ಅಮೇರಿಕಾ ಷೇರುಮಾರುಕಟ್ಟೆ ಕುಸಿತ ಖಚಿತ! (ಹಣಕ್ಲಾಸು)

ಅಮೆರಿಕದ ಷೇರು ಮಾರುಕಟ್ಟೆ (US Stock Market) ವಿಶ್ವದ ಅತಿದೊಡ್ಡ ಮತ್ತು ಅತ್ಯಂತ ಪ್ರಭಾವಶಾಲಿ ಹಣಕಾಸು ಮಾರುಕಟ್ಟೆಯಾಗಿದೆ. ಆದ್ದರಿಂದ ಅದರ ಏರಿಳಿತಗಳು ಅಮೆರಿಕಕ್ಕೆ ಮಾತ್ರ ಸೀಮಿತವಾಗದೆ ಭಾರತ ಸೇರಿದಂತೆ ಜಗತ್ತಿನ ಬಹುತೇಕ ರಾಷ್ಟ್ರಗಳ ಆರ್ಥಿಕತೆ ಮತ್ತು ಷೇರು ಮಾರುಕಟ್ಟೆಗಳ ಮೇಲೂ ಪರಿಣಾಮ ಬೀರುತ್ತವೆ. ಭವಿಷ್ಯದಲ್ಲಿ, ಈ ಭವಿಷ್ಯ ಎನ್ನುವುದು ಯಾವಾಗ ಬೇಕಾದರೂ ಎಂದು ಕೂಡ ಓದಿ ಕೊಳ್ಳಬಹುದು.

ಹೀಗೆ ಅಮೆರಿಕದ ಷೇರು ಮಾರುಕಟ್ಟೆ ಕುಸಿದರೆ ಅದಕ್ಕೆ ಒಂದೇ ಕಾರಣ ಇರುವುದಿಲ್ಲ. ಅದಕ್ಕೆ ಹಲವು ಕಾರಣಗಳಿರುತ್ತವೆ. ಈ ಕಾರಣಗಳನ್ನು ಅರ್ಥಮಾಡಿಕೊಳ್ಳುವುದು ಪ್ರತಿಯೊಬ್ಬ ಹೂಡಿಕೆದಾರನಿಗೂ ಬಹಳ ಮುಖ್ಯ. ನಾವು ಅಮೆರಿಕಾದ ಮಾರುಕಟ್ಟೆಯಲ್ಲಿ ಹೂಡಿಕೆ ಮಾಡಿಲ್ಲ ಎನ್ನುವ ಹೂಡಿಕೆದಾರರು ಕೂಡ ಮಾಹಿತಿಯನ್ನು ತಿಳಿದುಕೊಂಡಿರಬೇಕು.

ಮೊದಲನೆಯದಾಗಿ, ಅಮೆರಿಕದ ಕೇಂದ್ರ ಬ್ಯಾಂಕ್ ಆದ ಫೆಡರಲ್ ರಿಸರ್ವ್ (Federal Reserve) ಹಣದುಬ್ಬರವನ್ನು ನಿಯಂತ್ರಿಸಲು ಬಡ್ಡಿದರಗಳನ್ನು ನಿರಂತರವಾಗಿ ಹೆಚ್ಚಿಸಿದರೆ, ಕಂಪನಿಗಳು ಮತ್ತು ಗ್ರಾಹಕರ ಸಾಲದ ವೆಚ್ಚ ಹೆಚ್ಚಾಗುತ್ತದೆ. ಮನೆ, ವಾಹನ ಮತ್ತು ಉದ್ಯಮ ಸಾಲಗಳು ದುಬಾರಿಯಾಗುವುದರಿಂದ ಹೊಸ ಹೂಡಿಕೆಗಳು ಕಡಿಮೆಯಾಗುತ್ತವೆ.

