ಪಿಒಪಿ ಮೂರ್ತಿ ಬಳಕೆ ನಿಷೇಧಕ್ಕೆ ವ್ಯಾಪಕ ಒತ್ತಾಯ: ಇನ್ನೂ ಸವಾಲಾಗಿರುವ ಸಂಪೂರ್ಣ ಪರಿಸರ ಸ್ನೇಹಿ ಗಣಪ

ಬೆಂಗಳೂರು: ಇಂದು ಸೋಮವಾರ ನಾಡಿನೆಲ್ಲೆಡೆ ಗೌರಿ-ಗಣೇಶ ಹಬ್ಬವನ್ನು ಶ್ರದ್ಧಾ-ಭಕ್ತಿಯಿಂದ ಸಂಭ್ರಮ ಸಡಗರದಿಂದ ಆಚರಿಸಲಾಗುತ್ತಿದೆ. ಹಬ್ಬವೆಂದ ಮೇಲೆ ಅನೇಕರು ಗೌರಿ ಗಣೇಶನ ಮೂರ್ತಿಗಳನ್ನು ಮಾರುಕಟ್ಟೆಯಿಂದ ಖರೀದಿಸಿ ತಂದು ಮನೆಯೊಳಗಿಟ್ಟು ಪೂಜೆ ಮಾಡಿ ವಿಸರ್ಜಿಸುತ್ತಾರೆ.

ಹಬ್ಬದ ಹೆಸರಿನಲ್ಲಿ ಆಡಂಬರ ಬೇಡ, ಭಕ್ತಿಯ,ಸಂಸ್ಕೃತಿ ಜೊತೆಗೆ ಪರಿಸರ ಸಂರಕ್ಷಣೆಯ ಮೂಲ ತತ್ವಗಳನ್ನು ಬಲಪಡಿಸಬೇಕು, ಶಾಂತಿ ಕಾಪಾಡಬೇಕೆಂದು ಸರ್ಕಾರ, ಸಂಘ-ಸಂಸ್ಥೆಗಳು ಎಷ್ಟೇ ಮನವಿ ಮಾಡಿಕೊಂಡರೂ ಸಹ  ಅನೇಕರು ಅದನ್ನು ಮರೆಯುತ್ತಾರೆ. 

ಗೌರಿ ಗಣೇಶನಿಗೆ ಪೂಜೆ ಮಾಡಬೇಕೆಂದು ಪರಿಸರ ಸ್ನೇಹಿ, ಮಣ್ಣಿನ ಗಣಪನನ್ನು ಪೂಜಿಸುವ ಬದಲು ಅನೇಕರು ಪ್ಲಾಸ್ಟರ್ ಆಫ್ ಪ್ಯಾರಿಸ್(PoP) ಗಣಪನನ್ನು ತರುತ್ತಾರೆ. ಈ ಪಿಒಪಿ ಗಣಪ ಪರಿಸರಕ್ಕೆ ನೀರಿಗೆ ಬಹಳ ಹಾನಿಯನ್ನುಂಟುಮಾಡುತ್ತದೆ, ಅದನ್ನು ಬಳಸಬೇಡಿ ಎಂದು ಎಷ್ಟು ಹೇಳಿದರೂ ಸಂಪೂರ್ಣ ನಿಷೇಧಿಸಲು ಸರ್ಕಾರಕ್ಕೆ ಸಾಧ್ಯವಾಗಿಲ್ಲ. 

ಕಳೆದೊಂದು ದಶಕದಿಂದ ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳು ಪರಿಸರ ಸ್ನೇಹಿ ಹಬ್ಬಗಳನ್ನು ಆಚರಿಸಬೇಕೆಂದು ಜನತೆಗೆ ಕರೆ ನೀಡುತ್ತಾ ಬಂದಿವೆ. ಆದರೆ 100 ಪ್ರತಿಶತ ಯಶಸ್ಸನ್ನು ಸಾಧಿಸಲು ಸಾಧ್ಯವಾಗಲಿಲ್ಲ. ಇದು ಕೇವಲ ಪರಿಸರ ಸ್ನೇಹಿ ಗಣೇಶ ಚತುರ್ಥಿಗೆ ಸೀಮಿತವಾಗಿಲ್ಲ, ಸಮುದಾಯಗಳಾದ್ಯಂತ ಪರಿಸರ ಸ್ನೇಹಿ ಹಬ್ಬಗಳನ್ನು ಆಚರಿಸಬೇಕೆಂದು ಹೇಳುತ್ತಿದೆಯಾದರೂ ಜನರ ಮನ ಸಂಪೂರ್ಣವಾಗಿ ಪರಿವರ್ತನೆಯಾಗಿಲ್ಲ. 

