆ ಏರಿಸಲಾಗಿದೆ ಎಂದು ಸರ್ಕಾರಿ ತೈಲ ಮಾರಾಟ ಕಂಪನಿಗಳು ತಿಳಿಸಿವೆ.

ATF ಸಂಪೂರ್ಣವಾಗಿ ನಿಯಂತ್ರಣಮುಕ್ತ (ಡಿರೆಗ್ಯುಲೇಟೆಡ್) ಉತ್ಪನ್ನವಾಗಿದ್ದು, ಅಂತಾರಾಷ್ಟ್ರೀಯ ಮಾರುಕಟ್ಟೆ ಬೆಲೆಗಳನ್ನು ಆಧರಿಸಿ ದರ ನಿಗದಿ ಮಾಡಲಾಗುತ್ತದೆ. ಇದು ವಿಮಾನಯಾನ ಸಂಸ್ಥೆಗಳೊಂದಿಗೆ ಹೊಂದಾಣಿಕೆಯ ಒಪ್ಪಂದದ ಪ್ರಕಾರವಾಗಿದೆ.

ಈ ಹೊಸ ದರಗಳು ಇಂದು ಬುಧವಾರದಿಂದ ಭಾರತದಲ್ಲಿ ಇಂಧನ ತುಂಬಿಸಿಕೊಳ್ಳುವ ಎಲ್ಲಾ ಅಂತಾರಾಷ್ಟ್ರೀಯ ವಿಮಾನಗಳಿಗೆ ಅನ್ವಯವಾಗಲಿವೆ ಎಂದು ಕೈಗಾರಿಕಾ ಮೂಲಗಳು ತಿಳಿಸಿವೆ.

ಆದರೆ ದೇಶೀಯ ವಿಮಾನಯಾನ ಸಂಸ್ಥೆಗಳು ಈ ಭಾರೀ ದರ ಏರಿಕೆಯನ್ನು ಪೂರ್ತಿಯಾಗಿ ಪಾವತಿಸಬೇಕಾಗಿಲ್ಲ. ಅವುಗಳ ಮೇಲೆ ಸಂಪೂರ್ಣ ಭಾರ ಬೀಳದಂತೆ ಕ್ರಮ ಕೈಗೊಳ್ಳಲಾಗುತ್ತಿದೆ.

ದೇಶೀಯ ವಿಮಾನಗಳು ಎಷ್ಟು ಮೊತ್ತವನ್ನು ಪಾವತಿಸಬೇಕಾಗುತ್ತದೆ ಮತ್ತು ಎಷ್ಟು ಮೊತ್ತವನ್ನು ಸರ್ಕಾರ ಅಥವಾ ಇತರ ವ್ಯವಸ್ಥೆಗಳ ಮೂಲಕ ಭರಿಸಲಾಗುತ್ತದೆ ಎಂಬುದು ಇನ್ನೂ ಸ್ಪಷ್ಟವಾಗಿಲ್ಲ. ಈ ಕುರಿತು ಯಾವುದೇ ಅಧಿಕೃತ ಘೋಷಣೆ ಇನ್ನೂ ಹೊರಬಂದಿಲ್ಲ.

ಇದು ATF ದರವು ಮೊದಲ ಬಾರಿಗೆ ಪ್ರತಿ ಕಿಲೋಲಿಟರ್‌ಗೆ 2 ಲಕ್ಷ ರೂಪಾಯಿ ಗಡಿ ದಾಟಿರುವ ಸಂದರ್ಭವಾಗಿದೆ. ಹಿಂದಿನ ಗರಿಷ್ಠ ದರವು 2022ರಲ್ಲಿ ರಷ್ಯಾ ಉಕ್ರೇನ್ ಮೇಲೆ ದಾಳಿ ಮಾಡಿದ ಬಳಿಕ ತೈಲ ಬೆಲೆ ಏರಿಕೆಯಿಂದ 1.1 ಲಕ್ಷ ರೂಪಾಯಿಗೆ ಪ್ರತಿ ಕಿಲೋಲಿಟರ್ ಆಗಿತ್ತು.

ಇದು ಈ ತಿಂಗಳ ಎರಡನೇ ದರ ಏರಿಕೆಯಾಗಿದೆ. ಮಾರ್ಚ್ 1ರಂದು ದರವನ್ನು 5.7 ಶೇಕಡಾ (5,244.75 ರೂಪಾಯಿ ಪ್ರತಿ ಕಿಲೋಲಿಟರ್) ಹೆಚ್ಚಿಸಲಾಗಿತ್ತು.

