ಕೊಲಂಬೊ: ಟಿ20 ವಿಶ್ವಕಪ್ನಲ್ಲಿ ಶ್ರೀಲಂಕಾ ತಂಡದ ಕಳಪೆ ಪ್ರದರ್ಶನದ ಹಿನ್ನೆಲೆಯಲ್ಲಿ ಸನತ್ ಜಯಸೂರ್ಯ ಶ್ರೀಲಂಕಾ ತಂಡದ ಮುಖ್ಯ ಕೋಚ್ ಹುದ್ದೆಯಿಂದ ಕೆಳಗಿಳಿಯಲು ನಿರ್ಧರಿಸಿದ್ದಾರೆ.
ಸಹ-ಆತಿಥೇಯ ಶ್ರೀಲಂಕಾ ತಂಡವು ಸೂಪರ್ 8 ಹಂತದಲ್ಲಿ ತನ್ನ ಎಲ್ಲ ಪಂದ್ಯಗಳನ್ನು ಸೋತಿದೆ.
ಆರಂಭದಲ್ಲಿ ಅವರು ಜಿಂಬಾಬ್ವೆ ವಿರುದ್ಧ ಸೋತರು ಮತ್ತು ನಂತರ ಆಸ್ಟ್ರೇಲಿಯಾ, ಓಮನ್ ಮತ್ತು ಐರ್ಲೆಂಡ್ ವಿರುದ್ಧ ಗೆಲುವು ಸಾಧಿಸಿತು.
'ನನ್ನ ಒಪ್ಪಂದ ಜೂನ್ನಲ್ಲಿ ಕೊನೆಗೊಳ್ಳುತ್ತದೆ. ಆದರೆ, ಅದಕ್ಕೂ ಮೊದಲು ನಾನೇ ಈ ಹುದ್ದೆಯಿಂದ ನಿರ್ಗಮಿಸುತ್ತೇನೆ. ನನ್ನ ರಾಜೀನಾಮೆಯನ್ನು ಅಂಗೀಕರಿಸುವಂತೆ ಶ್ರೀಲಂಕಾ ಕ್ರಿಕೆಟ್ನೊಂದಿಗೆ ಮಾತನಾಡುತ್ತೇನೆ' ಎಂದು ಶನಿವಾರ ಪಾಕಿಸ್ತಾನ ವಿರುದ್ಧ ಶ್ರೀಲಂಕಾ ಸೋತ ನಂತರ ಜಯಸೂರ್ಯ ಸುದ್ದಿಗಾರರಿಗೆ ತಿಳಿಸಿದರು.
'ನಾವು ಇನ್ನೂ ಉತ್ತಮವಾಗಿ ಆಡಬೇಕಿತ್ತು. ಕ್ಷಮಿಸಿ ಮತ್ತು ಅಭಿಮಾನಿಗಳಲ್ಲಿ ಕ್ಷಮೆಯಾಚಿಸುತ್ತೇನೆ' ಎಂದು ಶ್ರೀಲಂಕಾ 1996ರ ಏಕದಿನ ವಿಶ್ವಕಪ್ ಗೆದ್ದಾಗ ಪ್ಲೇಯರ್ ಆಫ್ ದ ಟೂರ್ನಮೆಂಟ್ ಪ್ರಶಸ್ತಿ ಪಡೆದಿದ್ದ ಜಯಸೂರ್ಯ ಹೇಳಿದರು.
'ವನಿಂದು ಹಸರಂಗ, ಮಥೀಷ ಪತಿರಾಣಾ ಮತ್ತು ಕುಸಲ್ ಮೆಂಡಿಸ್ ಅವರ ಗಾಯಗಳಿಂದ ಶ್ರೀಲಂಕಾ ತಂಡ ತೀವ್ರವಾಗಿ ತೊಂದರೆಗೀಡಾಗಿದೆ. ಅವರ ಬದಲಿ ಆಟಗಾರರು ಅಗತ್ಯವಿರುವ ಮಟ್ಟಕ್ಕೆ ಪ್ರದರ್ಶನ ನೀಡಲು ಸಾಧ್ಯವಾಗಲಿಲ್ಲ. ಹಸರಂಗ ನನ್ನ ಅತ್ಯುತ್ತಮ ಆಟಗಾರ, ಅವರಿಗೆ ಬದಲಿ ಆಟಗಾರನನ್ನು ನೀವು ಸುಲಭವಾಗಿ ಹುಡುಕಲು ಸಾಧ್ಯವಿಲ್ಲ. ಕಳಪೆ ಪ್ರದರ್ಶನಕ್ಕೆ ಬೌಲರ್ ಮತ್ತು ಬ್ಯಾಟರ್ ಇಬ್ಬರೂ ಕಾರಣ' ಎಂದು ಜಯಸೂರ್ಯ ಹೇಳಿದರು.
ಅವರ ಒಂದೂವರೆ ವರ್ಷಗಳ ಸೇವೆಯಲ್ಲಿ ಶ್ರೀಲಂಕಾ ಎಲ್ಲ ಸ್ವರೂಪಗಳಲ್ಲಿ ತನ್ನ ಶ್ರೇಯಾಂಕಗಳನ್ನು ಸುಧಾರಿಸಿದೆ ಎಂದು ಜಯಸೂರ್ಯ ಹೇಳಿದರು.
Advertisement
