ಗೇಮಿಂಗ್ ನಿಷೇಧ ನಂತರ ಹಿಂದೆ ಸರಿದ ಡ್ರೀಮ್ 11: ಜೆರ್ಸಿ ಪ್ರಾಯೋಜಕತ್ವವಿಲ್ಲದೆ ಭಾರತ ಏಷ್ಯಾ ಕಪ್ 2025 ಪ್ರವೇಶ?

ಯುಎಇಯಲ್ಲಿ ನಡೆಯಲಿರುವ ಏಷ್ಯಾ ಕಪ್ 2025 ರಲ್ಲಿ ಭಾರತ ಕಣಕ್ಕಿಳಿಯಲು ಸಜ್ಜಾಗಿದ್ದು, ಆತಿಥೇಯರ ವಿರುದ್ಧ ಅಭಿಯಾನ ಆರಂಭಿಸಲಿದೆ. ಆದರೆ ತಮ್ಮ ಆರಂಭಿಕ ಪಂದ್ಯಕ್ಕೆ ಕೇವಲ 18 ದಿನಗಳು ಬಾಕಿ ಇರುವಾಗ, ತಂಡವು ದೊಡ್ಡ ಹಿನ್ನಡೆಯನ್ನು ಎದುರಿಸಿದೆ. ವರದಿಗಳ ಪ್ರಕಾರ ಭಾರತ ತಂಡ ಜೆರ್ಸಿ ಪ್ರಾಯೋಜಕರಿಲ್ಲದೆ ಪಂದ್ಯಾವಳಿಗೆ ಪ್ರವೇಶಿಸಬಹುದು.

ಫ್ಯಾಂಟಸಿ ಕ್ರೀಡಾ ದೈತ್ಯ ಡ್ರೀಮ್ 11 ಇನ್ನು ಮುಂದೆ ಭಾರತೀಯ ಪುರುಷರ ಕ್ರಿಕೆಟ್ ತಂಡವನ್ನು ಪ್ರಾಯೋಜಿಸುವುದಿಲ್ಲ ಎಂದು ಎನ್‌ಡಿಟಿವಿ ವರದಿ ಹೇಳುತ್ತದೆ. ಗೇಮಿಂಗ್ ಪ್ಲಾಟ್‌ಫಾರ್ಮ್‌ಗಳನ್ನು ನಿಷೇಧಿಸುವ 'ಆನ್‌ಲೈನ್ ಗೇಮಿಂಗ್ ಪ್ರಚಾರ ಮತ್ತು ನಿಯಂತ್ರಣ ಮಸೂದೆ, 2025' ನ್ನು ಸಂಸತ್ತಿನಲ್ಲಿ ಮೊನ್ನೆ ಅಂಗೀಕರಿಸಿದ ನಂತರ ಈ ಬೆಳವಣಿಗೆ ನಡೆದಿದೆ.

ಇಲ್ಲಿಯವರೆಗೆ, ಬಿಸಿಸಿಐ ಅಥವಾ ಡ್ರೀಮ್ 11 ಈ ವಿಷಯದ ಬಗ್ಗೆ ಅಧಿಕೃತ ಹೇಳಿಕೆ ನೀಡಿಲ್ಲ. ಬಿಸಿಸಿಐ ಕಾರ್ಯದರ್ಶಿ ದೇವಜಿತ್ ಸೈಕಿಯಾ, ಮಂಡಳಿಯು ದೇಶದ ಕಾನೂನುಗಳನ್ನು ಅನುಸರಿಸುತ್ತದೆ ಎಂದು ಹೇಳಿದ್ದಾರೆ.

ಅನುಮತಿ ಸಿಗದಿದ್ದರೆ ನಾವು ಏನನ್ನೂ ಮಾಡುವುದಿಲ್ಲ. ಕೇಂದ್ರ ಸರ್ಕಾರವು ರೂಪಿಸಿದ ದೇಶದ ಪ್ರತಿಯೊಂದು ನೀತಿಯನ್ನು ಬಿಸಿಸಿಐ ಅನುಸರಿಸುತ್ತದೆ ಎಂದು ದೇವಜಿತ್ ಸೈಕಿಯಾ ಹೇಳಿದ್ದಾರೆ.

ಬಿಸಿಸಿಐ ಶೀಘ್ರದಲ್ಲೇ ಜೆರ್ಸಿ ಪ್ರಾಯೋಜಕತ್ವಕ್ಕಾಗಿ ಹೊಸ ಬಿಡ್‌ಗಳನ್ನು ಆಹ್ವಾನಿಸುವ ಸಾಧ್ಯತೆಯಿದೆ ಎಂದು ವರದಿ ಹೇಳುತ್ತದೆ. ಸೆಪ್ಟೆಂಬರ್ 9 ರಿಂದ ಪ್ರಾರಂಭವಾಗುವ ಏಷ್ಯಾ ಕಪ್ 2025 ರ ಮೊದಲು ಪ್ರಾಯೋಜಕರು ಸಿಗದಿದ್ದರೆ, ಮೆನ್ ಇನ್ ಬ್ಲೂ ಪ್ರಮುಖ ಪ್ರಾಯೋಜಕರಿಲ್ಲದೆ ಪಂದ್ಯ ಆಡಬಹುದು.

ಡ್ರೀಮ್ 11 ಲೋಗೋಗಳನ್ನು ಹೊಂದಿರುವ ಏಷ್ಯಾ ಕಪ್ ಜೆರ್ಸಿಗಳನ್ನು ಈಗಾಗಲೇ ಮುದ್ರಿಸಲಾಗಿದ್ದರೂ, ಅದನ್ನು ಕಾರ್ಯಕ್ರಮದಲ್ಲಿ ಬಳಸಲಾಗುವುದಿಲ್ಲ.