ಇದರಿಂದ ಉತ್ಪಾದನೆ, ಮಾರಾಟ ಮತ್ತು ಕಂಪನಿಗಳ ಲಾಭದ ಪ್ರಮಾಣ ಕುಸಿಯುವ ಸಾಧ್ಯತೆ ಇರುತ್ತದೆ. ಕಂಪನಿಗಳ ಭವಿಷ್ಯದ ಬೆಳವಣಿಗೆಯ ಬಗ್ಗೆ ಹೂಡಿಕೆದಾರರ ವಿಶ್ವಾಸ ಕಡಿಮೆಯಾದಾಗ ಷೇರು ಮಾರುಕಟ್ಟೆಯಲ್ಲಿ ಮಾರಾಟದ ಒತ್ತಡ ಹೆಚ್ಚಾಗಿ ಸೂಚ್ಯಂಕಗಳು ಕುಸಿಯಬಹುದು. ಇಲ್ಲಿ ಇನ್ನೊಂದು ಆಯಾಮವನ್ನು ಕೂಡ ನಾವು ನೋಡಬಹುದು. ಅಮೇರಿಕಾದಲ್ಲಿ ಈಗಾಗಲೇ ಹಣದುಬ್ಬರ ಬಹಳಷ್ಟು ಹೆಚ್ಚಾಗಿದೆ. ಬಡ್ಡಿ ಹೆಚ್ಚಿಸದೆ ಹಾಗೆ ಇದ್ದರೂ ಕೂಡ ಆಗಲೂ ಹಣದುಬ್ಬರ ಇನ್ನಷ್ಟು ಹೆಚ್ಚಾಗುತ್ತದೆ. ಅಮೇರಿಕಾ ಇಂದಿಗೆ ಅಡಿಕೆ ಕತ್ತರಿಯಲ್ಲಿ ಸಿಲುಕಿದೆ. ಯಾವುದೇ ಆಕ್ಷನ್ ತೆಗೆದುಕೊಂಡರೂ ಅದರ ಪರಿಣಾಮ ಪ್ರತಿಕೂಲವಾಗಿರುತ್ತದೆ.

ಎರಡನೆಯದಾಗಿ ,ಹಣದುಬ್ಬರ (Inflation) ದೀರ್ಘಕಾಲ ಹೆಚ್ಚಾಗಿ ಮುಂದುವರಿದರೂ ಅದು ಮಾರುಕಟ್ಟೆಗೆ ದೊಡ್ಡ ಅಪಾಯವಾಗಿದೆ. ಕಚ್ಚಾ ವಸ್ತುಗಳ ಬೆಲೆ, ಇಂಧನ ವೆಚ್ಚ, ಸಾರಿಗೆ ವೆಚ್ಚ ಮತ್ತು ಉದ್ಯೋಗಿಗಳ ವೇತನ ಹೆಚ್ಚಾದರೆ ಕಂಪನಿಗಳ ಉತ್ಪಾದನಾ ವೆಚ್ಚವೂ ಏರುತ್ತದೆ. ಈ ಹೆಚ್ಚುವರಿ ವೆಚ್ಚವನ್ನು ಗ್ರಾಹಕರ ಮೇಲೆ ಸಂಪೂರ್ಣವಾಗಿ ವರ್ಗಾಯಿಸಲು ಸಾಧ್ಯವಾಗದಿದ್ದರೆ ಕಂಪನಿಗಳ ಲಾಭಾಂಶ ಕಡಿಮೆಯಾಗುತ್ತದೆ. ಲಾಭ ಕುಸಿಯುವ ನಿರೀಕ್ಷೆಯೇ ಹೂಡಿಕೆದಾರರನ್ನು ಷೇರುಗಳನ್ನು ಮಾರಾಟ ಮಾಡಲು ಪ್ರೇರೇಪಿಸುತ್ತದೆ. ಇವತ್ತಿನ ಸನ್ನಿವೇಶದಲ್ಲಿ ಹಣದುಬ್ಬರ ಕಡಿಮೆ ಮಾಡಲು ಫೆಡರಲ್ ಬ್ಯಾಂಕ್ ಮಾಡುತ್ತಿರುವ ಎಲ್ಲಾ ಕಸರತ್ತುಗಳೂ ವಿಫಲವಾಗುತ್ತಿವೆ.

