Home Loan: ಸ್ವಂತ ಮನೆ ಕೊಳ್ಳುವ ಕನಸು ಪ್ರತಿಯೊಬ್ಬರಿಗೂ ಇರುತ್ತದೆ. ಸೂರ್ಯ ಮುಳುಗುವ ಹೊತ್ತಿಗೆ ತಮ್ಮದೇ ಆದ ಮನೆಯ ಬಾಗಿಲು ತೆರೆಯುವ ಖುಷಿಯೇ ಬೇರೆ. ಆದರೆ ಬೆಂಗಳೂರಿನಂತಹ ನಗರಗಳಲ್ಲಿ ಮನೆ ಬೆಲೆ ಆಕಾಶ ಮುಟ್ಟುತ್ತಿರುವ ಈಗಿನ ಕಾಲದಲ್ಲಿ ಕೈಯಲ್ಲಿರುವ ಹಣದಲ್ಲಿ ಮನೆ ಕೊಳ್ಳುವುದು ಸುಲಭವಲ್ಲ. ಹೀಗಾಗಿ ಹೋಮ್ ಲೋನ್ ಇಲ್ಲದೆ ಮನೆ ಕೊಳ್ಳುವ ಮಾತೇ ಇಲ್ಲ. ನೀವು ಬ್ಯಾಂಕ್ ಮೆಟ್ಟಿಲು ಹತ್ತಿದಾಗ ಬ್ಯಾಂಕ್ ಮ್ಯಾನೇಜರ್ ಮೊದಲು ಕೇಳುವುದು ನಿಮ್ಮ ಸಂಬಳ ಎಷ್ಟು ಎಂದು ಅಲ್ಲ, ನಿಮ್ಮ ಸಿಬಿಲ್ ಸ್ಕೋರ್ ಎಷ್ಟು ಎಂದು. ನಿಮ್ಮ ಸಿಬಿಲ್ ಸ್ಕೋರ್ ಒಂದು ರೀತಿಯಲ್ಲಿ ನಿಮ್ಮ ಹಣಕಾಸಿನ ಮಾರ್ಕ್ಸ್ ಕಾರ್ಡ್ ಇದ್ದಂತೆ. ಈ ಮಾರ್ಕ್ಸ್ ಕಾರ್ಡ್ ಚೆನ್ನಾಗಿದ್ದರೆ ಮಾತ್ರ ನಿಮಗೆ ಕಡಿಮೆ ಬಡ್ಡಿದರದಲ್ಲಿ ಲಕ್ಷಾಂತರ ರೂಪಾಯಿ ಲೋನ್ ಸಿಗುತ್ತದೆ. ಇಲ್ಲದಿದ್ದರೆ ಲೋನ್ ರಿಜೆಕ್ಟ್ ಆಗಬಹುದು ಅಥವಾ ಹೆಚ್ಚಿನ ಬಡ್ಡಿ ಕಟ್ಟಬೇಕಾಗುತ್ತದೆ. ಹಾಗಾದರೆ ಕಡಿಮೆ ಬಡ್ಡಿಗೆ ಮನೆ ಸಾಲ ಪಡೆಯಲು ನಿಮ್ಮ ಸಿಬಿಲ್ ಸ್ಕೋರ್ ಕನಿಷ್ಠ ಎಷ್ಟಿರಬೇಕು ಮತ್ತು ಅದನ್ನು ಹೆಚ್ಚಿಸಿಕೊಳ್ಳುವುದು ಹೇಗೆ ಎಂಬ ಸಂಪೂರ್ಣ ಮಾಹಿತಿ ಇಲ್ಲಿದೆ.
ಹೋಮ್ ಲೋನ್‌ಗೆ ಎಷ್ಟು ಸಿಬಿಲ್ ಸ್ಕೋರ್ ಇರಬೇಕು?
