ಗಂಗಾವತಿ: ನಗರದ ಆರಾಧ್ಯ ದೈವ, ಕಾಯಕ ಪುರುಷ ಶ್ರೀ ಚನ್ನಬಸವಸ್ವಾಮಿ ತಾತನವರ ರಥೋತ್ಸವ ಶ್ರದ್ಧಾ-ಭಕ್ತಿಯಿಂದ ಅದ್ಧೂರಿಯಾಗಿ ಜರುಗಿತು. ಮಲ್ಲಿಕಾರ್ಜುನ ಮಠದಿಂದ ಪ್ರಾರಂಭಗೊಂಡ ರಥೋತ್ಸವ ಬಸವೇಶ್ವರ ವೃತ್ತದ ವರೆಗೂ ಸಾಗಿತು. ಬೆಳಗ್ಗೆ ಬಿಲ್ವಾರ್ಚನೆ, ವಿಶೇಷ ಅಲಂಕಾರ, ಪ್ರವಚನ, ಭಜನೆ ಮುಂತಾದ ಧಾರ್ಮಿಕ ಕಾರ್ಯಕ್ರಮಗಳು ಜರುಗಿದವು. 9 ಗಂಟೆಗೆ ಮಡಿ ರಥೋತ್ಸವ. 3 ದಿನಗಳಿಂದ ನಡೆಯುತ್ತಿರುವ ಜಾತ್ರೆಯಲ್ಲಿ ಚನ್ನಬಸವ ತಾತನವರ ಮುತ್ತಿನ ಅಡ್ಡಪಲ್ಲಕ್ಕಿ ಉತ್ಸವ ಜರುಗಿತು.
ಹರಕೆ ತೀರಿಸಿದ ಭಕ್ತರು: ಶ್ರೀ ಚನ್ನಬಸವಸ್ವಾಮಿ ತಾತನವರ ಜಾತ್ರೆ ನಿಮಿತ್ತ ಸಹಸ್ರಾರು ಭಕ್ತರು ವಿವಿಧ ಗ್ರಾಮಗಳಿಂದ ಪಾದಯಾತ್ರೆ ಮೂಲಕ ಮಠಕ್ಕೆ ಆಗಮಿಸಿ ಹರಕೆ ತೀರಿಸಿದರು. ಕಾರಟಗಿ, ಕನಕಗಿರಿ, ಶ್ರೀರಾಮನಗರ, ಮರ್ಲಾನಳ್ಳಿ, ಗೋರೆಬಾಳು ಮುಂತಾದ ಗ್ರಾಮಗಳಿಂದ ಬೆಳಗ್ಗೆಯಿಂದಲೇ ಪಾದಯಾತ್ರೆ ಪ್ರಾರಂಭಿಸಿ ರಥೋತ್ಸವ ಸಮಯಕ್ಕೆ ಆಗಮಿಸಿ, ಭಕ್ತಿ ಸಮರ್ಪಿಸಿದರು.