ಮೂರನೆಯದಾಗಿ ,ಅಮೆರಿಕದ ಆರ್ಥಿಕತೆ ಮಂದಗತಿಯ (Recession) ಕಡೆಗೆ ಸಾಗಿದರೆ ಷೇರು ಮಾರುಕಟ್ಟೆಯ ಮೇಲೆ ಅದರ ಪರಿಣಾಮ ಇನ್ನಷ್ಟು ಗಂಭೀರವಾಗಬಹುದು. GDP ಬೆಳವಣಿಗೆ ನಿಧಾನವಾಗುವುದು, ಉದ್ಯೋಗಾವಕಾಶಗಳು ಕಡಿಮೆಯಾಗುವುದು, ಜನರ ಆದಾಯ ಕುಸಿಯುವುದು ಮತ್ತು ಗ್ರಾಹಕರ ಖರ್ಚು ಇಳಿಯುವುದು ಆರ್ಥಿಕ ಚಟುವಟಿಕೆಗಳ ವೇಗವನ್ನು ಕಡಿಮೆ ಮಾಡುತ್ತದೆ. ಕಂಪನಿಗಳ ಮಾರಾಟ ಹಾಗೂ ಲಾಭ ಎರಡೂ ಕುಸಿದಾಗ ಷೇರುಗಳ ಮೌಲ್ಯದಲ್ಲೂ ಇಳಿಕೆ ಕಾಣುವುದು ಸಹಜ.

ನಾಲ್ಕನೆಯದಾಗಿ , ಕಂಪನಿಗಳ ತ್ರೈಮಾಸಿಕ ಫಲಿತಾಂಶಗಳು ನಿರೀಕ್ಷೆಗಿಂತ ದುರ್ಬಲವಾಗಿದ್ದರೂ ಮಾರುಕಟ್ಟೆ ಕುಸಿಯಬಹುದು. ವಿಶೇಷವಾಗಿ ತಂತ್ರಜ್ಞಾನ, ಬ್ಯಾಂಕಿಂಗ್, ಆರೋಗ್ಯ ಮತ್ತು ಗ್ರಾಹಕ ವಲಯದ ದೊಡ್ಡ ಕಂಪನಿಗಳು ಕಡಿಮೆ ಲಾಭ ಘೋಷಿಸಿದರೆ ಅಥವಾ ಮುಂದಿನ ತ್ರೈಮಾಸಿಕಗಳ ಬಗ್ಗೆ ದುರ್ಬಲ ಮಾರ್ಗದರ್ಶನ ನೀಡಿದರೆ, ಹೂಡಿಕೆದಾರರು ತಕ್ಷಣವೇ ತಮ್ಮ ಹೂಡಿಕೆಗಳನ್ನು ಕಡಿಮೆ ಮಾಡಲು ಮುಂದಾಗುತ್ತಾರೆ. ಇದರ ಪರಿಣಾಮವಾಗಿ ಪ್ರಮುಖ ಸೂಚ್ಯಂಕಗಳಾದ S&P 500, Nasdaq ಮತ್ತು Dow Jones ಒಂದೇ ಸಮಯದಲ್ಲಿ ಒತ್ತಡಕ್ಕೆ ಒಳಗಾಗಬಹುದು.ಉದಾಹರಣೆಗೆ ಬ್ರಾಡ್ಕಾಂ ಎನ್ನುವ ಎಐ ಸಂಬಂದಿಸಿದ ಸೆಮಿ ಕಂಡಕ್ಟರ್ ಮೇಲಿನ ಲಾಭವನ್ನು 16 ಬಿಲಿಯನ್ ಡಾಲರ್ ಎಂದು ಘೋಷಿಸಿತು. ಮಾರುಕಟ್ಟೆ ಮತ್ತು ಹೂಡಿಕೆದಾರರು ಇದು 17 ಬಿಲಿಯನ್ ಗಿಂತ ಹೆಚ್ಚಿರುತ್ತದೆ ಎಂದು ಭಾವಿಸಿದ್ದರು. ಅವರ ನಿರೀಕ್ಷೆಗಿಂತ ಸ್ವಲ್ಪ ಕಡಿಮೆಯಾಗಿದ್ದಕ್ಕೆ ಮಾರುಕಟ್ಟೆಯಲ್ಲಿ ರಕ್ತದ ಓಕುಳಿ ಹರಿಯಿತು.