ಸಿಬಿಲ್ ಸ್ಕೋರ್ 300 ರಿಂದ 900 ರ ನಡುವೆ ಇರುತ್ತದೆ. ನಿಮ್ಮ ಸ್ಕೋರ್ ಎಷ್ಟು ಹೆಚ್ಚಿರುತ್ತದೆಯೋ, ಅಷ್ಟು ಕಡಿಮೆ ಬಡ್ಡಿದರದಲ್ಲಿ ಸಾಲ ಸಿಗುವ ಅವಕಾಶ ಇರುತ್ತದೆ:
750 ರಿಂದ 900 (ಅತ್ಯುತ್ತಮ): ನಿಮ್ಮ ಸ್ಕೋರ್ ಈ ವ್ಯಾಪ್ತಿಯಲ್ಲಿದ್ದರೆ ಬ್ಯಾಂಕುಗಳು ನಿಮ್ಮನ್ನು 'ಕಡಿಮೆ ಅಪಾಯದ ಗ್ರಾಹಕ' ಎಂದು ಪರಿಗಣಿಸುತ್ತವೆ. ಹೀಗಾಗಿ ನಿಮಗೆ ಮಾರುಕಟ್ಟೆಯಲ್ಲಿ ಲಭ್ಯವಿರುವ ಅತಿ ಕಡಿಮೆ ಬಡ್ಡಿದರದಲ್ಲಿ (ಪ್ರಸ್ತುತ ಸುಮಾರು ಶೇ. 8.40 ರಿಂದ 8.75) ಸಾಲ ಸಿಗುತ್ತದೆ. ಜೊತೆಗೆ ಲೋನ್ ಪ್ರೊಸೆಸಿಂಗ್ ಫೀಸ್‌ನಲ್ಲೂ ರಿಯಾಯಿತಿ ಸಿಗಬಹುದು.
700 ರಿಂದ 749 (ಉತ್ತಮ): ಈ ಸ್ಕೋರ್ ಇದ್ದವರಿಗೂ ಸಾಲ ಸುಲಭವಾಗಿ ಸಿಗುತ್ತದೆ. ಆದರೆ ಅತ್ಯುತ್ತಮ ಸ್ಕೋರ್ ಇದ್ದವರಿಗಿಂತ ಶೇ. 0.25 ರಿಂದ 0.50 ರಷ್ಟು ಹೆಚ್ಚಿನ ಬಡ್ಡಿ ವಿಧಿಸುವ ಸಾಧ್ಯತೆ ಇರುತ್ತದೆ.
650 ರಿಂದ 699 (ಸಾಧಾರಣ): ಇಲ್ಲಿ ಸಾಲದ ಅನುಮೋದನೆ ಸಿಗುವುದು ಕಷ್ಟ ಹಾಗೂ ಬ್ಯಾಂಕುಗಳು ಭಾರಿ ಕಟ್ಟುನಿಟ್ಟಿನ ನಿಯಮಗಳನ್ನು ಅನ್ವಯಿಸುತ್ತವೆ. ಬಡ್ಡಿದರವೂ ತೀರಾ ಹೆಚ್ಚಿರುತ್ತದೆ.
650 ಕ್ಕಿಂತ ಕಡಿಮೆ (ಕಳಪೆ): ಈ ಹಂತದಲ್ಲಿ ಬಹುತೇಕ ರಾಷ್ಟ್ರೀಕೃತ ಬ್ಯಾಂಕುಗಳು ಹೋಮ್ ಲೋನ್ ಅರ್ಜಿಯನ್ನು ತಿರಸ್ಕರಿಸುತ್ತವೆ. ಖಾಸಗಿ ಫೈನಾನ್ಸ್ ಕಂಪನಿಗಳು ಸಾಲ ನೀಡಿದರೂ ಬಡ್ಡಿದರ ಶೇ. 12 ಕ್ಕಿಂತ ಹೆಚ್ಚಿರುತ್ತದೆ.
ಉತ್ತಮ ಸಿಬಿಲ್ ಸ್ಕೋರ್ ಹೊಂದಿದ್ದರೆ ಸಿಗುವ ಲಾಭಗಳೇನು?
