'ಮೂರ್ಖತನದ ನಿರ್ಧಾರ': ತಂಡದಿಂದ ಹೊರಗಿಟ್ಟಿರುವ ತೀರ್ಮಾನಕ್ಕೆ ಜಯ್​ ಶಾಗೆ ​ಇಶಾನ್​ ಕಿಶನ್​ ಟಾಂಗ್!

ವಿಕೆಟ್‌ಕೀಪರ್ ಬ್ಯಾಟ್ಸ್‌ಮನ್ ಇಶಾನ್ ಕಿಶನ್ ಕೊನೆಯ ಬಾರಿಗೆ ನವೆಂಬರ್‌ನಲ್ಲಿ ಭಾರತಕ್ಕಾಗಿ ಆಡಿದ್ದರು. ದಕ್ಷಿಣ ಆಫ್ರಿಕಾ ಪ್ರವಾಸದ ವೇಳೆ ಕಿಶನ್ ಬಿಸಿಸಿಐನಿಂದ ವಿರಾಮವನ್ನು ಕೋರಿದ್ದರು. ನಂತರ ಅವರನ್ನು ತಂಡದಿಂದ ಬಿಡುಗಡೆ ಮಾಡಲಾಯಿತು. ಅವರು ಫೆಬ್ರವರಿಯಲ್ಲಿ ಡಿವೈ ಪಾಟೀಲ್ ಟೂರ್ನಮೆಂಟ್‌ನಲ್ಲಿ ಪುನರಾಗಮನ ಮಾಡಿದರು. ಇಂಡಿಯನ್ ಪ್ರೀಮಿಯರ್ ಲೀಗ್‌ನಲ್ಲಿಯೂ ಭಾಗವಹಿಸಿದರು. ಆದಾಗ್ಯೂ, ಈ ಎಲ್ಲದರ ನಡುವೆ, ಅವರನ್ನು ಬಿಸಿಸಿಐನ ಕೇಂದ್ರ ಒಪ್ಪಂದದಿಂದ ತೆಗೆದುಹಾಕಲಾಗಿತ್ತು.

ಏಕೆಂದರೆ ರಾಷ್ಟ್ರೀಯ ತಂಡದಲ್ಲಿ ಆಡದಿದ್ದಾಗ ತಂಡಕ್ಕೆ ಸಂಬಂಧಿಸಿದ ಕ್ರಿಕೆಟಿಗರನ್ನು ದೇಶೀಯ ಕ್ರಿಕೆಟ್ ಆಡಲು ಬಿಸಿಸಿಐ ಕೇಳಿತ್ತು. ಆದರೆ ಕೆಲವು ಆಟಗಾರರು ಈ ನಿರ್ಧಾರಕ್ಕೆ ಗಮನ ಕೊಡಲಿಲ್ಲ. ಟಿ20 ವಿಶ್ವಕಪ್ ಬಳಿಕ ತಂಡದಿಂದ ಕಡೆಗಣಿಸಲ್ಪಟ್ಟು ಕೇಂದ್ರೀಯ ಗುತ್ತಿಗೆ ಪಡೆಯದಿರುವ ಬಗ್ಗೆ ಇಶಾನ್ ಕಿಶನ್ ಪ್ರತಿಕ್ರಿಯಿಸಿದ್ದಾರೆ. ನನ್ನನ್ನು ಯಾರೂ ಅರ್ಥ ಮಾಡಿಕೊಂಡಿಲ್ಲ ಎಂದು ಹೇಳಿದ್ದಾರೆ.

ಇಶಾನ್ ಕಿಶನ್ ಇಂಡಿಯನ್ ಎಕ್ಸ್‌ಪ್ರೆಸ್‌ ಜೊತೆ ಮಾತನಾಡಿದ್ದು , ನಾನು ರನ್ ಗಳಿಸುತ್ತಿದ್ದರೂ ಸಹ ನನ್ನನ್ನು ಕಾಯುವಂತೆ ಇಡಲಾಗಿತ್ತು. ತಂಡದ ಕ್ರೀಡೆಗಳಲ್ಲಿ ಇಂತಹ ಘಟನೆಗಳು ನಡೆಯುತ್ತವೆ. ಆದಾಗ್ಯೂ, ನನಗೆ ಪ್ರಯಾಣದಿಂದ ಆಯಾಸವಾಗಿತ್ತು. ನನಗೆ ಹುಷಾರಿರಲಿಲ್ಲ ಮತ್ತು ವಿಶ್ರಾಂತಿ ತೆಗೆದುಕೊಳ್ಳಲು ನಿರ್ಧರಿಸಿದೆ. ದುಃಖಕರವೆಂದರೆ, ನನ್ನ ಕುಟುಂಬ ಮತ್ತು ಕೆಲವು ನಿಕಟ ಜನರನ್ನು ಹೊರತುಪಡಿಸಿ, ಯಾರೂ ಇದನ್ನು ಅರ್ಥಮಾಡಿಕೊಳ್ಳಲಿಲ್ಲ ಎಂದು ಹೇಳಿದ್ದಾರೆ.

