ಭೀಮಾ ಏತ ನೀರಾವರಿ ನಾಳೆ ಲೋಕಾರ್ಪಣೆ

ಗುಲ್ಬರ್ಗ: ಅಫಜಲ್ಪುರ ತಾಲೂಕಿನ 65 ಸಾವಿರ ಎಕರೆ ಭೂಮಿಗೆ ನೀರುಣಿಸುವ ಸಾಮರ್ಥ್ಯವಿರುವಂತಹ ಭೀಮಾ ಏತ ನೀರಾವರಿ ಯೋಜನೆ ಫೆ.19ರಂದು ಲೋಕಾರ್ಪಣೆಗೊಳ್ಳುತ್ತಿದೆ. ಇಂದಿಲ್ಲಿ ಈ ಸಂಗತಿಯನ್ನು ಅಫಜಲ್ಪುರ ಶಾಸಕ ಮಾಲೀಕಯ್ಯಾ ಗುತ್ತೇದಾರ್ ಸುದ್ದಿಗೋಷ್ಠಿಯಲ್ಲಿ ತಿಳಿಸಿದ್ದಾರೆ.
1985ರಲ್ಲಿ ಬಂಗಾರಪ್ಪ ಸಿಎಂ ಆಗಿದ್ದ ಸಂದರ್ಭದಲ್ಲಿ ತಾವು ಈ ಯೋಜನೆ ಅಫಜಲ್ಪುರದಲ್ಲಿ ಆಗಲೇಬೇಕೆಂದು ಪಟ್ಟು ಹಿಡಿದು ಇದನ್ನು ಮಂಜೂರು ಮಾಡಿಸಿಕೊಂಡು ಬಂದಿದ್ದಾಗಿ ಹೇಳಿದ ಅವರು, ಈ ಯೋಜನೆಗಾಗಿ ತಾವು ಬಂಗಾರಪ್ಪ ಸಂಪುಟದಲ್ಲಿ ಮಂತ್ರಿಗಿರಿಯನ್ನೇ ಒಲ್ಲೆಂದಿದ್ದಾಗಿ ಹಳೆಯ ಘಟನಾವಳಿಗಳನ್ನು ಮೆಲಕು ಹಾಕಿದರು.
ಬೋರಿ ಹಾಗೂ ಅಮರ್ಜಾ ನದಿಗಳ ನೆರವಿನ ಈ ಯೋಜನೆ ಹೆಚ್ಚಿನ ರೈತರಿಗೆ ಲಾಭಕಾರಿಯಾಗಲಿದೆ. ಬೋರಿ ನದಿಗೆ 4 ಬಾಂದಾರು ಹಾಗೂ ಅಮರ್ಜಾಕ್ಕೆ 10 ಬಾಂದಾರುಗಳನ್ನು ನಿರ್ಮಿಸಲಾಗಿದೆ. ಇಲ್ಲೆಲ್ಲಾ ನೀರು ನಿಲ್ಲುವ ಮೂಲಕ ಹೆಚ್ಚಿನ ಭೂಮಿ ನಿರಾವರಿಗೊಳಪಡಲಿದೆ ಎಂದರು.
ಅಂತರ್ಜಲ ಹೆಚ್ಚಳ: ಅಫಜಲ್ಪುರದಲ್ಲಿ ಏತ ನೀರಾವರಿ ಹಾಗೂ ಅಣೆಕಟ್ಟೆ, ಬಾಂದಾರುಗಳಿಂದ 100ಕ್ಕೂ ಹೆಚ್ಚು ಕಿಮೀ ನೀರು ನಿಲ್ಲುವಂತಾಗಿದೆ. ಇದರಿಂದ ಅಂತರ್ಜಲ ಮಟ್ಟ ಹೆಚ್ಚಿದೆಯಲ್ಲದೆ ಪರಿಸರಕ್ಕೂ ಹೆಚ್ಚಿನ ಅನುಕೂಲವಾಗಿದೆ ಎಂದರು.
100 ಕೋಟಿ ಅಂದಾಜು ಮೊತ್ತದ ಈ ಯೋಜನೆ ಬೆಲೆ ಏರಿಕೆಯಿಂದಾಗಿ ವೆಚ್ಚ ಪರಿಷ್ಕರಣೆಗೊಳಗಾಯ್ತು. ಹಿಂದೆ ಅಫಜಲ್ಪುರ ಪ್ರತಿನಿಧಿಸಿದ್ದ ಶಾಸಕರು ಅಲ್ಪ ಪ್ರಯತ್ನ ಮಾಡಿ ಹಣ ತಂದಿದ್ದರೂ ಈ ಯೋಜನೆ 3 ವರ್ಷಗಳ ಹಿಂದೆಯೇ ಪೂರ್ಣಗೊಳಿಸಿ ರೈತರಿಗೆ ಅನುಕೂಲ ಕಲ್ಪಿಸಬಹುದಾಗಿತ್ತು. ಆದರೆ ಯಾರೂ ಇಚ್ಛಾಶಕ್ತಿ ತೋರಲಿಲ್ಲ ಎಂದರು.