ಐದನೆಯದಾಗಿ ,ಇತ್ತೀಚಿನ ವರ್ಷಗಳಲ್ಲಿ ಕೃತಕ ಬುದ್ಧಿಮತ್ತೆ (AI) ಕ್ಷೇತ್ರದ ವೇಗವಾದ ಬೆಳವಣಿಗೆಯಿಂದ ಅನೇಕ ತಂತ್ರಜ್ಞಾನ ಕಂಪನಿಗಳ ಷೇರುಗಳು ಅತೀವ ವೇಗದಲ್ಲಿ ಏರಿವೆ. ಆದರೆ ಈ ಕಂಪನಿಗಳ ಆದಾಯ ನಿರೀಕ್ಷೆಯಂತೆ ಬೆಳೆಯದಿದ್ದರೆ ಅಥವಾ AI ಹೂಡಿಕೆಗಳಿಂದ ಲಾಭ ದೊರೆಯಲು ಹೆಚ್ಚು ಸಮಯ ತೆಗೆದುಕೊಂಡರೆ, ಈ ಷೇರುಗಳಲ್ಲಿ ತೀವ್ರ ತಿದ್ದುಪಡಿ ಸಂಭವಿಸಬಹುದು. ತಂತ್ರಜ್ಞಾನ ಕಂಪನಿಗಳ ಪಾಲು ಅಮೆರಿಕದ ಪ್ರಮುಖ ಸೂಚ್ಯಂಕಗಳಲ್ಲಿ ಬಹಳ ಹೆಚ್ಚಿರುವುದರಿಂದ, ಈ ಕ್ಷೇತ್ರದಲ್ಲಿನ ಕುಸಿತವು ಸಂಪೂರ್ಣ ಮಾರುಕಟ್ಟೆಯ ಮೇಲೂ ಪರಿಣಾಮ ಬೀರುತ್ತದೆ.ನೆನಪಿರಲಿ ಅಮೇರಿಕಾ ಷೇರು ಮಾರುಕಟ್ಟೆ ನಿಂತಿರುವುದು ಕೇವಲ ಹತ್ತು ಸಂಸ್ಥೆಗಳ ವಹಿವಾಟಿನ ಮೇಲೆ ! ಅವುಗಳ ನಡುವಿನ ಆಂತರಿಕ ವಹಿವಾಟು ಈ ಮಟ್ಟದ ವ್ಯಾಲ್ಯೂವೇಷನ್ ಸೃಷ್ಟಿಸಿದೆ. ಚೂರು ಏರುಪೇರಾದರೂ ಅಮೇರಿಕಾ ಮಾರುಕಟ್ಟೆ ಇನ್ನಿಲ್ಲದೆ ಕುಸಿಯುತ್ತದೆ.

ಆರನೆಯದಾಗಿ ,ರಾಜಕೀಯ ಉದ್ವಿಗ್ನತೆ ಕೂಡ ಅಮೆರಿಕದ ಮಾರುಕಟ್ಟೆಗೆ ಪ್ರಮುಖ ಅಪಾಯವಾಗಿದೆ. ಯುದ್ಧಗಳು, ವ್ಯಾಪಾರ ಸಂಘರ್ಷಗಳು, ತೈಲ ಪೂರೈಕೆಯ ಅಡಚಣೆ, ಪ್ರಮುಖ ಸಾಗರ ಮಾರ್ಗಗಳ ಅಸ್ಥಿರತೆ ಅಥವಾ ದೊಡ್ಡ ರಾಷ್ಟ್ರಗಳ ನಡುವಿನ ರಾಜಕೀಯ ಉದ್ವಿಗ್ನತೆ ಜಾಗತಿಕ ವ್ಯಾಪಾರವನ್ನು ದುರ್ಬಲಗೊಳಿಸುತ್ತದೆ. ಇದರಿಂದ ಇಂಧನ ವೆಚ್ಚ ಹೆಚ್ಚುವುದು, ಸರಕು ಸರಬರಾಜು ಸರಪಳಿಯಲ್ಲಿ ವ್ಯತ್ಯಯ ಉಂಟಾಗುವುದು ಮತ್ತು ಕಂಪನಿಗಳ ಕಾರ್ಯಾಚರಣೆಯ ವೆಚ್ಚ ಏರಿಕೆಯಾಗುವುದು ಸಾಮಾನ್ಯ. ಈ ಬೆಳವಣಿಗೆಗಳು ಹೂಡಿಕೆದಾರರಲ್ಲಿ ಅನಿಶ್ಚಿತತೆಯನ್ನು ಉಂಟುಮಾಡಿ ಮಾರುಕಟ್ಟೆಯಲ್ಲಿ ಕುಸಿತಕ್ಕೆ ಕಾರಣವಾಗಬಹುದು.

