ಖಲೀಲ್ ಗೆ ಗಾಯ: ನ್ಯೂಜಿಲೆಂಡ್ ಪ್ರವಾಸದಿಂದ ಹೊರಕ್ಕೆ

ನವದೆಹಲಿ: ಎಡಗೈ ವೇಗದ ಬೌಲರ್ ಖಲೀಲ್ ಅಹ್ಮದ್ ಅವರ ಎಡ ಮಣಿಕಟ್ಟಿಗೆ ಗಾಯವಾಗಿದ್ದು ನ್ಯೂಜಿಲೆಂಡ್ ಪ್ರವಾಸದಲ್ಲಿರುವ ಭಾರತ “ಎ” ತಂಡದಿಂದ ಹೊರಗುಳಿದಿದ್ದಾರೆ.

ಜನವರಿ 22 ರಂದು ಲಿಂಕನ್‌ನಲ್ಲಿ ನಡೆದ ನ್ಯೂಜಿಲೆಂಡ್ ಎ ವಿರುದ್ಧದ ಮೊದಲ ಅಧಿಕೃತೇತರ ಏಕದಿನ ಪಂದ್ಯದ ವೇಳೆ ಖಲೀಲ್ ಅವರ ಮಣಿಕಟ್ಟಿನ ಗಾಯವಾಗಿದ್ದು ಫ್ಯಾಕ್ಚರ್ ಆಗಿದೆ.

ಖಲೀಲ್ ಅವರ ಎಡ ಮಣಿಕಟ್ಟಿಗೆ ಗಾಯವಾಗಿರುವುದರಿಂದ ಅವರು ಭಾರತ ಎ ತಂಡದಿಂದ ಹೊರಗುಳಿದಿದ್ದಾರೆ. ಅವರಿಗೆ ಪುನರ್ವಸತಿ ಯನ್ನು ರಾಷ್ಟ್ರೀಯ ಕ್ರಿಕೆಟ್ ಅಕಾಡೆಮಿ ನಿರ್ವಹಿಸಲಿದೆ ಎಂದು ಬಿಸಿಸಿಐ ತಿಳಿಸಿದೆ. ಆದಾಗ್ಯೂ, ಅವರ ಬದಲಿ ಆಟಗಾರನ ಹೆಸರನ್ನು ಬಿಸಿಸಿಐ ತಿಳಿಸಿಲ್ಲ.

ಖಲೀಲ್ ಭಾರತದ ಪರ 11 ಅಂತಾರಾಷ್ಟ್ರೀಯ ಏಕದಿನ ಪಂದ್ಯ ಹಾಗೂ 14 ಟಿ-20 ಪಂದ್ಯಗಳನ್ನಾಡಿದ್ದಾರೆ. ನ್ಯೂಜಿಲೆಂಡ್ ವಿರುದ್ಧದ ಎರಡನೇ ಏಕದಿನ ಪಂದ್ಯದಲ್ಲಿ 8 ಓವರ್ ಗಳಲ್ಲಿ 46 ರನ್ ನೀಡಿ 2 ವಿಕೆಟ್ ಪಡೆದುಕೊಂಡಿದ್ದರು. 

ಮೂರು ಅನಧಿಕೃತ ಏಕದಿನ ಪಂದ್ಯದ ಸರಣಿ ಹಾಗೂ ಎರಡು ಟೆಸ್ಟ್  ಪಂದ್ಯಕ್ಕಾಗಿ ಭಾರತ ಎ ತಂಡ ನ್ಯೂಜಿಲೆಂಡ್ ಪ್ರವಾಸದಲ್ಲಿದೆ. ಭಾರತ ಮೊದಲ ಪಂದ್ಯ ಗೆದ್ದ ಬಳಿಕ ಅನಧಿಕೃತ ಏಕದಿನ ಸರಣಿ 1-1 ಅಂತರಿಂದ ಸಮಬಲದಿಂದ ಕೂಡಿದೆ.  ನಾಳೆ ನಡೆಯಲಿರುವ ಪಂದ್ಯ ಸರಣಿ ಗೆಲುವಿನಲ್ಲಿ ನಿರ್ಣಾಯಕ ಪಾತ್ರ ವಹಿಸಲಿದೆ.