ಅಮ್ಮಚ್ಚಿ, ಅಕ್ಕು ಹಾಗೂ ಪುಟ್ಟಮ್ಮತ್ತೆ, ಈ ಮೂವರೂ ಯೌವನದ ಆಸೆ ಆಕಾಂಕ್ಷೆಗಳು, ತಮ್ಮದೇ ಆದ ಕನಸುಗಳನ್ನುಳ್ಳವರು. ಅವುಗಳನ್ನು ವ್ಯಕ್ತಪಡಿಸಿದ ಅಮ್ಮಚ್ಚಿ ಸೊಕ್ಕಿನವಳಾಗಿ, ಅಕ್ಕು ಹುಚ್ಚಿಯಾಗಿ ಮತ್ತು ಪುಟ್ಟಮ್ಮತ್ತೆ ನರೆದವಳಾಗಿ ಸಮಾಜಕ್ಕೆ ಕಂಡುಬರುತ್ತದೆ. ತನ್ನ ಜೀವನ ಸಂಗಾತಿಯನ್ನು ಆಯ್ಕೆ ಮಾಡಿಕೊಳ್ಳುವ ಹಕ್ಕು ಹೆಣ್ಣಿಗೆ ಯಾಕಿಲ್ಲ ಎಂಬುದು ಈ ಮೂವರ ಜೀವನದಲ್ಲೂ ಪ್ರಶ್ನೆಯಾಗಿಯೇ ಉಳಿಯುತ್ತದೆ ಎನ್ನುವುದು 80 ರ ದಶಕದ ಕಾಲಘಟ್ಟದ ಸಮಾಜದ ಪ್ರತಿಫಲನವಾಗುತ್ತದೆ. ಪುರುಷ ಪ್ರಧಾನ ಅಷ್ಟೇ ಅಲ್ಲ, ಪುರುಷ ಪ್ರಭುತ್ವವಿರುವ ಸಮಾಜ ಹೆಣ್ಣಿನ ಜೀವನದಲ್ಲಿ ಎಷ್ಟೆಲ್ಲ ಮೂಗು ತೂರಿಸುತ್ತದೆ ಮತ್ತು ಅವು ಹೆಣ್ಣಿನ ಮನದಲ್ಲಿ ಯಾವ ರೀತಿ ಅಸಹಾಯಕ, ಬೀಭತ್ಸ, ರೌದ್ರ, ಕರುಣಾ ಭಾವನೆಗಳನ್ನು ಉಂಟು ಮಾಡುತ್ತವೆ ಜೊತೆಗೆ ಅವ್ಯಾವುದಕ್ಕೂ ಎಲ್ಲೂ ಪ್ರಕಟಣೆಗೆ ಜಾಗವಿಲ್ಲದೆ ಉಸಿರುಗಟ್ಟಿಸುವ ಪರಿಸ್ಥಿತಿಗೆ ದೂಡುತ್ತದೆ ಎಂಬುದನ್ನು ನಿರ್ದೇಶಕಿ ಚಂಪಾ ಶೆಟ್ಟಿ ಅವರು ಲೇಖಕಿ ವೈದೇಹಿಯವರ ಆಶಯಕ್ಕೆ ತಕ್ಕಂತೆಯೇ ಮನಮುಟ್ಟುವಂತೆ ನಿರೂಪಿಸಿದ್ದಾರೆ.