ಏಳನೆಯದಾಗಿ ,ಬ್ಯಾಂಕಿಂಗ್ ವಲಯದಲ್ಲಿ ಸಮಸ್ಯೆಗಳು ಉಂಟಾದರೂ ಮಾರುಕಟ್ಟೆ ಮೇಲೆ ದೊಡ್ಡ ಪರಿಣಾಮ ಬೀರುತ್ತವೆ. ದೊಡ್ಡ ಬ್ಯಾಂಕ್‌ಗಳು ಹಣಕಾಸಿನ ಸಂಕಷ್ಟಕ್ಕೆ ಸಿಲುಕಿದರೆ, ಸಾಲ ವಿತರಣೆ ಕಡಿಮೆಯಾಗುತ್ತದೆ ಮತ್ತು ವ್ಯವಹಾರಗಳಿಗೆ ಹಣಕಾಸು ಲಭ್ಯತೆ ಕಷ್ಟವಾಗುತ್ತದೆ. ಇದರ ಪರಿಣಾಮವಾಗಿ ಹೂಡಿಕೆಗಳು ಮತ್ತು ಆರ್ಥಿಕ ಚಟುವಟಿಕೆಗಳು ನಿಧಾನಗೊಳ್ಳುತ್ತವೆ. ಇಂತಹ ಪರಿಸ್ಥಿತಿಗಳು ಮಾರುಕಟ್ಟೆಯಲ್ಲಿ ಭಯದ ವಾತಾವರಣವನ್ನು ಸೃಷ್ಟಿಸುತ್ತವೆ.ಅದು ಮಾರುಕಟ್ಟೆ ಕುಸಿತಕ್ಕೂ ಕಾರಣವಾಗುತ್ತದೆ.

ಎಂಟನೆಯದಾಗಿ , ಅಮೆರಿಕದ ಡಾಲರ್ ಅತಿಯಾಗಿ ಬಲವಾದರೂ ಕೆಲವು ಸಂದರ್ಭಗಳಲ್ಲಿ ಅದು ಷೇರು ಮಾರುಕಟ್ಟೆಗೆ ಸವಾಲಾಗಬಹುದು. ಬಲವಾದ ಡಾಲರ್‌ನಿಂದ ಅಮೆರಿಕದ ರಫ್ತು ದುಬಾರಿಯಾಗುತ್ತದೆ ಮತ್ತು ವಿದೇಶಗಳಲ್ಲಿ ಕಾರ್ಯನಿರ್ವಹಿಸುವ ಬಹುರಾಷ್ಟ್ರೀಯ ಕಂಪನಿಗಳ ಆದಾಯದ ಮೌಲ್ಯ ಕಡಿಮೆಯಾಗಬಹುದು. ಇದರಿಂದ ಕಂಪನಿಗಳ ಒಟ್ಟು ಲಾಭ ಕುಸಿಯುವ ಸಾಧ್ಯತೆ ಇದೆ. ಈ ಸಾಧ್ಯತೆ ಬಗ್ಗೆ ಜನ ಹೆಚ್ಚು ಚಿಂತಿಸುವುದಿಲ್ಲ. ಆದರೆ ಡಾಲರ್ ಹೆಚ್ಚು ಸ್ಟ್ರಾಂಗ್ ಆದರೂ ಅದು ಕೂಡ ಮಾರಕವಾಗುತ್ತದೆ.

