ರೆಸ್ಟೋರೆಂಟ್‌ಗೆ ಹೋಗದೆ ಮನೆಯಲ್ಲೇ ಮಾಡಿ ಆಂಧ್ರ ಶೈಲಿ ಚಿಲ್ಲಿ ಚಿಕನ್; ಇಲ್ಲಿದೆ ಸರಳ ರೆಸಿಪಿ..!

ಖಾರ ಮತ್ತು ಮಸಾಲೆಯುಕ್ತ ಚಿಕನ್ ಖಾದ್ಯಗಳನ್ನು ಇಷ್ಟಪಡುವವರಿಗೆ ಆಂಧ್ರ ಶೈಲಿಯ ಚಿಲ್ಲಿ ಚಿಕನ್ ಅತ್ಯುತ್ತಮ ಆಯ್ಕೆ. ಖಾರ ಮೆಣಸಿನಕಾಯಿ, ಬೆಳ್ಳುಳ್ಳಿ, ಶುಂಠಿ ಹಾಗೂ ವಿಶೇಷ ಮಸಾಲೆಗಳ ಸಮ್ಮಿಶ್ರಣ ಈ ಖಾದ್ಯಕ್ಕೆ ವಿಭಿನ್ನ ರುಚಿ ನೀಡುತ್ತದೆ. ಹೋಟೆಲ್‌ನಲ್ಲಿ ಸಿಗುವ ರುಚಿಯಲ್ಲೇ ಮನೆಯಲ್ಲೂ ಸುಲಭವಾಗಿ ಮಾಡುವ ವಿಧಾನ ಇಲ್ಲಿದೆ..

ಬೇಕಾಗುವ ಪದಾರ್ಥಗಳು...

• ಚಿಕನ್ ಮ್ಯಾರಿನೇಟ್ ಮಾಡಲು...

• ಚಿಕನ್ – 500 ಗ್ರಾಂ

• ಶುಂಠಿ-ಬೆಳ್ಳುಳ್ಳಿ ಪೇಸ್ಟ್ – 1 ಚಮಚ

• ಅಚ್ಚ ಖಾರದ ಪುಡಿ – 1 ಚಮಚ

• ಅರಿಶಿನ ಪುಡಿ – ಕಾಲು ಚಮಚ

• ಚಿಲ್ಲಿ ಸಾಸ್ – 1 ಚಮಚ

• ಕಾರ್ನ್ ಫ್ಲೋರ್ – 2 ಚಮಚ

• ಅಕ್ಕಿ ಹಿಟ್ಟು – 1 ಚಮಚ

• ಮೊಟ್ಟೆ – 1

• ಉಪ್ಪು – ರುಚಿಗೆ ತಕ್ಕಷ್ಟು

• ನಿಂಬೆ ರಸ – 1 ಚಮಚ

ಮಸಾಲೆ ತಯಾರಿಸಲು...

• ಎಣ್ಣೆ – 3 ಚಮಚ

• ಈರುಳ್ಳಿ – 2

• ಹಸಿಮೆಣಸಿನಕಾಯಿ – 5–6

• ಒಣಗಿದ ಮೆಣಸಿನಕಾಯಿ – 4

• ಬೆಳ್ಳುಳ್ಳಿ – 8 ಎಸಳು

• ಶುಂಠಿ – 1 ಇಂಚು

• ಕರಿಬೇವು – 2 ಎಸಳು

• ಸೋಯಾ ಸಾಸ್ – 1 ಚಮಚ

• ಟೊಮೆಟೊ ಸಾಸ್ – 1 ಚಮಚ

• ಕಾಳು ಮೆಣಸಿನ ಪುಡಿ – ಅರ್ಧ ಚಮಚ

• ಅಚ್ಚಖಾರದ ಪುಡಿ – ಅರ್ಧ ಚಮಚ

• ಕೊತ್ತಂಬರಿ ಸೊಪ್ಪು – ಸ್ವಲ್ಪ

• ಉಪ್ಪು – ಅಗತ್ಯಕ್ಕೆ ತಕ್ಕಷ್ಟು

ತಯಾರಿಸುವ ವಿಧಾನ...

• ಮೊದಲು ಚಿಕನ್ ತುಂಡುಗಳನ್ನು ಚೆನ್ನಾಗಿ ತೊಳೆದು ನೀರು ಬಸಿದುಕೊಳ್ಳಿ. ಬಳಿಕ ಒಂದು ಪಾತ್ರೆಯಲ್ಲಿ ಚಿಕನ್, ಶುಂಠಿ-ಬೆಳ್ಳುಳ್ಳಿ ಪೇಸ್ಟ್, ಖಾರದ ಪುಡಿ, ಅರಿಶಿನ, ಉಪ್ಪು, ನಿಂಬೆ ರಸ, ಕಾರ್ನ್ ಫ್ಲೋರ್, ಅಕ್ಕಿ ಹಿಟ್ಟು ಮತ್ತು ಮೊಟ್ಟೆ ಹಾಕಿ ಚೆನ್ನಾಗಿ ಮಿಶ್ರಣ ಮಾಡಿ. 30 ನಿಮಿಷ ಮ್ಯಾರಿನೇಟ್ ಮಾಡಲು ಬಿಡಿ.