ಈ ವರ್ಷದ ಗಣೇಶ ಚತುರ್ಥಿಗೆ, ಹಿಂದಿನ ಪ್ರಯತ್ನಗಳು ಕೆಲವು ಜಿಲ್ಲೆಗಳಲ್ಲಿ ಫಲಿತಾಂಶವನ್ನು ತೋರಿಸುತ್ತಿವೆ. ಸೆಪ್ಟೆಂಬರ್ 15 ರಂದು ಮುಖ್ಯ ಕಾರ್ಯದರ್ಶಿ ಅಧ್ಯಕ್ಷತೆಯಲ್ಲಿ ನಡೆದ ಎಲ್ಲಾ ಜಿಲ್ಲಾಧಿಕಾರಿಗಳ ಸಭೆಯಲ್ಲಿ, ಪ್ಲಾಸ್ಟರ್ ಆಫ್ ಪ್ಯಾರಿಸ್ (ಪಿಒಪಿ) ಮೂರ್ತಿಗಳ ಬದಲು ಶೇ 100 ರಷ್ಟು ಪರಿಸರ ಸ್ನೇಹಿ ಮೂರ್ತಿಗಳನ್ನು ಬಳಸುವ ಕರ್ನಾಟಕದ ಮೊದಲ ಜಿಲ್ಲೆ ಎಂದು ಉಡುಪಿಯನ್ನು ಪಟ್ಟಿ ಮಾಡಲಾಗಿದೆ. ಕಾರವಾರ ಕೂಡ ಪರಿಸರ ಸ್ನೇಹಿ ಮೂರ್ತಿಗಳಲ್ಲಿ ಶೇ.95ರಷ್ಟು ಯಶಸ್ಸನ್ನು ಪಡೆದಿದ್ದು, ಮಂಗಳೂರು ಶೇ.90-95ರಷ್ಟು ಅನುಸರಣೆ ಹಾಗೂ ಶಿವಮೊಗ್ಗ ಶೇ.70ರಷ್ಟು ಯಶಸ್ಸು ಕಂಡಿದೆ.

ಆದರೆ ರಾಜ್ಯದ ರಾಜಧಾನಿ ಬೆಂಗಳೂರು ತೀರಾ ಹಿಂದುಳಿದಿದೆ. ಕರ್ನಾಟಕ ರಾಜ್ಯ ಮಾಲಿನ್ಯ ನಿಯಂತ್ರಣ ಮಂಡಳಿ (KSPCB), ಬೃಹತ್ ಬೆಂಗಳೂರು ಮಹಾನಗರ ಪಾಲಿಕೆ (BBMP) ಮತ್ತು ಉಪ ಆಯುಕ್ತರ (DC) ಕಚೇರಿಯ ಪ್ರಕಾರ, ಯಶಸ್ಸಿನ ಪ್ರಮಾಣವು ಕೇವಲ ಶೇಕಡಾ 20 ರಷ್ಟಿದೆ. ಕಾರಣ ಪಿಒಪಿ ವಿಗ್ರಹಗಳ ತಯಾರಿಕೆ ಮತ್ತು ಮಾರಾಟದಲ್ಲಿ ತೊಡಗಿರುವ ವಿಶಾಲವಾದ ಅಸಂಘಟಿತ ವಲಯ ಮತ್ತು ಪಂಗಡಗಳನ್ನು ಹಾಕುವಲ್ಲಿ ಮತ್ತು ವಿಗ್ರಹಗಳನ್ನು ತರುವಲ್ಲಿ ರಾಜಕೀಯ ಬೆರೆತಿದೆ. 

“ಸಣ್ಣ ವಿಗ್ರಹಗಳೆಲ್ಲವೂ ಮಣ್ಣಿನಿಂದ ಮಾಡಲ್ಪಟ್ಟಿರುವುದರಿಂದ ನಮಗೆ ಯಾವುದೇ ತೊಂದರೆ ಇಲ್ಲ. ದೊಡ್ಡ ವಿಗ್ರಹಗಳದ್ದೇ ಸಮಸ್ಯೆ. ತಯಾರಕರು ಮತ್ತು ಮಾರಾಟಗಾರರು ಇದು ಜೇಡಿಮಣ್ಣು ಎಂದು ಹೇಳಿಕೊಂಡರೂ, ಆಗಿರುವುದಿಲ್ಲ. 5 ಅಡಿಗಿಂತ ಎತ್ತರದ ಯಾವುದೇ ವಿಗ್ರಹವನ್ನು ಶೇಕಡಾ 100ರಷ್ಟು ಮಣ್ಣಿನಿಂದ ಮಾಡಿರುವುದು ಅಸಾಧ್ಯ. ಇದು ಭಾರವಾಗಿರುತ್ತದೆ ಮತ್ತು ತಯಾರಿಸಲು ಮತ್ತು ಸಾಗಿಸಲು ಕಷ್ಟ. ಹಾಗಾಗಿ 5 ಅಡಿ ಎತ್ತರದ ಚಿಕ್ಕ ಮೂರ್ತಿಗಳನ್ನು ಬಳಸಬೇಕು ಎಂದು ಒತ್ತಾಯಿಸುತ್ತಿದ್ದೇವೆ ಎಂದು ಕೆಎಸ್‌ಪಿಸಿಬಿಯ ಹಿರಿಯ ಅಧಿಕಾರಿಯೊಬ್ಬರು ಹೇಳುತ್ತಾರೆ.