ಒಂಬತ್ತನೇಯದಾಗಿ , ರಾಜಕೀಯ ಅನಿಶ್ಚಿತತೆ, ತೆರಿಗೆ ನೀತಿಯ ಬದಲಾವಣೆ, ಸರ್ಕಾರಿ ವೆಚ್ಚದ ವಿವಾದಗಳು, ಸಾಲದ ಮಿತಿಯ (Debt Ceiling) ಸಮಸ್ಯೆಗಳು ಅಥವಾ ಚುನಾವಣಾ ಫಲಿತಾಂಶಗಳ ಬಗ್ಗೆ ಇರುವ ಗೊಂದಲಗಳು ಕೂಡ ಹೂಡಿಕೆದಾರರ ವಿಶ್ವಾಸವನ್ನು ದುರ್ಬಲಗೊಳಿಸಬಹುದು. ಇದೇ ರೀತಿ ಚೀನಾ, ಯುರೋಪ್ ಅಥವಾ ಇತರ ಪ್ರಮುಖ ಆರ್ಥಿಕತೆಗಳಲ್ಲಿ ಬೇಡಿಕೆ ಕುಸಿದರೆ, ಅಮೆರಿಕದ ಬಹುರಾಷ್ಟ್ರೀಯ ಕಂಪನಿಗಳ ಜಾಗತಿಕ ಆದಾಯದ ಮೇಲೆ ನೇರ ಪರಿಣಾಮ ಬೀಳುತ್ತದೆ.

ಹತ್ತನೆಯದಾಗಿ ,ಮಾರುಕಟ್ಟೆಯ ಅತಿಯಾದ ಆಶಾವಾದವೂ ಕೆಲವೊಮ್ಮೆ ಕುಸಿತಕ್ಕೆ ಕಾರಣವಾಗುತ್ತದೆ. ಕಂಪನಿಗಳ ನೈಜ ಲಾಭದ ಬೆಳವಣಿಗೆಯನ್ನು ಮೀರಿ ಷೇರುಗಳ ಬೆಲೆಗಳು ವೇಗವಾಗಿ ಏರಿದಾಗ, ಒಂದು ಹಂತದಲ್ಲಿ ಹೂಡಿಕೆದಾರರು ಲಾಭ ಬುಕ್ಕಿಂಗ್ ಆರಂಭಿಸುತ್ತಾರೆ. ಈ ಮಾರಾಟದ ಒತ್ತಡ ಹೆಚ್ಚಾದರೆ ಸಣ್ಣ ತಿದ್ದುಪಡಿಯೇ ದೊಡ್ಡ ಕುಸಿತವಾಗಿ ಮಾರ್ಪಾಡಾಗಬಹುದು.ಎಲ್ಲರಿಗೂ ಗೊತ್ತಿದೆ ಅಮೇರಿಕಾ ಸಂಸ್ಥೆಗಳ AI ಮಾರುಕಟ್ಟೆ ಓವರ್ ವ್ಯಾಲ್ಯೂವೇಷನ್ ನಲ್ಲಿ ಕುಳಿತಿದಿದೆ. ಯಾವಾಗ ದೊಡ್ಡ ಹೂಡಿಕೆದಾರರು ಹಣವನ್ನು ತೆಗೆದುಕೊಳ್ಳುತ್ತಾರೆ ಎನ್ನುವುದರ ಕ್ಷಣಗಣನೆ ಬಾಕಿಯಿದೆ.

ಕೊನೆ ಮಾತು: ಅಮೆರಿಕದ ಮಾರುಕಟ್ಟೆ ಕುಸಿದರೆ ಅದರ ಪರಿಣಾಮ ಭಾರತ ಸೇರಿದಂತೆ ಅನೇಕ ದೇಶಗಳ ಮೇಲೂ ಕಾಣಿಸಬಹುದು. ವಿದೇಶಿ ಸಂಸ್ಥಾತ್ಮಕ ಹೂಡಿಕೆದಾರರು (FIIs) ಹಣವನ್ನು ಹಿಂಪಡೆಯಬಹುದು, ರೂಪಾಯಿ ದುರ್ಬಲವಾಗಬಹುದು, ನಿಫ್ಟಿ ಮತ್ತು ಸೆನ್ಸೆಕ್ಸ್ ಒತ್ತಡಕ್ಕೆ ಒಳಗಾಗಬಹುದು ಹಾಗೂ ಐಟಿ, ಬ್ಯಾಂಕಿಂಗ್ ಮತ್ತು ರಫ್ತು ಆಧಾರಿತ ಕಂಪನಿಗಳ ಷೇರುಗಳಲ್ಲಿ ಕುಸಿತ ಕಾಣಬಹುದು. ಆದಾಗ್ಯೂ ಭಾರತದ ದೇಶೀಯ ಆರ್ಥಿಕತೆ ಬಲವಾಗಿದ್ದರೆ ಮತ್ತು ದೇಶೀಯ ಹೂಡಿಕೆದಾರರ ಪಾಲ್ಗೊಳ್ಳುವಿಕೆ ಹೆಚ್ಚಿರುವುದರ ಕಾರಣ ಬಹಳ ದೊಡ್ಡ ಮಟ್ಟದ ಕುಸಿತವಂತೂ ಆಗುವುದಿಲ್ಲ.

