ಪ್ರಕೃತಿಗೇ ಸವಾಲು ಹಾಕುವ ಏಕೈಕ ಜೀವಿ ಮನುಷ್ಯ. ನಿದ್ರೆ ಮತ್ತು ಎಚ್ಚರದ ಸ್ಥಿತಿಯ ಚಕ್ರವನ್ನು ಸಕೇಡಿಯನ್ ಸೈಕಲ್ ಎಂದು ಕರೆಯಲಾಗುತ್ತದೆ. ಈ ನಿದ್ರಾ ಚಕ್ರವನ್ನೇ ತನಗೆ ಬೇಕಾದ ಹಾಗೆ ಮನುಷ್ಯ ಬದಲಾಯಿಸಿಕೊಂಡಿದ್ದಾನೆ. ಆರೋಗ್ಯಕರ ಹಾಗೂ ಸಂತಸದ ಜೀವನದ ರಹಸ್ಯ ಅಡಗಿರುವುದೇ ಸಕೇಡಿಯನ್ ಸೈಕಲ್ನಲ್ಲಿ. ಪ್ರಕೃತಿದತ್ತವಾಗಿ ಬಂದಿರುವ ಸಕೇಡಿಯನ್ ಪದ್ಧತಿಯನ್ನು ಅನುಸರಿಸುವುದರಿಂದ ನಮಗೆ ಒಳಿತಾಗುವುದು.
ನಾವು ಮನುಷ್ಯರು ಹಲವಾರು ಅಭ್ಯಾಸಗಳನ್ನು ರೂಢಿಸಿಕೊಂಡವರು. ನಮ್ಮಸುತ್ತಲಿನ ಪರಿಸರಕ್ಕೆ ತಕ್ಕಂತೆ ಬದುಕುತ್ತಲೇ ನಮಗೆ ಬೇಕಾದ ಮಾರ್ಗಗಳನ್ನು ಹುಟ್ಟು ಹಾಕಿದವರು. ಕಾಡುಮೇಡುಗಳಲ್ಲಿ ಅಲೆಯುತ್ತಿದ್ದವರು, ಗೆಡ್ಡೆ ಗೆಣಸುಗಳನ್ನು ತಿನ್ನುತ್ತಿದ್ದವರು ಇಂದು ಕಾರು, ಬೈಕು, ವಿಮಾನಗಳಲ್ಲಿ ಹಾರಾಡುತ್ತಿದ್ದೇವೆ. ಮನೆಗಳಲ್ಲಿ, ಹೋಟೆಲ್ ಗಳಲ್ಲಿ ನಮಗಿಷ್ಟದ ಆಹಾರ ತಯಾರಿಸಿ ತಿನ್ನುತ್ತಿದ್ದೇವೆ. ಆದರೆ ನಾವು ಮರೆಯಬಾರದ ಸಂಗತಿ ಎಂದರೆ ನಾವು ಯಾವತ್ತಿದ್ದರೂ ಪ್ರಕೃತಿಯ ಸೃಷ್ಟಿ.
ಈ ದಿನ ಎಂಥಾ ಪರಿಸ್ಥಿತಿ ಬಂದೊದಗಿದೆ ಎಂದರೆ ನಾವು ಪ್ರಕೃತಿಯ ಸೂಚನೆಯನ್ನೇ ಪಾಲಿಸುತ್ತಿಲ್ಲ. ಸಾಧನೆಯ ನೆಪವೊಡ್ಡಿ ಆರೋಗ್ಯ ಮತ್ತು ನಿದ್ದೆಯನ್ನು ತ್ಯಾಗ ಮಾಡುತ್ತಿರುವ ಏಕೈಕ ಜೀವಿ ಮನುಷ್ಯ. ತಿಂಗಳ ಸಂಬಳ, ಯಶಸ್ಸು, ಜನಪ್ರಿಯತೆ, ಹುದ್ದೆ, ಅಧಿಕಾರ, ಸ್ಟೇಟಸ್ ಮತ್ತಿತ್ಯಾದಿ ಆಮಿಷಗಳಿಗಾಗಿ ಅವೆಲ್ಲಕ್ಕಿಂತ ಅಮೂಲ್ಯವಾದ ಜೀವನವನ್ನೇ ಪಣಕ್ಕಿಡುತ್ತಿದ್ದೇವೆ.
