'ವೈಭವ್ ಸೂರ್ಯವಂಶಿಗೆ ಆದಷ್ಟು ಕಡಿಮೆ ಹೇಳುವುದೇ ಉತ್ತಮ': ರಾಜಸ್ಥಾನ್ ರಾಯಲ್ಸ್ ಮುಖ್ಯ ಕೋಚ್ ಕುಮಾರ್ ಸಂಗಕ್ಕಾರ!

15 ವರ್ಷದ ಯುವ ಬ್ಯಾಟಿಂಗ್ ಸೆನ್ಸೇಷನ್ ವೈಭವ್ ಸೂರ್ಯವಂಶಿ ಅವರ ಐಪಿಎಲ್ ಪ್ರಯಾಣವು ಈಗಾಗಲೇ ಅದ್ಭುತ ಸಾಧನೆಗಳು ಮತ್ತು ಕೆಲವು ಕಠಿಣ ಪಾಠಗಳ ಮಿಶ್ರಣವಾಗಿ ರೂಪುಗೊಳ್ಳುತ್ತಿದೆ. ಆದರೆ, ರಾಜಸ್ಥಾನ್ ರಾಯಲ್ಸ್ ತಂಡದ ಮುಖ್ಯ ಕೋಚ್ ಕುಮಾರ್ ಸಂಗಕ್ಕಾರ, ಅವರು ತಮ್ಮ ಕ್ರಿಕೆಟ್ ಅನ್ನು 'ಆನಂದಿಸಬೇಕು' ಮತ್ತು ಹೀಗಾಗಿಯೇ ಅವರಿಗೆ 'ಕಡಿಮೆ ಹೇಳಿದರೆ ಉತ್ತಮ' ಎಂದು ಭಾವಿಸುತ್ತಾರೆ. ಜಸ್ಪ್ರೀತ್ ಬುಮ್ರಾ (ಮುಂಬೈ ಇಂಡಿಯನ್ಸ್) ಮತ್ತು ಜಾಶ್ ಹೇಜಲ್‌ವುಡ್ (ಆರ್‌ಸಿಬಿ) ಅವರಂತಹ ವಿಶ್ವ ಪ್ರಸಿದ್ಧ ಬೌಲರ್‌ಗಳ ವಿರುದ್ಧ ಸ್ಫೋಟಕ ಬ್ಯಾಟಿಂಗ್ ಮೂಲಕ ಎಲ್ಲರನ್ನು ಬೆರಗುಗೊಳಿಸಿದ್ದ ವೈಭವ್, ಸನ್‌ರೈಸರ್ಸ್ ಹೈದರಾಬಾದ್ ವಿರುದ್ಧದ ಕೊನೆಯ ಪಂದ್ಯದಲ್ಲಿ ಪ್ರಫುಲ್ ಹಿಂಗೆ ಅವರಿಂದ ಗೋಲ್ಡನ್ ಡಕ್‌‌ಗೆ ಔಟಾದರು.

'ವೈಭವ್‌ಗೆ ನನ್ನ ಸಂದೇಶ ಸರಳವಾಗಿದೆ: ಎಲ್ಲವನ್ನೂ ಆನಂದಿಸಿ. ಅದು 35 ಎಸೆತಗಳಲ್ಲಿ 100 ರನ್ ಆಗಿರಲಿ, 15 ಎಸೆತಗಳಲ್ಲಿ 50 ಆಗಿರಲಿ ಅಥವಾ ಮೊದಲ ಎಸೆತದಲ್ಲಿ ಡಕೌಟ್ ಆಗಿರಲಿ - ನಿಮಗೆ ರನ್ ಗಳಿಸಲು ಅವಕಾಶವಿದೆ ಮತ್ತು ನೀವು ವಿಫಲರಾಗಲು ಸಹ ಅವಕಾಶವಿದೆ. ಇದು ಕ್ರಿಕೆಟ್‌ನ ಅವಿಭಾಜ್ಯ ಅಂಗವಾಗಿದೆ' ಎಂದು ಆರ್‌ಆರ್ ಕ್ರಿಕೆಟ್ ನಿರ್ದೇಶಕ ವೈಭವ್ ಸೂರ್ಯವಂಶಿ ಸುತ್ತಲಿನ ಹೆಚ್ಚುತ್ತಿರುವ ನಿರೀಕ್ಷೆಗಳ ಬಗ್ಗೆ ಹೇಳಿದರು.

'ವೈಭವ್ ಒಬ್ಬ ರೋಮಾಂಚಕಾರಿ ಯುವ ಆಟಗಾರ. ಜನರು ಪ್ರತಿಭೆ ಬಗ್ಗೆ ಮಾತನಾಡುತ್ತಾರೆ. ಆದರೆ, ಅವರು ನೆಟ್ಸ್‌ನಲ್ಲಿ ಎಷ್ಟು ಶ್ರಮ ವಹಿಸುತ್ತಾರೆ ಎಂಬುದನ್ನು ಸಹ ಅವರು ಅರ್ಥಮಾಡಿಕೊಳ್ಳಬೇಕು. ಅವರು ಆಟವನ್ನು ನಿಜವಾಗಿಯೂ ಚೆನ್ನಾಗಿ ಓದುತ್ತಾರೆ, ಸಂದರ್ಭಗಳನ್ನು ಅರ್ಥೈಸಿಕೊಳ್ಳುತ್ತಾರೆ ಮತ್ತು ಬೌಲರ್‌ಗಳ ವಿರುದ್ಧ ಪರಿಣಾಮಕಾರಿಯಾಗಿ ಯೋಜನೆಗಳನ್ನು ರೂಪಿಸುತ್ತಾರೆ' ಎಂದರು.

