ನವದೆಹಲಿ: ಜನಪ್ರಿಯ ಟೀವಿ ಶೋ ಕಾಮಿಡಿ ನೈಟ್ಸ್ ವಿಥ್ ಕಪಿಲ್ ನಲ್ಲಿ ದೇರಾ ಸಚಾ ಸೌದಾ ಮುಖ್ಯಸ್ಥ ಗುರ್ಮೀತ್ ರಾಮ್ ರಹೀಂ ಸಿಂಗ್ ಅವರನ್ನು ಅನುಕರಣೆ ಮಾಡಿದುದಕ್ಕಾಗಿ ನಟ ಕಿಕೂ ಶಾರ್ದಾ ಅವರಿಗೆ ನ್ಯಾಯಾಂಗ ಬಂಧನ ವಿಧಿಸಲಾಗಿದೆ .
ಕಾಮಿಡಿ ನೈಟ್ಸ್ ವಿಥ್ ಕಪಿಲ್ನಲ್ಲಿ ಪಲಕ್ ಪಾತ್ರ ನಿರ್ವಹಿಸುತ್ತಿರುವ ಕಿಕೂ ಡಿಸೆಂಬರ್ 27, 2015ರಲ್ಲಿ ಪ್ರಸಾರವಾದ ಕಾರ್ಯಕ್ರಮದಲ್ಲಿ ಗುರ್ಮೀತ್ ಅವರ ಅವರನ್ನು ಅನುಕರಣೆ ಮಾಡಿದ್ದರು. ಈ ಅನುಕರಣೆಯ ಬಗ್ಗೆ ಗುರ್ಮೀತ್ ಅನುಯಾಯಿಗಳು ಆಕ್ಷೇಪ ವ್ಯಕ್ತ ಪಡಿಸಿ ದೂರು ನೀಡಿದ್ದರು.
ಇದೀಗ ಕಿಕೂ ಅವರ ವಿರುದ್ಧ ಭಾರತೀಯ ದಂಡ ಸಂಹಿತೆ ಸೆಕ್ಷನ್ 295 ಎ ಅಡಿಯಲ್ಲಿ, ಧಾರ್ಮಿಕ ನಂಬಿಕೆಗೆ ಧಕ್ಕೆ ತಂದಿರುವ ಆರೋಪದಲ್ಲಿ ಕೇಸು ದಾಖಲಿಸಲಾಗಿದೆ.
ಈ ಶೋ ಪ್ರಸಾರವಾದ ಮರುದಿನ ಕಿಕೂ ಅವರು ತಮ್ಮ ಟ್ವಿಟರ್ ನಲ್ಲಿ, ಸ್ನೇಹಿತರೇ ಈ ಶೋ ನಿಮ್ಮ ಭಾವನೆಗಳಿಗೆ ಧಕ್ಕೆ ತಂದಿದ್ದರೆ ನಾನು ಗುರ್ಮೀತ್ರಾಮ್ ರಹೀಂ ಜಿ ಅವರಲ್ಲಿ ಮತ್ತು ಅನುಯಾಯಿಗಳಲ್ಲಿ ಕ್ಷಮೆ ಕೇಳುತ್ತೇನೆ. ಸಂತೋಷನನ್ನು ಪಸರಿಸೋಣ ಎಂದು ಬರೆದಿದ್ದರು.