ಕೇಂದ್ರದಿಂದ 588 ಕೋಟಿ: ಅಳ್ಳಗಿ, ಬಳೂಂಡಗಿ ಬಳಿ 2 ಏತಗಳನ್ನಿಟ್ಟು ಈ ಯೋಜನೆಯ ನೀರೆತ್ತಲಾಗುತ್ತದೆ. ಇದರ ಜೊತೆಗೇ 10.5 ಮೆ.ವ್ಯಾ. ವಿದ್ಯುತ್ ಸಹ ಇಲ್ಲಿ ಉತ್ಪಾದನೆಗೊಳ್ಳುತ್ತದೆ. ಬಂಗಾರಪ್ಪ, ಕೃಷ್ಣ, ದೇವೇಗೌಡ ಸೇರಿದಂತೆ ಅನೇಕರು ಈ ಯೋಜನೆಗೆ ಅನುದಾನ ಹರಿದು ಬರುವಲ್ಲಿ ನೆರವು ನೀಡಿದ್ದಾರೆ. ಕೇಂದ್ರದಿಂದ ಈ ಯೋಜನೆಗೆ 588 ಕೋಟಿ ಹರಿದು ಬಂದಿದೆ ಎಂದರು.
ಭೀಮಾ ಏತ ನೀರಾವರಿ ಯೋಜನೆಯಡಿಯಲ್ಲಿ 6 ಟಿಎಂಸಿ ನೀರು ಸಂಗ್ರಹಿಸುವ ಅವಕಾಶಗಳಿವೆ. ಆದರೆ ಇಲ್ಲೀಗ 2 ಸೇತುವೆಗಳ ಕಾಮಗಾರಿ ಆಗಬೇಕಿರುವುದರಿಂದ 4.5 ಟಿಎಂಸಿವರೆಗೆ ಮಾತ್ರ ನೀರು ಸಂಗ್ರಹಿಸಲಾಗಿದೆ. ಇದರಿಂದಾಗಿ ಗುಲ್ಬರ್ಗ ಮಹಾನಗರದ ಕುಡಿವ ನೀರಿನ ಯೋಜನೆಗೆ ಎಂದಿಗೂ ಸಮಸ್ಯೆ ಬರುವುದಿಲ್ಲ. ಭೀಮಾ ನದಿಗೆ ಸದಾಕಾಲ ನೀರು ಇರುವಂತೆ ಅಫಜಲ್ಪುರದ ಅಣೆಕಟ್ಟೆ ಕೆಲಸ ಮಾಡಲಿದೆ ಎಂದರು.
ರಾ.ಹೆ. ಯೋಜನೆಗೆ ಚಿಂತನೆ: 2013 ಡಿಸೆಂಬರ್ ಒಳಗಾಗಿ ಗುಲ್ಬರ್ಗ- ಅಫಜಲ್ಪುರ ರಸ್ತೆ ಮೇಲ್ದರ್ಜೆಗೇರಿಸುವುದಾಗಿ ಭರವಸೆ ನೀಡಿದ ಗುತ್ತೇದಾರ್, ಈಚೆಗಷ್ಟೆ ಕೇಂದ್ರ ಸಚಿವ ಮಲ್ಲಿಕಾರ್ಜುನ ಖರ್ಗೆ ಪ್ರಸ್ತಾಪಿಸಿರುವ ಗುಲ್ಬರ್ಗ- ಅಫಜಲ್ಪುರ, ಕರ್ಜಗಿ, ಮಣ್ಣೂರ, ಹೊಸೂರ್, ಸೊಲ್ಲಾಪುರ ರಾಷ್ಟ್ರೀಯ ಹೆದ್ದಾರಿ ಯೋಜನೆಯ ಚಿಂತನೆಯನ್ನು ಸ್ವಾಗತಿಸಿದರಲ್ಲದೆ ಆದುಷ್ಟು ಬೇಗ ಈ ಯೋಜನೆ ಅನುಮೋದನೆಗೊಂಡು ಜಿಲ್ಲೆಗೆ ಬಂದಲ್ಲಿ ಹಿಂದುಳಿದ ಪ್ರದೇಶದಲ್ಲಿ ಹೆಚ್ಚಿನ ಅನುಕೂಲವಾಗುವುದರಲ್ಲಿ ಶಂಕೆಯಿಲ್ಲ ಎಂದರು.