'ತಾರಕಾಸುರ' ಸಿನೆಮಾದಲ್ಲಿ ಖಳನಾಯಕನಾಗಿ ಬ್ರಿಟಿಷ್ ನಟ

ಬೆಂಗಳೂರು: ಸಿನೆಮಾದ ಬಜೆಟ್ ನ ಬಹುತೇಕ ಭಾಗವನ್ನು ಹೀರೋಗಳಿಗೆ ವಿನಿಯೋಗಿಸುವ ಚಿತ್ರರಂಗದಲ್ಲಿ, ಈಗ ಖಳನಾಯಕನಿಗೆ ಭಾರಿ ಹೂಡಿಕೆ ಮಾಡಿರುವ ಪ್ರಯತ್ನ ಕನ್ನಡ ಚಿತ್ರರಂಗದಲ್ಲಿ ಜರುಗಿದೆ. 

ನಿರ್ದೇಶಕ ಚಂದ್ರಶೇಖರ್ ಬಂಡಿಯಪ್ಪ ತಮ್ಮ ಮುಂದಿನ ಚಿತ್ರಕ್ಕೆ ಹಾಲಿವುಡ್ ನಟನನ್ನು ಕರೆತಂದಿದ್ದಾರೆ. ಈ ಸಿನೆಮಾದಲ್ಲಿ ಖಳನಾಯಕನಾಗಿ ಕಾಣಿಸಿಕೊಳ್ಳಲಿರುವ ಬ್ರಿಟಿಷ್ ನಟ ಡ್ಯಾನಿ ಸಪಾನಿ ಅವರಿಗೆ ನೀಡಲಿರುವ ಹಣ ಬರ್ರೋಬರ್ರಿ ೧ ಕೋಟಿ!

ಹಲವು ಸಿನೆಮಾಗಳಲ್ಲಿ, ಟೆಲಿ ಧಾರಾವಾಹಿಗಳಲ್ಲಿ ನಟಿಸಿರುವ ಈ ನಟ ಈ ಹಿಂದೆ ತಮಿಳು ಸಿನೆಮಾ 'ಸಿಂಗಂ ೨' ಮೂಲಕ ಭಾರತೀಯ ಚಿತ್ರರಂಗಕ್ಕೆ ಪಾದಾರ್ಪಣೆ ಮಾಡಿದ್ದರು. ಈಗ ಸ್ಯಾಂಡಲ್ ವುಡ್ ನಲ್ಲಿ ಅವರು ಚೊಚ್ಚಲ ನಟ ವೈಭವ್ ಎದುರು ಸೆಣಸಲಿದ್ದಾರೆ. 

ಜೂನ್ ೫ ರಂದು ಚಿತ್ರೀಕರಣ ಪ್ರಾರಂಭವಾಗಲಿದ್ದು, ಡ್ಯಾನಿ ಅಂದೇ ಸೆಟ್ ಸೇರಲಿದ್ದಾರೆ. "ನಮಗೆ ರಾಕ್ಷಸನ ಕಳೆ ಹೊಂದಿರುವ ನಟನ ಅವಶ್ಯಕತೆ ಇತ್ತು. ಇದಕ್ಕೆ ಡ್ಯಾನಿ ಬಹಳವಾಗಿ ಹೊಂದಿಕೊಳ್ಳುತ್ತಾರೆ. ಅಲ್ಲದೆ ನಮಗೆ ತಾಜಾ ಮುಖವೊಂದನ್ನು ತೊಡಗಿಸಿಕೊಳ್ಳಬೇಕಿತ್ತು. ಅವರಿಗೆ ಕೊಟ್ಟಿರುವ ಪ್ರತಿ ಪೈಸೆಗೂ ಅವರು ಅರ್ಹ" ಎನ್ನುತ್ತಾರೆ ಈ ಆಯ್ಕೆಯ ಬಗ್ಗೆ ಭರವಸೆ ಹೊಂದಿರುವ ಬಂಡಿಯಪ್ಪ.