ವಿಜ್ಞಾನಿ ಮತ್ತು ಮಳೆ ನೀರು ಕೊಯ್ಲು ತಜ್ಞ ಎಆರ್ ಶಿವಕುಮಾರ್, ಸಮಸ್ಯೆ ಕೇವಲ ಪಿಒಪಿ ವಿಗ್ರಹಗಳಲ್ಲದೇ ಭಾರೀ ಲೋಹಗಳು ಮತ್ತು ರಾಸಾಯನಿಕ ಬಣ್ಣಗಳಿಂದ ಕೂಡಿದೆ. ಹೊಳಪು ಪಡೆಯಲು ಮತ್ತು ವಿಗ್ರಹಗಳು ಆಕರ್ಷಕವಾಗಿ ಕಾಣುವಂತೆ ಮಾಡಲು ಹೊಳಪು ಬಣ್ಣಗಳನ್ನು ಬಳಸಲಾಗುತ್ತದೆ, ಅದು ಪರಿಸರಕ್ಕೆ ಹಾನಿಕಾರಕವಾಗಿದೆ. ಅವುಗಳಿಂದ ಬಿಡುಗಡೆಯಾಗುವ ತೈಲ ಮತ್ತು ರಾಸಾಯನಿಕಗಳು ಜಲಮೂಲಗಳ ಮೇಲೆ ಪದರವನ್ನು ರೂಪಿಸುತ್ತವೆ, ಕರಗಿದ ಆಮ್ಲಜನಕದ ಮಟ್ಟವನ್ನು ಕಡಿಮೆ ಮಾಡಿ ಮೀನುಗಳ ಸಾವಿಗೆ ಕಾರಣವಾಗುತ್ತದೆ.

ಸೀಸ ಮತ್ತು ರಾಸಾಯನಿಕ ರಹಿತ ಬಣ್ಣದ ವಿಗ್ರಹಗಳಲ್ಲಿ ಬಹಳ ಕಡಿಮೆ ಯಶಸ್ಸನ್ನು ಸಾಧಿಸಲಾಗಿದೆ ಎಂದು ಹಿರಿಯ KSPCB ಅಧಿಕಾರಿಯೊಬ್ಬರು ಹೇಳುತ್ತಾರೆ. ತರಕಾರಿ ಮತ್ತು ಸಾವಯವ ಬಣ್ಣಗಳಂತಹ ಪರಿಸರ ಸ್ನೇಹಿ ಬಣ್ಣಗಳನ್ನು ಬಳಸಬೇಕೆಂದು ನಾವು ಒತ್ತಾಯಿಸುತ್ತಿದ್ದೇವೆ. ಆದರೆ ತಯಾರಕರು ಮತ್ತು ಮಾರಾಟಗಾರರು ಅವುಗಳನ್ನು ಬಳಸುತ್ತಿಲ್ಲ ಎಂದು ಸಮಸ್ಯೆ ಹೇಳಿಕೊಳ್ಳುತ್ತಾರೆ. 

ಪಿಒಪಿ ನೀರಿನಲ್ಲಿ ಕರಗುವುದಿಲ್ಲ ಎನ್ನುತ್ತಾರೆ ಕೆಎಸ್‌ಪಿಸಿಬಿಯ ಹಿರಿಯ ಪರಿಸರ ಅಧಿಕಾರಿ ಯತೀಶ್ ಜಿ. ಇದು ಪರಿಸರಕ್ಕೆ ಹಾನಿಕಾರಕವಾಗಿದೆ. ಪಿಒಪಿ ರಚಿಸಲು ಜಿಪ್ಸಮ್ ನ್ನು 120-180 ಡಿಗ್ರಿ ಸೆಲ್ಸಿಯಸ್‌ನಲ್ಲಿ ಬಿಸಿಮಾಡಲಾಗುತ್ತದೆ. ನಂತರ ಅದನ್ನು ಸಿಮೆಂಟ್ ನೊಂದಿಗೆ ಬೆರೆಸಿ ವಿಗ್ರಹಗಳನ್ನು ಮಾಡುತ್ತಾರೆ. ಇದರ ವಿಲೇವಾರಿ ಪರಿಸರಕ್ಕೂ ಹಾನಿಕಾರಕ ಎನ್ನುತ್ತಾರೆ ಅವರು.
ಪರಿಸರ ಸ್ನೇಹಿ ಹಬ್ಬಗಳನ್ನು ಆಚರಿಸಲು ರಾಜ್ಯ ಸರ್ಕಾರ ಸೆಪ್ಟೆಂಬರ್ 15 ರಂದು ಪಿಒಪಿ ವಿಗ್ರಹಗಳ ಮಾರಾಟ, ತಯಾರಿಕೆ ಮತ್ತು ವಿಸರ್ಜನೆ ನಿಷೇಧಿಸಿ ಸರ್ಕಾರಿ ಆದೇಶವನ್ನು ಹೊರಡಿಸಿತು. ಅಲ್ಲದೆ, ಜಲ ಕಾಯಿದೆ, 1974 ರ ಸೆಕ್ಷನ್ 24 ರ ಪ್ರಕಾರ, ಜಲಮೂಲಗಳನ್ನು ಕಲುಷಿತಗೊಳಿಸುವುದು ಶಿಕ್ಷಾರ್ಹ ಅಪರಾಧವಾಗಿದೆ. ಪರಿಸರ ಸಂರಕ್ಷಣಾ ಕಾಯ್ದೆ, ಸೆಕ್ಷನ್ 15 ರ ಅಡಿಯಲ್ಲಿ ಪ್ರಕರಣಗಳನ್ನು ದಾಖಲಿಸಲು ಸರ್ಕಾರಿ ಸಂಸ್ಥೆಗಳಿಗೆ ಅಧಿಕಾರ ನೀಡಲಾಗಿದೆ.