ಯುದ್ಧದ ಕಾರಣದಿಂದ ಕೆಲವು ವಾಯುಪ್ರದೇಶಗಳು ಮುಚ್ಚಲ್ಪಟ್ಟಿರುವುದರಿಂದ ಪಾಶ್ಚಾತ್ಯ ದೇಶಗಳಿಗೆ ವಿಮಾನಗಳು ಉದ್ದ ಮಾರ್ಗಗಳನ್ನು ಬಳಸಬೇಕಾಗುತ್ತಿದೆ. ಇದರಿಂದ ಇಂಧನ ಬಳಕೆ ಹೆಚ್ಚಾಗಿ, ಈಗಿನ ದರ ಏರಿಕೆ ವಿಮಾನಯಾನ ಸಂಸ್ಥೆಗಳ ಮೇಲೆ ಹೆಚ್ಚುವರಿ ಒತ್ತಡವನ್ನು ಉಂಟುಮಾಡಲಿದೆ.

ಸಾಮಾನ್ಯವಾಗಿ, ಇಂಧನ ವೆಚ್ಚವು ವಿಮಾನಯಾನ ಸಂಸ್ಥೆಗಳ ಒಟ್ಟು ಕಾರ್ಯಾಚರಣೆ ವೆಚ್ಚದ ಸುಮಾರು 40 ಶೇಕಡಾ ಭಾಗವನ್ನು ಹೊಂದಿರುತ್ತದೆ.

ಪ್ರೀಮಿಯಂ ಪೆಟ್ರೋಲ್, ಡೀಸೆಲ್ ದರ ಏರಿಕೆ
XP100 ಪೆಟ್ರೋಲ್ ದರವನ್ನು ಲೀಟರ್‌ಗೆ 149 ರೂಪಾಯಿಗಳಿಂದ160 ರೂಪಾಯಿಗೆ ಹೆಚ್ಚಿಸಲಾಗಿದೆ. Xtra Green ಪ್ರೀಮಿಯಂ ಡೀಸೆಲ್ ದರವನ್ನು 91.49 ರೂಪಾಯಿಗಳಿಂದ 92.99 ರೂಪಾಯಿಗೆ ಏರಿಸಲಾಗಿದೆ. XP100 ಒಂದು 100-ಆಕ್ಟೇನ್ ಪೆಟ್ರೋಲ್ ಆಗಿದ್ದು, ಉತ್ತಮ ಎಂಜಿನ್ ಕಾರ್ಯಕ್ಷಮತೆಗಾಗಿ ಹೈ-ಎಂಡ್ ಕಾರುಗಳು ಮತ್ತು ಸೂಪರ್ ಬೈಕ್‌ಗಳಿಗೆ ಬಳಸಲಾಗುತ್ತದೆ.

ಈ ದರ ಏರಿಕೆಯ ಬಗ್ಗೆ ಇಂಡಿಯನ್ ಆಯಿಲ್ ಯಾವುದೇ ಅಧಿಕೃತ ಕಾರಣ ನೀಡಿಲ್ಲ. ಮಧ್ಯಪ್ರಾಚ್ಯದ ಸಂಘರ್ಷ ಮತ್ತು ಸರಬರಾಜು ವ್ಯತ್ಯಯದಿಂದ ಜಾಗತಿಕ ತೈಲ ಮತ್ತು ಇಂಧನ ದರಗಳು ಏರಿಕೆಯಾದ ಹಿನ್ನೆಲೆಯಲ್ಲಿ ಈ ನಿರ್ಧಾರ ಕೈಗೊಳ್ಳಲಾಗಿದೆ.

ಇದಕ್ಕೂ ಮೊದಲು, ಮಾರ್ಚ್ 27ರಂದು ಸರ್ಕಾರ ಸಾಮಾನ್ಯ ಪೆಟ್ರೋಲ್ ಮತ್ತು ಡೀಸೆಲ್ ಮೇಲೆ ಲೀಟರ್‌ಗೆ 10 ರೂಪಾಯಿ ಅಬಕಾರಿ ಸುಂಕ ಕಡಿತ ಮಾಡಿತ್ತು. ಇದರಿಂದ ಜಾಗತಿಕ ದರ ಏರಿಕೆಯ ನಡುವೆಯೂ ಸಾಮಾನ್ಯ ಪಂಪ್ ದರಗಳನ್ನು ಸ್ಥಿರವಾಗಿಡಲು ತೈಲ ಕಂಪನಿಗಳಿಗೆ ಸಹಾಯವಾಯಿತು.