ಕೇಂದ್ರ ರೈಲ್ವೆ ಬಜೆಟ್ನಲ್ಲಿ ಚಿಕ್ಕಮಗಳೂರಿಂದ ಸಕಲೇಶಪುರಕ್ಕೆ ರೈಲು ಸಂಚಾರ ಬಿಟ್ಟರೆ ಬೇರೆ ಯಾವುದೇ ರೀತಿಯ ಅನುಕೂಲವಾಗಿಲ್ಲ. ಇದು ಚುನಾವಣಾ ಬಜೆಟ್.
-ಎಚ್.ಟಿ.ಚಂದ್ರಶೇಖರ್, ಜಿಲ್ಲಾ ವಾಣಿಜ್ಯ ಕೈಗಾರಿಕಾ ಮಂಡಳಿ ಅಧ್ಯಕ್ಷ
ಜಿಲ್ಲೆಯಿಂದ ಹೊರ ಜಿಲ್ಲೆ ಹಾಗೂ ರಾಜ್ಯಕ್ಕೆ ರೈಲು ಸಂಪರ್ಕವೇ ಇಲ್ಲದಂತಾಗಿದ್ದು, ಬಾಂಬೆ ಹಾಗೂ ಇತರೆ ಕಡೆಗಳಿಗೆ ತೆರಳಲು ಬೆಂಗಳೂರಿನಂತಹ ನಗರಕ್ಕೆ ಹೋಗಬೇಕಾಗಿದೆ. ಪ್ರತಿ ಬಾರಿಯೂ ಜಿಲ್ಲೆಗೆ ಅನ್ಯಾಯವಾಗುತ್ತಿದೆ.
-ಬಾನು ಮುಷ್ತಾಕ್, ಸಾಹಿತಿ
ಜಿಲ್ಲೆಯಲ್ಲಿ ಹಾಸನ-ಬೆಂಗಳೂರು ಮಾರ್ಗವನ್ನು ಪೂರ್ಣಗೊಳಿಸಿ, ನಂತರ ಚಿಕ್ಕಮಗಳೂರು-ಸಕಲೇಶಪುರ ಮಾರ್ಗವನ್ನು ಪ್ರಸ್ತಾಪಿಸಬೇಕಿತ್ತು. ರೈಲ್ವೆಯನ್ನು ಖಾಸಗೀಕರಣ ಗೊಳಿಸುತ್ತಿರುವುದು ಖಂಡನೀಯ.
-ಧರ್ಮೇಶ್, ಸಿಐಟಿಯು ಕಾರ್ಯದರ್ಶಿ
ರಾಜ್ಯಕ್ಕೆ ಹೇಳಿಕೊಳ್ಳುವಂತಹ ಬಜೆಟ್ ನೀಡಿಲ್ಲ. ಜಿಲ್ಲೆಯಲ್ಲಿ ಹಳೇ ಕಾಮಗಾರಿಗಳೇ ಪೂರ್ಣಗೊಂಡಿಲ್ಲ. ಅದನ್ನು ಪೂರ್ಣಗೊಳಿಸಬೇಕಿತ್ತು. ಜೊತೆಗೆ ವಾರಕ್ಕೊಮ್ಮೆ ಎಕ್ಸ್ಪ್ರೆಸ್ ರೈಲನ್ನು ಬಿಟ್ಟಿರುವುದರಿಂದ ಪ್ರಯೋಜನವಾಗುವುದಿಲ್ಲ.
-ನಾಗೇಂದ್ರ ಗುಪ್ತ, ಉದ್ಯಮಿ
ಚಿಕ್ಕಮಗಳೂರು-ಸಕಲೇಶಪುರ ನಡುವೆ ಹೊಸ ರೈಲು ಮಾರ್ಗ ನೀಡಿರುವುದು ಅನುಕೂಲವಾಗಿದ್ದು, ಬೆಂಗಳೂರು-ಮಂಗಳೂರಿಗೆ ಎಕ್ಸ್ಪ್ರೆಸ್ ರೈಲು ಅನುಕೂಲವಾಗದು.
