ಅದ್ದೂರಿ-2 ಗಾಗಿ 8-ಪ್ಯಾಕ್ ಗೆ ನಿರಂಜನ್ ಸಿದ್ಧತೆ!

ಬೆಂಗಳೂರು: "ಅದ್ದೂರಿ-2" ಗಾಗಿ ನಾಯಕ ನಿರಂಜನ್ ಸುಧೀಂದ್ರ ಸಾಕಷ್ಟು ಕಸರತ್ತು ಮಾಡುತ್ತಿದ್ದಾರೆ. ರಮೇಶ್ ವೆಂಕಟೇಶಬಾಬು ನಿರ್ದೇಶನದ ಈ ಚಿತ್ರಕ್ಕಾಗಿ ನಿರಂಜನ್ ತಾವು ತಮ್ಮ ದೇಹವನ್ನು 8 -ಪ್ಯಾಕ್ಗೆ ತರಲು ಮುಂದಾಗಿದ್ದಾರೆ.

ಈ ಚಿತ್ರದಲ್ಲಿ ಮೂರು ವಿಭಿನ್ನ ಶೇಡ್ ಗಳಲ್ಲಿ ನಿರಂಜನ್ ಕಾಣಿಸಲಿದ್ದಾರೆ. ಒಂದು ಶಾಲಾ ವಿದ್ಯಾರ್ಥಿಯಾಗಿ, ಇನ್ನೊಂದು 20-25ರ ಯುವಕನಾಗಿ ಹಾಗೂ ಕಡೆಯದಾಗಿ ಮತ್ತಷ್ಟು ಬಲಿಷ್ಟ ವ್ಯಕ್ತಿಯಾಗಿ ನಿರಂಜನ್ ತೆರೆ ಮೇಲೆ ಬರಲಿದ್ದಾರೆ. ಕಡೆಯ ಶೇಡ್ ನ ಪಾತ್ರಕ್ಕಾಘಿ ನಿರಂಜನ್ ತಮ್ಮ ದೇಹದಾರ್ಷ್ಯವನ್ನು ಹೆಚ್ಚಿಸಿಕೊಳ್ಳುವುದು ಅನಿವಾರ್ಯವಿದೆ ಎಂದು ನಿರ್ದೇಶಕರು ಅಭಿಪ್ರಾಯಪಟ್ಟಿದ್ದಾರೆ.

ಮೋಹನ್ ಜತೆಯಾಗಿ ಸಿಎಂಆರ್ ಪ್ರೊಡಕ್ಷನ್ಸ್ ಲಾಛನದಲ್ಲಿ ಶಂಕರ್ ರೆಡ್ಡಿ ಈ ಚಿತ್ರಕ್ಕೆ ಬಂಡವಾಳ ಹೂಡಿದ್ದಾರೆ. ನಿರಂಜನ್ ಈ ಹಿಂದೆ 2012ರಲ್ಲಿ ತೆರೆಕಂಡ "ಅದ್ದೂರಿ"ಯಲ್ಲಿ ದ್ರುವ ಸರ್ಜಾ ಜತೆ ತೆರೆ ಹಂಚಿಕೊಂಡಿದ್ದರು. ಆದರೆ ಈಗ "ಅದ್ದೂರಿ- 2" ಹೆಸರಿನ ಚಿತ್ರದಲ್ಲಿ ನಾಯಕ ನಟನಾಗಿ ಮಿಂಚುತ್ತಿದ್ದಾರೆ. ಹಾಗೆಯೇ ಈ ಚಿತ್ರಕ್ಕೆ ಮೊದಲಿನ ಚಿತ್ರಕ್ಕೂ ಯಾವ ಸಂಬಂಧವಿಲ್ಲ ಎಂದು ನಿರ್ದ್ಶಕ ರಮೇಶ್ ಹೇಳಿದ್ದಾರೆ.

ಚಿತ್ರತಂಡ ಜೂನ್ 10ಕ್ಕೆ ಚಿತ್ರದ ಮಹೂರ್ತ ನಿಗದಿಪಡಿಸಿದೆ. ಈ ಚಿತ್ರವನ್ನು ಕನ್ನಡದಲ್ಲಷ್ಟೇ ಅಲ್ಲದೆ ತಮಿಳು, ತೆಲುಗು, ಮಲಯಾಳಂ ಹಾಗೂ ಹಿಂದಿಯಲ್ಲಿ ಡಬ್ ಮಾಡಿ ಏಕಕಾಲಕ್ಕೆ ಬಿಡುಗಡೆ ಮಾಡಲು ನಿರ್ಮಾಪಕರು ಯೋಜಿಸಿದ್ದಾರೆ.ರಾಘವೇಂದ್ರ ವಿ. ಈ ಚಿತ್ರಕ್ಕೆ ಸಂಗೀತ ನೀಡಿದ್ದರೆ ಹೈದರಾಬಾದ್ ನ ಯೋಗಿ ಈ ಚಿತ್ರದಛಾಯಾಗ್ರಹಣ ಮಾಡುತ್ತಿದ್ದಾರೆ.

ಇದೇ ವೇಳೆ ಚಿತ್ರಕ್ಕೆ ಮುಖ್ಯ ನಾಯಕಿಯ ಪಾತ್ರಕ್ಕಾಗಿ ನಟಿಯರ ಆಯ್ಕೆ ಇನ್ನೂ ನಡೆಯಬೇಕಿದ್ದು "ರನ್ ಆಂಟನಿ" ಖ್ಯಾತಿಯ ರೂಕ್ಷರ್ ಆಯ್ಕೆಯಾಗುವ ಸಾಧ್ಯತೆಗಳಿದೆ ಎನ್ನಲಾಗಿದೆ.