ಹಿರಿಯ ಸರ್ಕಾರಿ ಅಧಿಕಾರಿಯೊಬ್ಬರು, ಒಮ್ಮೆ ವಿಗ್ರಹವನ್ನು ಸ್ಥಾಪಿಸಿದರೆ, ನಾವು ಏನನ್ನೂ ಮಾಡಲು ಸಾಧ್ಯವಿಲ್ಲ. ಹಾಗಾಗಿ ಪಿಒಪಿ ವಿಗ್ರಹಗಳನ್ನು ಪ್ರತಿಷ್ಠಾಪಿಸದಂತೆ ಕ್ರಮಕೈಗೊಳ್ಳುತ್ತಿದ್ದೇವೆ. ಸಿಂಗಲ್-ವಿಂಡೋ ಕ್ಲಿಯರೆನ್ಸ್ ನ್ನು ಕಠಿಣಗೊಳಿಸಿದ್ದೇವೆ. ಅನುಮತಿ ನೀಡುವ ಮುನ್ನ ವಿಗ್ರಹಗಳ ವಿವರಗಳನ್ನು ಪರಿಶೀಲಿಸುವಂತೆ ಪೊಲೀಸರು ಮತ್ತು ನಿಗಮಗಳಿಗೆ ಸೂಚಿಸಲಾಗಿದೆ.

ಪಿಒಪಿ ಮೂರ್ತಿಗಳ ಸ್ಥಾಪನೆಗೆ ಅನುಮತಿ ನೀಡುತ್ತಿಲ್ಲ. ಯಾವುದೇ ರಾಜಕೀಯ ಹಸ್ತಕ್ಷೇಪವಿಲ್ಲದಿದ್ದರೆ ಅದನ್ನು ಸಾಧಿಸಬಹುದು. ಅನೇಕ ಕಡೆಗಳಲ್ಲಿ ಪಂಡಾಲ್‌ಗಳಿಗೆ ಶಾಸಕರು, ಸಂಸದರು ಮತ್ತು ಮಾಜಿ ಕಾರ್ಪೊರೇಟರ್‌ಗಳ ಬೆಂಬಲವಿದೆ. ಬೆಂಗಳೂರು, ಬೆಳಗಾವಿ, ಮಂಗಳೂರು ಮತ್ತು ಇತರ ಶ್ರೇಣಿ-2 ನಗರಗಳಲ್ಲಿ ಇದು ಪ್ರಮುಖ ಸಮಸ್ಯೆಯಾಗಿದೆ.

ಹಿರಿಯ ದೇವಸ್ಥಾನದ ಅರ್ಚಕರೊಬ್ಬರು, ಈಗಾಗಲೇ ಬುಕ್ ಮಾಡಿರುವುದರಿಂದ ನಾವು ದೊಡ್ಡ ಪಿಒಪಿ ವಿಗ್ರಹವನ್ನು ಸ್ಥಾಪಿಸುತ್ತಿದ್ದೇವೆ. ಹಬ್ಬ ಹರಿದಿನಗಳು ಬಂದಾಗ ಸರ್ಕಾರವು ಘೋಷಣೆಗಳನ್ನು ಮಾಡಲು ಪ್ರಾರಂಭಿಸುತ್ತದೆ, ಆದೇಶಗಳನ್ನು ಹೊರಡಿಸುತ್ತದೆ ಎನ್ನುತ್ತಾರೆ. 

ಬೆಂಗಳೂರು ಮಹಾನಗರ ಗಣೇಶೋತ್ಸವ ಸಮಿತಿಯ ಸದಸ್ಯ ರಾಜಣ್ಣ ನರೇಂದ್ರ, ಪರಿಸರ ಸ್ನೇಹಿ ವಿಗ್ರಹಗಳನ್ನು ಪ್ರಚಾರ ಮಾಡುವ ಕೆಲಸ ಮಾಡುತ್ತಿದ್ದೇವೆ, ಆದರೆ ರಾಜಕಾರಣಿಗಳು ಅಥವಾ ಗಣ್ಯರು ಪಂಗಡಗಳನ್ನು ಸ್ಥಾಪಿಸಿ ಕಾರ್ಯಕ್ರಮದ ಪ್ರಾಯೋಜಕತ್ವದಲ್ಲಿ ತೊಡಗಿಸಿಕೊಂಡಾಗ ಕಷ್ಟವಾಗುತ್ತದೆ.