-ಕಿಶೋರ್ಕುಮಾರ್, ಮಲೆನಾಡು ಜನಪರ ಹೋರಾಟ ಸಮಿತಿ ಅಧ್ಯಕ್ಷ
ರೈಲ್ವೆ ಬಜೆಟ್ ಜಿಲ್ಲೆಗೆ ಯಾವುದೇ ರೀತಿ ತೃಪ್ತಿದಾಯಕ ತಂದಿಲ್ಲ. ಹಳೇ ಮಾರ್ಗವೇ ಇನ್ನೂ ಪೂರ್ಣಗೊಂಡಿಲ್ಲ. ಅಂತಹದರಲ್ಲಿ ಚಿಕ್ಕಮಗಳೂರು-ಸಕಲೇಶಪುರ ಹೊಸ ಮಾರ್ಗಕ್ಕೆ ಗ್ರೀನ್ ಸಿಗ್ನಲ್ ನೀಡಿದ್ದಾರೆ.
-ತ್ರಿನೇಶ್.ಡಿ.ಎನ್. ವಿದ್ಯಾರ್ಥಿ
ಹಾಸನದಿಂದ ಬೆಂಗಳೂರು ಹಾಗೂ ಮಂಗಳೂರಿಗೆ ಹೆಚ್ಚಿನ ರೈಲಿನ ಆವಶ್ಯಕತೆ ಇತ್ತು. ಆದ್ರೆ ಅದು ರೈಲ್ವೆ ಬಜೆಟ್ನಲ್ಲಿ ಸಾಕಾರಗೊಂಡಿಲ್ಲ. ಹಾಸನ-ಶ್ರಮವಣಬೆಳಗೊಳ ಮಾರ್ಗವನ್ನು ಬೆಂಗಳೂರಿಗೆ ವಿಸ್ತರಿಸಬೇಕಿತ್ತು.
-ರೂಪ ಹಾಸನ್, ಸಾಹಿತಿ
ಜಿಲ್ಲೆಗೆ ಇರುವಂತಹ ರೈಲುಗಳು ಸಾಲದು. ಇನ್ನೂ ಹೆಚ್ಚಿನ ಪ್ಯಾಸೆಂಜರ್ ರೈಲುಗಳನ್ನು ನೀಡಬೇಕಿತ್ತು. ಈ ಬಗ್ಗೆ ಬಜೆಟ್ ಪ್ರಸ್ತಾಪವಾಗಿಲ್ಲ. ಸಾರಿಗೆ ದರ ಹೆಚ್ಚಾಗಿದ್ದು, ಸಾರ್ವಜನಿಕರಿಗೆ ತೊಂದರೆ ಉಂಟಾಗಿದೆ.
-ಕೇಶವೇಗೌಡ, ರೈತ
ರೈಲ್ವೆ ಬಜೆಟ್ನಲ್ಲಿ ಜಿಲ್ಲೆಗೆ ಮಲತಾಯಿ ಧೋರಣೆ ಮಾಡಿದೆ. ಕೇಂದ್ರ ಸರ್ಕಾರಕ್ಕೆ ಜಿಲ್ಲೆಯ ಬಗ್ಗೆ ಕಿಂಚಿತ್ತ್ತೂ ಕಾಳಜಿ ಇಲ್ಲ. ಹಾಸನ-ಬೆಂಗಳೂರು ಮಾರ್ಗ ಪೂರ್ಣಗೊಳ್ಳದಿರುವುದು ಘೋರ ಅನ್ಯಾಯ.
-ಸಂದೇಶ್.ಕೆ.ಆರ್, ಅತಿಥಿ ಉಪನ್ಯಾಸಕ
ರೈಲ್ವೆ ಬಜೆಟ್ ನೀರಸ. ರಾಜ್ಯ ಹಾಗೂ ಜಿಲ್ಲೆಗೆ ಯಾವುದೇ ರೀತಿಯ ಸಮರ್ಪಕವಾದ ನೂತನ ರೈಲ್ವೆ ಯೋಜನೆಗಳಿಗೆ ಗ್ರೀನ್ ಸಿಗ್ನಲ್ ನೀಡದಿರುವುದು ಮಲತಾಯಿ ಧೋರಣೆಯಾಗಿದೆ. ಚುನಾವಣೆ ದೃಷ್ಟಿಕೋನದ ಬಜೆಟ್ ಅಷ್ಟೇ.
-ವೇದಮೂರ್ತಿ, ಅತಿಥಿ ಉಪನ್ಯಾಸಕ