ಒಟ್ಟಾರೆ, ಅಮೆರಿಕದ ಷೇರು ಮಾರುಕಟ್ಟೆಯ ಭವಿಷ್ಯದ ಕುಸಿತ ಖಚಿತ. ಬಡ್ಡಿದರಗಳು, ಹಣದುಬ್ಬರ, ಆರ್ಥಿಕ ಬೆಳವಣಿಗೆ, ಕಂಪನಿಗಳ ಲಾಭ, ಜಾಗತಿಕ ರಾಜಕೀಯ ಪರಿಸ್ಥಿತಿ, ಬ್ಯಾಂಕಿಂಗ್ ವ್ಯವಸ್ಥೆ, ಡಾಲರ್‌ನ ಬಲ ಮತ್ತು ಹೂಡಿಕೆದಾರರ ಮನೋಭಾವ ಈ ಎಲ್ಲ ಅಂಶಗಳು ಸೇರಿ ಮಾರುಕಟ್ಟೆಯ ದಿಕ್ಕನ್ನು ನಿರ್ಧರಿಸುತ್ತವೆ. ಆದರೆ ಇತಿಹಾಸ ಹೇಳುವಂತೆ, ಅಮೆರಿಕದ ಮಾರುಕಟ್ಟೆ ಅನೇಕ ಬಾರಿ ದೊಡ್ಡ ಕುಸಿತಗಳನ್ನು ಎದುರಿಸಿದರೂ, ಬಲವಾದ ಆರ್ಥಿಕ ವ್ಯವಸ್ಥೆ, ನವೀನ ತಂತ್ರಜ್ಞಾನ, ಉದ್ಯಮಶೀಲತೆ ಮತ್ತು ದೀರ್ಘಾವಧಿಯ ಬೆಳವಣಿಗೆಯ ಸಾಮರ್ಥ್ಯದಿಂದ ಮತ್ತೆ ಚೇತರಿಸಿಕೊಂಡಿದೆ.

ಅವತ್ತಿನ ಸನ್ನಿವೇಶಗಳು ಬೇರೆ ಇದ್ದವು. ಅವತ್ತಿಗೆ ಅಮೇರಿಕಾ ಬಿಟ್ಟು ಬೇರೆ ಬಲಿಷ್ಠ ಆರ್ಥಿಕತೆ ಇರಲಿಲ್ಲ. ಅವರು ಮಾಡಿದ ತಪ್ಪುಗಳನ್ನು ಜಗತ್ತು ಹೊಟ್ಟೆಗಾಗಿ ಕೊಂಡಿತು. ಇವತ್ತಿನ ಬದಲಾದ ಸನ್ನಿವೇಶದಲ್ಲಿ ಅಮೆರಿಕಾದ ತಪ್ಪು ನೀತಿಗಳ ಪರಿಣಾಮದ ಬಹುದೊಡ್ಡ ಫಲವನ್ನು ಅಮೆರಿಕಾವೇ ಅನುಭವಿಸಬೇಕಾಗುತ್ತದೆ. ಆದರೂ ಇದರ ಕಾರಣದಿಂದ ಮುಂದಿನ ದಿನಗಳು ಇನ್ನಷ್ಟು ಸಂಕಷ್ಟ ಭಾರತಕ್ಕೆ ಎದುರಾಗಲಿದೆ. ಈ ದಿನಗಳನ್ನು ನಾವು ತಡೆದುಕೊಂಡರೆ ಸಾಕು. ಹೂಡಿಕೆದಾರರು ಭಾರತಕ್ಕೆ ಹಣದ ಹೊಳೆಯನ್ನು ಹರಿಸುತ್ತಾರೆ ಇದರಲ್ಲಿ ಸಂಶಯ ಬೇಡ.