ಪರಿಸರ ಪ್ರಯತ್ನಗಳು

ಬೆಂಗಳೂರು: ಪರಿಸರ ಸ್ನೇಹಿ ವಿಗ್ರಹಗಳ ಸ್ಥಾಪನೆಗೆ ಅನುಮತಿ ನೀಡಲು ಬಿಬಿಎಂಪಿ, ಪೊಲೀಸ್ ಮತ್ತು ಡಿಸಿ ಕಚೇರಿ 63 ಉಪವಿಭಾಗ ಕಚೇರಿಗಳನ್ನು ರಚಿಸಿದೆ. ಗೊತ್ತುಪಡಿಸಿದ ವಿಸರ್ಜನಾ ಕೇಂದ್ರಗಳನ್ನು 39 ಸ್ಥಳಗಳಲ್ಲಿ ಪಟ್ಟಿ ಮಾಡಲಾಗಿದೆ, ಜೊತೆಗೆ 418 ಮೊಬೈಲ್ ಗಣೇಶ ವಿಸರ್ಜನೆ ಟ್ಯಾಂಕ್‌ಗಳು ಕೇವಲ ಮಣ್ಣಿನ ವಿಗ್ರಹಗಳನ್ನು ಸ್ವೀಕರಿಸುತ್ತವೆ. ದಾಳಿ ನಡೆಸಿ ಪಿಒಪಿ ವಿಗ್ರಹಗಳನ್ನು ವಶಪಡಿಸಿಕೊಳ್ಳಲು ಮಾರ್ಷಲ್‌ಗಳು, ಪೊಲೀಸ್, ಕಂದಾಯ ಮತ್ತು ಸಾರಿಗೆ ಇಲಾಖೆ ಅಧಿಕಾರಿಗಳ ತಂಡಗಳನ್ನು ಸಹ ರಚಿಸಲಾಗಿದೆ.

ಉಡುಪಿ: ಸುಮಾರು 478 ಸಾರ್ವಜನಿಕ ಗಣೇಶೋತ್ಸವ ಸಮಿತಿಗಳು ಗಣೇಶ ಮೂರ್ತಿಗಳ ತಯಾರಿಕೆಯಲ್ಲಿ ಪಿಒಪಿ ಮೂರ್ತಿಗಳನ್ನು ಬಳಸದಂತೆ ನೋಡಿಕೊಳ್ಳುತ್ತಿವೆ. ಉಡುಪಿಯ ಪರಿಸರ ಅಧಿಕಾರಿ ಡಾ.ಕೆ.ಎಂ.ರಾಜು, ಪರಿಸರ ಸ್ನೇಹಿ ಹಬ್ಬವಾಗಲು ಜನರು ಮಾರ್ಗಸೂಚಿಗಳನ್ನು ಪಾಲಿಸಬೇಕು. ವಿಗ್ರಹಗಳ ತಯಾರಿಕೆಯಲ್ಲಿ ಬಳಸುವ ಕೆಲವು ಅಲಂಕಾರಿಕ ವಸ್ತುಗಳು ಪರಿಸರ ಸ್ನೇಹಿಯಲ್ಲ, ಆದ್ದರಿಂದ ವಿಗ್ರಹ ತಯಾರಕರು ಈ ಬಗ್ಗೆಯೂ ಗಮನ ಹರಿಸಬೇಕು ಎಂದು ಅವರು ಹೇಳಿದರು.

ಕಲಬುರಗಿ: ಪರಿಸರ ಸ್ನೇಹಿ ಮೂರ್ತಿಗಳನ್ನು ಜನಪ್ರಿಯಗೊಳಿಸುವಲ್ಲಿ ಕೆಎಸ್‌ಪಿಸಿಬಿಗೆ ಸಂಕಷ್ಟ ಎದುರಾಗಿದೆ. ಪರಿಸರ ಸ್ನೇಹಿ ಮೂರ್ತಿಗಳ ಬಳಕೆಗೆ ತಯಾರಕರು, ಮಾರಾಟಗಾರರು ಮತ್ತು ಸಾರ್ವಜನಿಕರಿಂದ ಉತ್ತಮ ಪ್ರತಿಕ್ರಿಯೆ ಸಿಗುತ್ತಿಲ್ಲ ಎನ್ನುತ್ತಾರೆ ಪ್ರಾದೇಶಿಕ ಕೆಎಸ್‌ಪಿಸಿಬಿ ಅಧಿಕಾರಿ ಮಂಜಪ್ಪ. ತಯಾರಕರು ಮತ್ತು ಮಾರಾಟಗಾರರ ವಿರುದ್ಧ ದೂರು ನೀಡಲು ನಮ್ಮ ಅಧಿಕಾರಿಗಳು ನಿರಂತರವಾಗಿ ಪೊಲೀಸ್ ಠಾಣೆಗಳಿಗೆ ಭೇಟಿ ನೀಡುತ್ತಿದ್ದಾರೆ. ಕಲಬುರಗಿ ಜಿಲ್ಲೆಯಲ್ಲಿ ಗುರುವಾರ ಸಂಜೆಯವರೆಗೂ ಒಂದೇ ಒಂದು ಪ್ರಕರಣವನ್ನು ಪೊಲೀಸರು ದಾಖಲಿಸಿಲ್ಲ' ಎಂದು ಅವರು ಹೇಳುತ್ತಾರೆ.

