ಶಿರಾ: ತುಮಕೂರಿನಲ್ಲಿನ ಪ್ರಜಾಪ್ರಗತಿ ಪತ್ರಿಕೆಯ ಕಚೇರಿಯ ಮೇಲೆ ಏಕಾಏಕಿ ನುಗ್ಗಿ ದಾಳಿ ನಡೆಸಿದ ಡಾ.ಜಿ.ಪರಮೇಶ್ವರ್ ಬೆಂಬಲಿಗರೆಂದು ಹೇಳಿಕೊಂಡ ಗುಂಪಿನ ವಿರುದ್ಧ ಶಿಸ್ತು ಕ್ರಮ ಜರುಗಿಸಬೇಕೆಂದು ತಾಲೂಕು ಕಾರ್ಯನಿರತ ಪತ್ರಕರ್ತರ ಸಂಘ ಹಾಗೂ ವಿವಿಧ ಕನ್ನಡಪರ ಸಂಘಟನೆಗಳು ಮತ್ತು ದಲಿತ ಪರ ಸಂಘಟನೆಗಳು ಒತ್ತಾಯಿಸಿವೆ.
ನಗರದ ಪ್ರವಾಸಿ ಮಂದಿರದ ವೃತ್ತದಿಂದ ತಹಸೀಲ್ದಾರ್ ಕಚೇರಿವರೆಗೆ ಪ್ರತಿಭಟನಾ ಮೆರವಣಿಗೆ ನಡೆಸಿ, ತಹಸೀಲ್ದಾರ್ ಅವರಿಗೆ ಮನವಿ ಪತ್ರ ಸಲ್ಲಿಸಲಾಯಿತು. ಈ ವೇಳೆ ಮಾತನಾಡಿದ ಪ್ರತಿಭಟನಾಕಾರರು, ನೇರ ಹಾಗೂ ನಿಷ್ಠುರವಾಗಿ ಜನತೆಗೆ ತಿಳಿಸುವ ಪತ್ರಿಕೋದ್ಯಮದ ಮೇಲೆ ಹಲ್ಲೆ ಮಾಡಿರುವ ಕಿಡಿಗೇಡಿಗಳಿಗೆ ಕಠಿಣ ಶಿಕ್ಷೆಯಾಗಬೇಕು ಎಂದು ಆಗ್ರಹಿಸಿದರು. ಪ್ರತಿಭಟನೆಯಲ್ಲಿ ನಾಗರಾಜು, ಮಾಗೋಡು ಯೋಗಾನಂದ್, ಲಕ್ಷ್ಮೀಕಾಂತ್, ಸಿದ್ದೇಶ್ವರ್, ಆರ್.ಪ್ರಕಾಶ್, ಆರ್.ಉಗ್ರೇಶ್, ಅರೆಹಳ್ಳಿ ಬಾಬು, ಅಂಜಿನಪ್ಪ, ಉಮೇಶ್, ದಶರಥ, ಶ್ರೀಮಂತ್ ಕುಮಾರ್, ಬರಗೂರು ವಿರುಪಾಕ್ಷ, ಅನಂತರಾಮು, ಸಂಜೆವಾಣಿ ಮಂಜುನಾಥ್, ಜಯಪಾಲ್, ದೇವರಾಜು, ಸೇರಿದಂತೆ ಹಲವರು ಹಾಜರಿದ್ದರು.