ಬಡ್ಡಿದರದಲ್ಲಿ ರಿಯಾಯಿತಿ: ಉತ್ತಮ ಸ್ಕೋರ್ ಇದ್ದರೆ ಬ್ಯಾಂಕ್‌ಗಳೊಂದಿಗೆ ಮಾತುಕತೆ ನಡೆಸಿ ಬಡ್ಡಿದರವನ್ನು ಕಡಿಮೆ ಮಾಡಿಕೊಳ್ಳಬಹುದು.
ಹೆಚ್ಚಿನ ಸಾಲದ ಮೊತ್ತ: ನಿಮ್ಮ ಆದಾಯಕ್ಕೆ ಅನುಗುಣವಾಗಿ ಬ್ಯಾಂಕ್‌ಗಳು ಗರಿಷ್ಠ ಮೌಲ್ಯದ ಸಾಲವನ್ನು ನೀಡಲು ಒಪ್ಪುತ್ತವೆ.
ಲೋನ್ ಪ್ರೊಸೆಸಿಂಗ್ ಫೀಸ್ ಮನ್ನಾ: ಹಬ್ಬ ಹರಿದಿನಗಳ ಆಫರ್ ಸಮಯದಲ್ಲಿ ಉತ್ತಮ ಸ್ಕೋರ್ ಉಳ್ಳವರಿಗೆ ಪ್ರೊಸೆಸಿಂಗ್ ಶುಲ್ಕವನ್ನು ಸಂಪೂರ್ಣವಾಗಿ ಮನ್ನಾ ಮಾಡಲಾಗುತ್ತದೆ.
ಹಾಗಾದ್ರೆ, ಸಿಬಿಲ್ ಸ್ಕೋರ್ ಹೆಚ್ಚಿಸಿಕೊಳ್ಳುವುದು ಹೇಗೆ?
ಇಎಂಐ ಸಕಾಲಕ್ಕೆ ಪಾವತಿಸಿ: ನಿಮ್ಮ ಅಸ್ತಿತ್ವದಲ್ಲಿರುವ ಯಾವುದೇ ಸಾಲದ ಇಎಂಐ ಅಥವಾ ಕ್ರೆಡಿಟ್ ಕಾರ್ಡ್ ಬಿಲ್‌ಗಳನ್ನು ನಿಗದಿತ ದಿನಾಂಕದೊಳಗೆ ತಪ್ಪದೇ ಪಾವತಿಸಿ.
ಕ್ರೆಡಿಟ್ ಬಳಕೆ ಮಿತಿ: ಕ್ರೆಡಿಟ್ ಕಾರ್ಡ್ ಮಿತಿಯ ಶೇ. 30 ಕ್ಕಿಂತ ಹೆಚ್ಚು ಬಳಸಬೇಡಿ.
ಹಲವಾರು ಸಾಲಗಳಿಗೆ ಒಂದೇ ಬಾರಿ ಅರ್ಜಿ ಹಾಕಬೇಡಿ: ಅಲ್ಪಾವಧಿಯಲ್ಲಿ ಹಲವು ಬ್ಯಾಂಕ್‌ಗಳಲ್ಲಿ ಸಾಲಕ್ಕಾಗಿ ಅರ್ಜಿ ಸಲ್ಲಿಸಿದರೆ ಸಿಬಿಲ್ ಸ್ಕೋರ್ ಕಡಿಮೆಯಾಗುತ್ತದೆ.
ಆದ್ದರಿಂದ, ನೀವು ಹೋಮ್ ಲೋನ್‌ಗೆ ಅರ್ಜಿ ಸಲ್ಲಿಸುವ ಕನಿಷ್ಠ 6 ತಿಂಗಳ ಮುಂಚಿತವಾಗಿಯೇ ನಿಮ್ಮ ಸಿಬಿಲ್ ಸ್ಕೋರ್ ಅನ್ನು 750 ಕ್ಕಿಂತ ಹೆಚ್ಚು ಕಾಯ್ದುಕೊಳ್ಳಲು ಪ್ರಯತ್ನಿಸಿ. ಇದರಿಂದ ನಿಮಗೆ ಲಕ್ಷಾಂತರ ರೂಪಾಯಿಗಳ ಬಡ್ಡಿ ಹಣ ಉಳಿತಾಯವಾಗುತ್ತದೆ.