ಕಳೆದ ತಿಂಗಳು 15 ವರ್ಷ ತುಂಬಿದ ಸೂರ್ಯವಂಶಿ, ಫೆಬ್ರುವರಿಯಲ್ಲಿ ಭಾರತದ ಅಂಡರ್ -19 ವಿಶ್ವಕಪ್ ವಿಜಯೋತ್ಸವದಲ್ಲಿ 80 ಎಸೆತಗಳಲ್ಲಿ 175 ರನ್ ಗಳಿಸಿದ ನಂತರ ಹೆಚ್ಚಿನ ನಿರೀಕ್ಷೆಗಳೊಂದಿಗೆ ತಮ್ಮ ಎರಡನೇ ಐಪಿಎಲ್ ಆವೃತ್ತಿಗೆ ರಾಜಸ್ಥಾನ್ ರಾಯಲ್ಸ್ ಪರ ಮರಳಿದರು.

ಐದು ಬಾರಿಯ ಚಾಂಪಿಯನ್ ಚೆನ್ನೈ ಸೂಪರ್ ಕಿಂಗ್ಸ್ ವಿರುದ್ಧದ ಮೊದಲ ಪಂದ್ಯದಲ್ಲಿ ಅವರು 17 ಎಸೆತಗಳಲ್ಲಿ 52 ರನ್ ಗಳಿಸಿದರು ಮತ್ತು ಅಂದಿನಿಂದ ಅವರು ಹಿಂತಿರುಗಿ ನೋಡಿಲ್ಲ. ಆಡಿರುವ ಐದು ಇನಿಂಗ್ಸ್‌ಗಳಲ್ಲಿ 263ಕ್ಕಿಂತ ಹೆಚ್ಚಿನ ಸ್ಟ್ರೈಕ್ ರೇಟ್‌ ಗಳಿಸಿದ್ದಾರೆ.

ಮುಂಬೈ ಇಂಡಿಯನ್ಸ್ ವಿರುದ್ಧದ ಪಂದ್ಯದಲ್ಲಿ ಬುಮ್ರಾ ವಿರುದ್ಧ ಮೊದಲ ಎಸೆತದಲ್ಲೇ ಸಿಕ್ಸರ್ ಬಾರಿಸುವ ಮೂಲಕ ಅವರು ಆಟ ಆರಂಭಿಸಿದರು ಮತ್ತು ನಂತರ ಆರ್‌ಸಿಬಿ ವಿರುದ್ಧ ಸತತ ಮೂರು ಬೌಂಡರಿ ಮತ್ತು ಒಂದು ಸಿಕ್ಸರ್ ಬಾರಿಸುವ ಮೂಲಕ ಜಾಶ್ ಹೇಜಲ್‌ವುಡ್ ಅವರನ್ನು ತರಾಟೆಗೆ ತೆಗೆದುಕೊಂಡರು.

ಸನ್ ರೈಸರ್ ವಿರುದ್ಧದ ತಮ್ಮ ವೈಫಲ್ಯದ ಬಗ್ಗೆ ಮಾತನಾಡಿದ ಸಂಗಕ್ಕಾರ, ಮುಂದೆ ಹೋದಂತೆ ಪರಿಸ್ಥಿತಿ ಸುಧಾರಿಸಿಕೊಳ್ಳುವುದಾಗಿ ಹೇಳಿದರು.

'ಇಂದಿನ ಟಿ20 ಕ್ರಿಕೆಟ್‌ನಲ್ಲಿ ಆರಂಭಿಕ ಆಟಗಾರನ ಸ್ವಭಾವವೇ ಸಂಪೂರ್ಣ ಆಕ್ರಮಣಕಾರಿಯಾಗಿರುತ್ತದೆ. ಅವನು ಮುಂದೆ ಹೋದಂತೆ ಎಲ್ಲವನ್ನೂ ಲೆಕ್ಕಾಚಾರ ಮಾಡುತ್ತಾನೆ. ಅಂತಹ ಆಟಗಾರನಿಗೆ, ಕೆಲವೊಮ್ಮೆ ಕಡಿಮೆ ಹೇಳಿದಷ್ಟೂ ಒಳ್ಳೆಯದು' ಎಂದರು.

'ಅವನು ಹೊರಗೆ ಹೋಗಿ ಆಶ್ಚರ್ಯಕರ ಭಾವನೆಯಿಂದ ಬ್ಯಾಟಿಂಗ್ ಮಾಡುವ 15 ವರ್ಷದ ಹುಡುಗನಾಗಿಯೇ ಉಳಿಯಬೇಕೆಂದು ನಾನು ಬಯಸುತ್ತೇನೆ. ಅವನು ನಿಜವಾಗಿಯೂ ಪ್ರಗತಿ ಸಾಧಿಸುವುದು ಹೀಗೆಯೇ. ಅವನಿಗೆ ಮತ್ತು ಇತರ ಎಲ್ಲರೂ ಕೆಲವೊಮ್ಮೆ ಕಡಿಮೆ ಸ್ಕೋರ್‌ ಗಳಿಸುತ್ತಾರೆ. ಆದರೆ, ವೈಭವ್ ನಮ್ಮೊಂದಿಗೆ ಇರುವುದು ನನಗೆ ತುಂಬಾ ಸಂತೋಷವಾಗಿದೆ' ಎಂದರು.