ಮೊಹಾಲಿ: ಮೊದಲ ಟಿ20 ವಿಶ್ವಕಪ್ ನಲ್ಲಿ ಒಂದೇ ಓವರ್ ನ ಆರು ಎಸೆತೆಗಳನ್ನು ಸಿಕ್ಸರ್ ಸಿಡಿಸಿದ್ದ ಟೀಂ ಇಂಡಿಯಾ ಆಟಗಾರ ಯುವರಾಜ್ ಸಿಂಗ್ ಕ್ಯಾನ್ಸರ್ ಪೀಡಿತ ಮಕ್ಕಳಿಗೆ ಮತ್ತೊಮ್ಮೆ ಸಿಕ್ಸ್ ಸಿಕ್ಸರ್ ಸಿಡಿಸುವ ಮಾತು ಕೊಟ್ಟಿದ್ದಾರೆ.
ಕ್ಯಾನ್ಸರ್ ನಿಂದ ಗುಣಮುಖರಾಗಿರುವ ಯುವರಾಜ್ ಸಿಂಗ್ ಕ್ಯಾನ್ಸರ್ ಪೀಡಿತ ಮಕ್ಕಳೊಂದಿಗೆ ಸಂವಾದ ಕಾರ್ಯಕ್ರಮವೊಂದರಲ್ಲಿ ಭಾಗವಹಿಸಿದ್ದು, ಈ ವೇಳೆ ಮಕ್ಕಳಿಗೆ ಸಿಕ್ಸರ್ ಸಿಡಿಸುವ ಭರವಸೆ ನೀಡಿದ್ದಾರೆ.
ಪಿಸಿಎ ಸ್ಟೇಡಿಯಂಗೆ ಆಗಮಿಸಿದ್ದ 7 ಹಾಗೂ 8 ವರ್ಷದ ಕ್ಯಾನ್ಸರ್ ಪೀಡಿತ ಮಕ್ಕಳೊಂದಿಗೆ ಕೆಲ ಸಮಯ ಕಳೆದ ಯುವರಾಜ್ ಸಿಂಗ್ ಈ ವೇಳೆ ಸಿಕ್ಸರ್ ಸಿಡಿಸುವ ಬಗ್ಗೆ ಮಗುವೊಂದು ಕೇಳಿದ ಪ್ರಶ್ನೆಗೆ ಉತ್ತರಿಸಿದ ಅವರು ನನಗೋಸ್ಕರ ನೀನು ಪ್ರಾರ್ಥನೆ ಮಾಡು. ಮತ್ತೊಮ್ಮೆ ನಾನು ಆರು ಸಿಕ್ಸರ್ ಬಾರಿಸುತ್ತೇನೆ ಎಂದು ಹೇಳಿದರು.