ಬೀದರ್: ಅರಣ್ಯ ಮತ್ತು ಪರಿಸರ ಸಚಿವ ಈಶ್ವರ್ ಖಂಡ್ರೆ ಪ್ರತಿನಿಧಿಸುವ ಬೀದರ್ ಜಿಲ್ಲೆಯಲ್ಲೂ ಅದೇ ಆಗಿದೆ ಎಂದು ಮಂಜಪ್ಪ ಹೇಳುತ್ತಾರೆ. ಇತ್ತೀಚೆಗಷ್ಟೇ ಬೀದರ್ ಜಿಲ್ಲೆಯ ಭಾಲ್ಕಿಯಲ್ಲಿ ದಾಖಲಾದ ದೂರಿಗೆ ಕೆಎಸ್‌ಪಿಸಿಬಿ ಪೊಲೀಸರ ಸ್ವೀಕೃತಿಯನ್ನು ಪಡೆದುಕೊಂಡಿದೆ.

ಧಾರವಾಡ: ಸಾರ್ವಜನಿಕರು ಪಿಒಪಿ ವಿಗ್ರಹಗಳ ತಯಾರಿಕೆ ಅಥವಾ ಮಾರಾಟದ ಬಗ್ಗೆ ಅಧಿಕಾರಿಗಳಿಗೆ ಕರೆ ಮಾಡಿ ಮಾಹಿತಿ ನೀಡಬಹುದಾದ ಸಹಾಯವಾಣಿ ಸಂಖ್ಯೆಗಳನ್ನು ಜಿಲ್ಲಾಡಳಿತ ಪಟ್ಟಿ ಮಾಡಿದೆ. ಮಾರಾಟದ ಸ್ಥಳದಿಂದ ಮಾದರಿಗಳನ್ನು ಸಂಗ್ರಹಿಸಿ ಪರೀಕ್ಷೆಗೆ ಕಳುಹಿಸಲಾಗುತ್ತದೆ. ಕೆಲವು ಮಾರಾಟಗಾರರಿಗೆ ಎಚ್ಚರಿಕೆ ನೀಡಲಾಗಿದೆ ಮತ್ತು ಪಿಒಪಿ ಸಂಗ್ರಹವನ್ನು ಹಿಂತಿರುಗಿಸುವಂತೆ ಮಾಡಲಾಗಿದೆ. ಸಂಬಂಧಿತ ಕಾಯಿದೆಗಳ ಅಡಿಯಲ್ಲಿ ತಯಾರಕರಿಗೆ 10,000 ರೂಪಾಯಿಗಳವರೆಗೆ ದಂಡ ವಿಧಿಸಲಾಗಿದೆ. ಗಡಿ ಭಾಗಗಳಲ್ಲಿ ಚೆಕ್‌ಪೋಸ್ಟ್‌ಗಳನ್ನು ಸ್ಥಾಪಿಸಲಾಗಿದೆ.

ಶಿವಮೊಗ್ಗ: ಪರಿಸರ ಸ್ನೇಹಿ ಮೂರ್ತಿಗಳನ್ನು ಬಳಸುವಂತೆ ಸಾರ್ವಜನಿಕರು ಹಾಗೂ ಶಾಲಾ-ಕಾಲೇಜುಗಳಲ್ಲಿ ಜಾಗೃತಿ ಮೂಡಿಸಲಾಗಿದೆ ಎಂದು ಕೆಎಸ್‌ಪಿಸಿಬಿ ಪ್ರಾದೇಶಿಕ ಅಧಿಕಾರಿ ಮಹೇಶ್ವರಪ್ಪ ಎಂ.ಎಸ್. ಜಲಮೂಲಗಳಲ್ಲಿ ವಿಗ್ರಹಗಳನ್ನು ಮುಳುಗಿಸಲು ಯಾರಿಗೂ ಅವಕಾಶವಿಲ್ಲ. ಇಲ್ಲಿಯವರೆಗೆ ತಯಾರಕರು ಅಥವಾ ಮಾರಾಟಗಾರರ ವಿರುದ್ಧ ಯಾವುದೇ ಪ್ರಕರಣಗಳು ದಾಖಲಾಗಿಲ್ಲ. ಶಿವಮೊಗ್ಗ ನಗರದಲ್ಲಿ ಪರಿಸರ ಸ್ನೇಹಿ ಮೂರ್ತಿಗಳಿಗೂ ಬೇಡಿಕೆ ಹೆಚ್ಚಿದೆ.

