ಸಿಟ್ಟು

ಬಡವನ ಸಿಟ್ಟು ದವಡೆಗೆ ಮೂಲ. ಸಿರಿವಂತನದ್ದು ಬಡವನ ಜೀವಕ್ಕೇ ಮೂಲ
    ಸಿಟ್ಟು ಎಲ್ಲವನ್ನೂ ಪ್ರಶ್ನಿಸುತ್ತದೆ ಮತ್ತು ಯಾವುದಕ್ಕೂ ಇದು ಉತ್ತರವಲ್ಲ
    ಕಲಹ ಮತ್ತು ಕೋಲಾಹಲದ ಉತ್ಪಾದಕ ಸಾಮಗ್ರಿ
    ಸೀಟು ಬಿಟ್ಟುಕೊಡಿ ಎಂದು ಹುಡುಗಿಯನ್ನು ಹೊರತು ಪಡಿಸಿ ಬೇರೆಯವರು ಕೇಳಿದಾಗ ಬರುವಂಥದ್ದು
    ಯಡಿಯೂರಪ್ಪನವರ ಸ್ವಂತದ ಆಸ್ತಿ
    ರಾಜಕಾರಣಿಗಳಿಗೆ ಸಿಟ್ಟು ಬಂದಿದೆಯೆಂದರೆ ಅವರ ಕುಟುಂಬಕ್ಕೇನೋ ಆಗಿದೆ ಎಂದರ್ಥ
    ವಾಜಪೇಯಿಗೆ ಸಿಟ್ಟು ಬಂದಿದೆಯೆಂದರೆ ದೇಶಕ್ಕೆ ಯಾರೋ ಕೆಡುಕೆಸಗಿದ್ದಾರೆಂದರ್ಥ
    ಗಂಡನಿಗೆ ಸಿಟ್ಟು ಬಂದಿದೆಯೆಂದರೆ ಬಾಸ್ ಏನೋ ಬೈದಿದ್ದಾನೆಂದರ್ಥ
    ಹೆಂಡತಿಗೆ ಸಿಟ್ಟು ಬಂದಿದೆಯೆಂದರೆ ಮಾತ್ರ ಕಾರಣ ಹುಡುಕಬಾರದು.
    ಕಾರಣವಿಲ್ಲದೆಯೂ ಬರುವ ಸಾಮರ್ಥ್ಯ ಹೆಂಡತಿಯ ಸಿಟ್ಟಿಗಿದೆ
    ಅಪ್ಪನಿಗೆ ಸಿಟ್ಟು ಬಂದಿದೆಯೆಂದರೆ ಅಮ್ಮ ತವರಿಗೆ ಹೋದವಳು ಬಂದಿಲ್ಲವೆಂದರ್ಥ.
    ಅಮ್ಮನಿಗೆ ಸಿಟ್ಟು ಬಂದಿದೆಯೆಂದರೆ ತವರಿಗೆ ಹೋದರೂ ಫೋನ್ ಮಾಡಿ ಅಪ್ಪ ತಲೆ ತಿಂದಿದ್ದಾರೆಂದರ್ಥ
    ಸಿಟ್ಟಿನಿಂದ ಕೆಲವು ಒಳ್ಳೆಯದೂ ಅಕಸ್ಮಾತ್ತಾಗಿ ಆಗಿಬಿಡುತ್ತವೆ. ರಾಜಕಾರಣಿಗಳಿಂದಲೂ ಕೆಲವು ಒಳ್ಳೆಯ ಕೆಲಸಗಳು ಆಗುವ ಹಾಗೆ
    ಕೆಲವರು ಸಿಟ್ಟು ಬಂದಾಗ ಬುಸುಬುಸು ಸಿಗರೇಟು ಸೇದುವ ಮೂಲಕ ಸುಟ್ಟು ಹಾಕುತ್ತಾರೆ.



-ವಿಶ್ವನಾಥ ಸುಂಕಸಾಳ
vishwasunkasal@yahoo.com