ಡೆಹ್ರಾಡೂನ್: ಬಾಂಗ್ಲಾದೇಶ ವಿರುದ್ಧದ ಮೂರು ಟಿ20 ಪಂದ್ಯಗಳ ಪೈಕಿ ಎರಡು ಪಂದ್ಯಗಳಲ್ಲಿ ಗೆಲುವು ಸಾಧಿಸುವ ಮೂಲಕ ಆಫ್ಘಾನಿಸ್ತಾನ ಟಿ20 ಸರಣಿ ಗೆದ್ದು ಐತಿಹಾಸಿಕ ದಾಖಲೆ ಬರೆದಿದೆ.
ಡೆಹ್ರಾಡೂನ್ ನಲ್ಲಿ ನಡೆದ ಎರಡನೇ ಟಿ20 ಪಂದ್ಯದಲ್ಲಿ ಆಫ್ಘಾನ್ ತಂಡ ಆರು ವಿಕೆಟ್ ಗಳಿಂದ ಗೆದ್ದು ಸರಣಿ ಕೈವಶ ಮಾಡಿಕೊಂಡಿದೆ.
ಮೊದಲು ಬ್ಯಾಟಿಂಗ್ ಮಾಡಿದ ಬಾಂಗ್ಲಾದೇಶ ನಿಗದಿತ ಓವರ್ ನಲ್ಲಿ 8 ವಿಕೆಟ್ ನಷ್ಟಕ್ಕೆ 134 ಪೇರಿಸಿತ್ತು. 135 ರನ್ ಗಳ ಸಾಧಾರಣ ಮೊತ್ತವನ್ನು ಬೆನ್ನಟ್ಟಿದ ಆಫ್ಘಾನಿಸ್ತಾನ ಇನ್ನು 7 ಎಸೆತ ಇರುವಂತೆ 135 ರನ್ ಬಾರಿಸಿ ಗೆಲುವಿನ ನಗೆ ಬೀರಿತು.
ಬಾಂಗ್ಲಾ ಪರ ತಮಿಮ್ ಇಕ್ಬಾಲ್ 43, ಮುಷ್ಫಿಕರ್ ರಮೀಮ್ 22, ಅಬು ಹೈದರ್ ಅಜೇಯ 21 ರನ್ ಬಾರಿಸಿದ್ದಾರೆ. ಆಫ್ಘಾನ್ ಪರ ಬೌಲಿಂಗ್ ನಲ್ಲಿ ರಶೀದ್ ಖಾನ್ 4 ವಿಕೆಟ್ ಪಡೆದು ತಂಡದ ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದರು.
ಆಫ್ಘಾನ್ ಪರ ಬ್ಯಾಟಿಂಗ್ ನಲ್ಲಿ ಸಮಿಹುಲ್ಲಾ ಶೇನ್ವಾರಿ 49, ಮೊಹಮ್ಮದ್ ಶಹಜಾದ್ 24, ಮೊಹಮ್ಮದ್ ನಬಿ ಅಜೇಯ 31 ರನ್ ಸಿಡಿಸಿದ್ದಾರೆ.