• ಬಾಣಲೆಯಲ್ಲಿ ಎಣ್ಣೆ ಬಿಸಿ ಮಾಡಿ ಮ್ಯಾರಿನೇಟ್ ಮಾಡಿದ ಚಿಕನ್ ತುಂಡುಗಳನ್ನು ಹಾಕಿ ಮಧ್ಯಮ ಉರಿಯಲ್ಲಿ ಗರಿಗರಿಯಾಗುವವರೆಗೆ ಹುರಿಯಿರಿ. ನಂತರ ಅವುಗಳನ್ನು ತೆಗೆದು ಪ್ರತ್ಯೇಕವಾಗಿಡಿ.

• ಅದೇ ಬಾಣಲೆಗೆ ಸ್ವಲ್ಪ ಎಣ್ಣೆ ಹಾಕಿ ಸಣ್ಣಗೆ ಹೆಚ್ಚಿದ ಬೆಳ್ಳುಳ್ಳಿ, ಶುಂಠಿ ಮತ್ತು ಹಸಿಮೆಣಸಿನಕಾಯಿ ಸೇರಿಸಿ ಹುರಿಯಿರಿ.

• ನಂತರ ಒಣಗಿದ ಮೆಣಸಿನಕಾಯಿ, ಕರಿಬೇವು ಮತ್ತು ಉದ್ದಕ್ಕೆ ಹೆಚ್ಚಿದ ಈರುಳ್ಳಿ ಹಾಕಿ ಹುರಿಯಿರಿ. ಈರುಳ್ಳಿ ಸ್ವಲ್ಪ ಮೃದುವಾದ ಬಳಿಕ ಖಾರದ ಪುಡಿ ಮತ್ತು ಕಾಳುಮೆಣಸಿನ ಪುಡಿ ಸೇರಿಸಿ.

• ಈಗ ಸೋಯಾ ಸಾಸ್ ಮತ್ತು ಟೊಮೆಟೊ ಸಾಸ್ ಹಾಕಿ ಚೆನ್ನಾಗಿ ಮಿಶ್ರಣ ಮಾಡಿ. ಅಗತ್ಯವಿದ್ದರೆ ಸ್ವಲ್ಪ ನೀರು ಸೇರಿಸಿ ಮಸಾಲೆ ಹದಕ್ಕೆ ಬರುವವರೆಗೆ ಬೇಯಿಸಿ.

• ಹುರಿದ ಚಿಕನ್ ತುಂಡುಗಳನ್ನು ಮಸಾಲೆಗೆ ಸೇರಿಸಿ ಚೆನ್ನಾಗಿ ಕಲಸಿ. ಕಡಿಮೆ ಉರಿಯಲ್ಲಿ 5–7 ನಿಮಿಷ ಬೇಯಿಸಿ, ಮಸಾಲೆ ಚಿಕನ್‌ಗೆ ಚೆನ್ನಾಗಿ ಅಂಟಿಕೊಳ್ಳುವಂತೆ ಮಾಡಿ.

• ಕೊನೆಯಲ್ಲಿ ಕೊತ್ತಂಬರಿ ಸೊಪ್ಪು ಉದುರಿಸಿ ಒಲೆಯಿಂದ ಇಳಿಸಿ. ಇದೀಗ ಬಿಸಿಬಿಸಿಯಾದ ಆಂಧ್ರ ಶೈಲಿಯ ಚಿಲ್ಲಿ ಚಿಕನ್ ಸವಿಯಲು ಸಿದ್ಧ.

ಟಿಪ್ಸ್...

• ಖಾರ ಹೆಚ್ಚಿಸಲು ಹಸಿಮೆಣಸಿನಕಾಯಿ ಮತ್ತು ಒಣ ಮೆಣಸಿನಕಾಯಿಯ ಪ್ರಮಾಣವನ್ನು ನಿಮ್ಮ ರುಚಿಗೆ ತಕ್ಕಂತೆ ಹೊಂದಿಸಿಕೊಳ್ಳಿ.

• ಚಿಕನ್ ತುಂಡುಗಳನ್ನು ಹೆಚ್ಚು ಹೊತ್ತು ಹುರಿಯಬೇಡಿ; ಇಲ್ಲದಿದ್ದರೆ ಗಟ್ಟಿಯಾಗಬಹುದು.

• ಕರಿಬೇವು ಮತ್ತು ಬೆಳ್ಳುಳ್ಳಿಯನ್ನು ಚೆನ್ನಾಗಿ ಹುರಿಯುವುದರಿಂದ ವಿಶೇಷ ಸುವಾಸನೆ ಬರುತ್ತದೆ.

• ಒಣ ರೂಪದಲ್ಲಿ ಬೇಕಿದ್ದರೆ ನೀರು ಸೇರಿಸದೆ ಮಸಾಲೆಯನ್ನು ಚಿಕನ್‌ಗೆ ಚೆನ್ನಾಗಿ ಅಂಟಿಕೊಳ್ಳುವಂತೆ ಹುರಿಯಿರಿ.

• ಈ ಚಿಲ್ಲಿ ಚಿಕನ್ ಅನ್ನು ಬಿಸಿ ಅನ್ನ, ತುಪ್ಪದ ಅನ್ನ, ಪಲಾವ್ ಅಥವಾ ಚಪಾತಿಯೊಂದಿಗೆ ಸವಿಯಬಹುದು.