ಕೊಡಗು: ಗಣೇಶ ಚತುರ್ಥಿ ಆಚರಣೆಯನ್ನು ಪರಿಸರ ಸ್ನೇಹಿಯಾಗಿಸಲು ರಾಷ್ಟ್ರೀಯ ಹಸಿರು ದಳ (ಎನ್‌ಜಿಸಿ) ಕಳೆದ 12 ವರ್ಷಗಳಿಂದ ಶ್ರಮಿಸುತ್ತಿದೆ. ಎನ್‌ಜಿಸಿ ಸದಸ್ಯರು ಸರ್ಕಾರಿ ಶಾಲೆಗಳಿಗೆ ಭೇಟಿ ನೀಡಿ ಪರಿಸರ ಸ್ನೇಹಿ ವಿಗ್ರಹಗಳನ್ನು ಉತ್ತೇಜಿಸಲು ಕಾರ್ಯಾಗಾರಗಳನ್ನು ನಡೆಸುತ್ತಾರೆ. ಕೋವಿಡ್ -19 ಸಾಂಕ್ರಾಮಿಕ ಸಮಯದಲ್ಲಿ ಅದೇ ರೀತಿ ಮಾಡಲಾಯಿತು. ಪರಿಸರ ಸ್ನೇಹಿ ಹಬ್ಬಕ್ಕಾಗಿ ವಿದ್ಯಾರ್ಥಿಗಳು ಜನಜಾಗೃತಿಯನ್ನೂ ಮೂಡಿಸುತ್ತಿದ್ದಾರೆ.

ವಿಜಯಪುರ: ಸುಪ್ರೀಂ ಕೋರ್ಟ್ ಆದೇಶದ ನಡುವೆಯೂ ಈ ಹಿಂದೆ ಮೂರ್ತಿ ವಿಸರ್ಜನೆಗೆ ತೆರೆದ ಬಾವಿ ಮತ್ತಿತರ ನೈಸರ್ಗಿಕ ಜಲಮೂಲಗಳನ್ನು ಬಳಸಲಾಗುತ್ತಿತ್ತು. ಆದಾಗ್ಯೂ, 2017 ರಿಂದ, ಇದನ್ನು ತಡೆಯಲು ಕಠಿಣ ಕ್ರಮಗಳನ್ನು ಜಾರಿಗೆ ತರಲಾಗಿದೆ. ಜಲಮೂಲಗಳನ್ನು ರಕ್ಷಿಸಲು ಬೇಲಿಗಳನ್ನು ರಚಿಸಲಾಗಿದೆ ಮತ್ತು ಗೊತ್ತುಪಡಿಸಿದ ಸ್ಥಳಗಳನ್ನು ಮಾತ್ರ ಅನುಮತಿಸಲಾಗಿದೆ. ಅನೇಕ ಗಣೇಶ ಮಂಡಳಿಗಳು ಸ್ವಯಂಪ್ರೇರಣೆಯಿಂದ ದೊಡ್ಡ ಪಿಒಪಿ ಮೂರ್ತಿಗಳನ್ನು ಸ್ಥಾಪಿಸುವುದನ್ನು ನಿಲ್ಲಿಸಿವೆ.

ಗದಗ: ಪಿಒಪಿ ವಿಗ್ರಹಗಳನ್ನು ತಪ್ಪಿಸಲು ವಿಗ್ರಹ ತಯಾರಕರ ಸಂಘವು ಈಗ ಎಪಿಎಂಸಿ ಮಾರುಕಟ್ಟೆಗಳಲ್ಲಿ ವಿಗ್ರಹಗಳನ್ನು ಮಾರಾಟ ಮಾಡುತ್ತಿದೆ. ಯಾವುದೇ ಪಿಒಪಿ ಬಳಕೆಯಾಗದಂತೆ ನೋಡಿಕೊಳ್ಳಲು ಒಂದೇ ಸೂರಿನಡಿ ವಿಗ್ರಹಗಳನ್ನು ತಯಾರಿಸಿ ಮಾರಾಟ ಮಾಡುವ ಕಲ್ಪನೆಯು ದಶಕದ ಹಿಂದೆ ಪ್ರಾರಂಭವಾಯಿತು. ಸಾರ್ವಜನಿಕರು ಪರಿಸರ ಸ್ನೇಹಿ ಮೂರ್ತಿಗಳನ್ನು ಮಾತ್ರ ಖರೀದಿಸುವಂತೆ ಮೂರ್ತಿ ತಯಾರಕರ ಸಂಘದ ಕಾರ್ಯದರ್ಶಿ ಮುತ್ತಣ್ಣ ಭಾರಾಡಿ ಮನವಿ ಮಾಡಿದ್ದಾರೆ. ಕೆಲವೆಡೆ ಸ್ಥಳೀಯರು ಪಿಒಪಿ ಮೂರ್ತಿಗಳ ಮಾರಾಟದ ಬಗ್ಗೆ ಮಾಹಿತಿ ನೀಡಿದ್ದರೂ ಮಾರಾಟಗಾರರು ಪರಾರಿಯಾಗುವ ವೇಳೆ ಮೂರ್ತಿಗಳನ್ನು ವಶಪಡಿಸಿಕೊಳ್ಳಲಾಗಿದೆ.