"ಇದು ನಿರಾಶಾದಾಯಕ" ಎಂದು ಇಶಾನ್ ಕಿಶನ್ ಹೇಳಿದ್ದಾರೆ. ಇಂದು ಎಲ್ಲವೂ ಸರಿಯಾಗಿದೆ ಎಂದು ನಾನು ಹೇಳಲು ಬಯಸುವುದಿಲ್ಲ. ಆದರೆ ನನ್ನ ಮನಸ್ಸಿನಲ್ಲಿ ಕೆಲವು ವಿಚಾರಗಳ ಮಂಥನವಾಗುತ್ತಿರುತ್ತದೆ. ಮುಂದೆ ಏನಾಗಬಹುದು, ಯಾಕೆ ಹೀಗಾಯಿತು, ನನಗೇ ಯಾಕೆ ಹೀಗಾಯಿತು. ನಾನು ಪ್ರದರ್ಶನ ನೀಡುತ್ತಿರುವಾಗ ಈ ಎಲ್ಲಾ ಘಟನೆಗಳು ನಡೆದಿವೆ. ಕೇಂದ್ರ ಒಪ್ಪಂದದಿಂದ ಕೈಬಿಡಲ್ಪಟ್ಟ ನಂತರ ಕಿಶನ್, 'ನಾನು ಯಾವುದರ ಬಗ್ಗೆಯೂ ದುಃಖಿಸಲು ಬಯಸುವುದಿಲ್ಲ. ನಾನು ನನ್ನ ಅತ್ಯುತ್ತಮ ಆಟ ನೀಡುವುದನ್ನು ಮುಂದುವರಿಸುತ್ತೇನೆ ಎಂದು ಹೇಳಿದ್ದಾರೆ.

ಕಳೆದ 6 ತಿಂಗಳಿಂದ ಕಲಿತ ವಿಷಯದ ಬಗ್ಗೆ ಕಿಶನ್, "ಏನೂ ಇಲ್ಲ" ಎಂದು ಹೇಳಿದರು. ಅಂತಹ ಪಾಠವನ್ನೇನು ಕಲಿತಿಲ್ಲ. ವಿರಾಮದ ನಂತರ ಪುನರಾಗಮನ ಮಾಡಲು, ನಿಮ್ಮ ಫಿಟ್ನೆಸ್ ಸಾಬೀತುಪಡಿಸಲು ನೀವು ದೇಶೀಯ ಕ್ರಿಕೆಟ್ ಅನ್ನು ಆಡಬೇಕು ಎಂಬುದು ನಿಯಮ. ನಾನು ನನ್ನ ಆಟದಲ್ಲಿ ಕೆಲಸ ಮಾಡುವುದನ್ನು ಮುಂದುವರಿಸಲು ಬಯಸುತ್ತೇನೆ. ನಾನು ಎಲ್ಲಾ ಮೂರು ಫಾರ್ಮ್ಯಾಟ್ ಆಡಲು ಬಯಸುತ್ತೇನೆ. ಟಿ20, ಏಕದಿನ ಹಾಗೂ ಟೆಸ್ಟ್‌ನಲ್ಲಿಯೂ ಉತ್ತಮ ಪ್ರದರ್ಶನ ನೀಡಿದ್ದೇನೆ. ನಾನು ಎಲ್ಲಾ ಮೂರು ಸ್ವರೂಪಗಳ ಭಾಗವಾಗಲು ಬಯಸುತ್ತೇನೆ ಎಂದರು.

ಜಾರ್ಖಂಡ್ ಪರ ದೇಶೀಯ ಕ್ರಿಕೆಟ್ ಆಡದಿರುವ ಬಗ್ಗೆ ಅವರು ಕುತೂಹಲಕಾರಿ ಕಾರಣವನ್ನು ನೀಡಿದ್ದಾರೆ. ನಾನು ವಿರಾಮ ತೆಗೆದುಕೊಂಡೆ ಮತ್ತು ಅದು ಸಾಮಾನ್ಯವಾಗಿತ್ತು. ನೀವು ಪುನರಾಗಮನ ಮಾಡಬೇಕಾದರೆ ದೇಶೀಯ ಕ್ರಿಕೆಟ್‌ನಲ್ಲಿ ಉತ್ತಮ ಪ್ರದರ್ಶನ ನೀಡಬೇಕು ಎಂಬುದು ನಿಯಮ. ಇದು ಸ್ಪಷ್ಟವಾಗಿದೆ. ನಾನು ಆಡುವ ಮನಸ್ಥಿತಿಯಲ್ಲಿ ಇರಲಿಲ್ಲ ಮತ್ತು ಅದಕ್ಕಾಗಿಯೇ ನಾನು ಅಂತರರಾಷ್ಟ್ರೀಯ ಕ್ರಿಕೆಟ್‌ನಿಂದ ವಿರಾಮ ತೆಗೆದುಕೊಂಡೆ. ಅಂತರಾಷ್ಟ್ರೀಯ ಕ್ರಿಕೆಟ್‌ನಿಂದ ವಿರಾಮ ತೆಗೆದುಕೊಂಡು ನಂತರ ದೇಶೀಯ ಪಂದ್ಯಗಳನ್ನು ಆಡುವುದರಲ್ಲಿ ಅರ್ಥವಿಲ್ಲ ಎಂದು ಹೇಳುವ ಮೂಲಕ ಬಿಸಿಸಿಐ ಕಾರ್ಯದರ್ಶಿ ಜಯ್​ ಶಾ ಅವರ ಯೋಚನೆ ಸರಿಯಿಲ್ಲ ಎಂಬುದಾಗಿ ಹೇಳಿದ್ದಾರೆ.