ಬೆಳಗಾವಿ: ಹಲವಾರು ವರ್ಷಗಳಿಂದ ಪರಿಸರ ಸ್ನೇಹಿ ಮೂರ್ತಿಗಳ ಮಹತ್ವದ ಕುರಿತು ಹಲವಾರು ಪರಿಸರವಾದಿಗಳು, ಎನ್‌ಜಿಒಗಳು, ಮಹಾನಗರ ಪಾಲಿಕೆ ಮತ್ತು ಪೊಲೀಸ್ ಅಧಿಕಾರಿಗಳು ಜಾಗೃತಿ ಮೂಡಿಸುವಲ್ಲಿ ನಿರತರಾಗಿದ್ದಾರೆ, ಆದರೆ ನೀರಸ ಪ್ರತಿಕ್ರಿಯೆಯನ್ನು ಕಂಡಿದೆ. ಇದುವರೆಗೆ ಪೊಲೀಸರು ಪಿಒಪಿ ವಿಗ್ರಹಗಳನ್ನು ಸ್ಥಾಪಿಸಿದ ಯಾವುದೇ ವ್ಯಕ್ತಿಯ ವಿರುದ್ಧ ಒಂದೇ ಒಂದು ಪ್ರಕರಣವನ್ನು ದಾಖಲಿಸಿಲ್ಲ. ಪಿಒಪಿ ಮೂರ್ತಿಗಳು ನೀರಿನಲ್ಲಿ ವಿಸರ್ಜಿಸುವುದಿಲ್ಲವಾದ್ದರಿಂದ ಪರಿಸರ ಸ್ನೇಹಿ ಗಣೇಶಗಳು ಇಂದಿನ ಅಗತ್ಯವಾಗಿದೆ ಎಂದು ಎನ್‌ಜಿಒ ಆಯು ಫೌಂಡೇಶನ್ ಸಂಸ್ಥಾಪಕ ಮನೋಜ್ ಸುತಾರ್ ಹೇಳುತ್ತಾರೆ.

ಮೈಸೂರು: ಸಾರ್ವಜನಿಕರ ದೂರಿನ ಮೇರೆಗೆ ಮೈಸೂರು ಮಹಾನಗರ ಪಾಲಿಕೆ ಆರೋಗ್ಯ ಇಲಾಖೆ ಅಧಿಕಾರಿಗಳು ಸೆ.5ರಂದು ಹೆಬ್ಬಾಳದಲ್ಲಿ ಪಿಒಪಿ ವಿಗ್ರಹಗಳನ್ನು ವಶಪಡಿಸಿಕೊಂಡಿದ್ದಾರೆ.

ಹಾಸನ: ಪರಿಸರ ಸ್ನೇಹಿ ಆಚರಣೆಗೆ ಜಿಲ್ಲಾ ಪ್ರಾಧಿಕಾರ ಮಾರ್ಗಸೂಚಿ ರೂಪಿಸಿದೆ. ಜಿಲ್ಲಾಧಿಕಾರಿ ಸಿ ಸತ್ಯಭಾಮಾ ಅವರು ವಿಗ್ರಹಗಳ ತಯಾರಿಕೆ ಮತ್ತು ಮಾರಾಟವನ್ನು ನಿಷೇಧಿಸಿ ನಿಯಮಗಳಿಗೆ ಬದ್ಧವಾಗಿ ವ್ಯಾಪಾರಿಗಳಿಗೆ ವಿಗ್ರಹಗಳನ್ನು ಮಾರಾಟ ಮಾಡಲು ತಾತ್ಕಾಲಿಕ ಶೆಡ್‌ಗಳನ್ನು ಮಂಜೂರು ಮಾಡಲು ಆದೇಶಿಸಿದರು. ಅರಸೀಕೆರೆ ತಾಲೂಕಿನ ರಾಮಸಾಗರದಲ್ಲಿ ಜೇಡಿಮಣ್ಣು ಹೆಚ್ಚಿನ ಪ್ರಮಾಣದಲ್ಲಿ ದೊರೆಯುವುದರಿಂದ ಗಣೇಶ ಮೂರ್ತಿ ತಯಾರಿಕೆಯಲ್ಲಿ ಜನಪ್ರಿಯವಾಗಿದೆ ಎನ್ನುತ್ತಾರೆ ಶಿಲ್ಪಿ ವೆಂಕಟೇಶ ಆಚಾರ್.