ನಮ್ಮ ದೇಹ, ಅತ್ಯಂತ ಬುದ್ಧಿವಂತಿಕೆಯಿಂದ ಪರಿಸರ ಸಮತೋಲನವನ್ನು ಗಮನದಲ್ಲಿರಿಸಿಕೊಂಡು ರೂಪಿಸಲಾಗಿದೆ. ಈ ದೇಹ ಸೃಷ್ಟಿಯ ಲಯಕ್ಕೆ ತಕ್ಕಂತೆಯೇ ಅಭಿವೃದ್ಧಿ ಹೊಂದಿದೆ. ಈ ಲಯವನ್ನು ಸಕೇಡಿಯನ್ ರಿದಂ ಎನ್ನುತ್ತಾರೆ. ಸರಳವಾಗಿ ಹೇಳಬೇಕೆಂದರೆ ಸಕೇಡಿಯನ್ ರಿದಂ ಎಂದರೆ ನಿದ್ರಾ ಚಕ್ರ ಅಥವಾ ರಾತ್ರಿ ಹಗಲಿನ ಚಕ್ರ. 24 ಗಂಟೆಗಳ ಅವಧಿಯಲ್ಲಿ ನಿದ್ರಾ ಸ್ಥಿತಿ, ಜಾಗೃತ ಸ್ಥಿತಿ, ಹಸಿವು, ಬಾಯಾರಿಕೆ ಮತ್ತಿತರ ಕ್ರಿಯೆಗಳು ಸಹಜವಾಗಿ ಜರುಗುತ್ತಿರುತ್ತವೆ. ನಮ್ಮ ಪ್ರತಿಯೊಂದು ಕ್ರಿಯೆಯೂ ಸಕೇಡಿಯನ್ ರಿದಂ ಪ್ರಕಾರ ನಡೆಯುತ್ತಿರುತ್ತದೆ.
ಯಾವತ್ತೂ ನೈಟ್ ಶಿಫ್ಟ್ ಕೆಲಸ ಮಾಡದ ವ್ಯಕ್ತಿ ಒಂದು ದಿನ ಅಚಾನಕ್ ಆಗಿ ರಾತ್ರಿ ಪಾಳಿ ಕೆಲಸ ಮಾಡಿದಾಗ ಇಲ್ಲವೇ ಒಬ್ಬ ವ್ಯಕ್ತಿ ಒಂದು ದೇಶದಿಂದ ಬೇರೆಯದೇ ಟೈಂ ಝೋನ್ ವಲಯದ ದೇಶಕ್ಕೆ ವಿಮಾನಪ್ರಯಾಣ ಮಾಡಿದಾಗ ದೇಹದ ಜೈವಿಕ ಗಡಿಯಾರ (ಬಯೋಲಾಜಿಕಲ್ ಕ್ಲಾಕ್) ಏರುಪೇರಾಗುತ್ತದೆ. ಇದರಿಂದ ನಿದ್ರಾ ಚಕ್ರ ಹಾಳಾಗುತ್ತದೆ. ಅದು ಮುಂದಿನ ಇಡೀ ದಿನ ನಮ್ಮನ್ನು ಕಾಡುತ್ತದೆ. ಎಂದಿನಂತೆ ಹಸಿವು, ಬಾಯಾರಿಕೆ ಅಗುತ್ತಿದ್ದ ಸಮಯದಲ್ಲಿ ಆಗುತ್ತಿಲ್ಲ. ನಿದ್ದೆ ಬಾರದ ಸಮಯದಲ್ಲಿ ನಿದ್ದೆ ಬರುವುದು ಹೀಗೆ ಇಡೀ ವ್ಯವಸ್ಥೆಯೇ ಬದಲಾಗುತ್ತದೆ. ಪ್ರಕೃತಿಯ ಸಕೇಡಿಯನ್ ಲಯದ ವಿರುದ್ಧ ನಾವು ಹೋದಾಗ ಈ ಬಗೆಯ ಅಸಮತೋಲನ ಉಂಟಾಗುತ್ತದೆ. ಇದು ಮುಂದೆ ಅನಾರೋಗ್ಯಕ್ಕೂ ಕಾರಣವಾಗಬಹುದು.
ಒಂದೆರಡು ವರ್ಷಗಳ ಹಿಂದೆ ಓರ್ವ ಮಹಿಳೆ ತನ್ನ ಸಮಸ್ಯೆಗೆ ಪರಿಹಾರ ಕಂಡುಕೊಳ್ಳಲು ನನ್ನ ಬಳಿ ಬಂದಿದ್ದಳು. ಆಕೆಯ ಸಮಸ್ಯೆ ಎಂದರೆ ಆಕೆಯ ನಿದ್ರಾಚಕ್ರ ಅಸ್ತವ್ಯಸ್ತಗೊಂಡಿದ್ದು. ಆಕೆ ಪ್ರತಿದಿನ ರಾತ್ರಿ 12 ಗಂಟೆಗೆ ನಿದ್ದೆ ಮಾಡುತ್ತಿದ್ದಳು. ಸಂಜೆ 7 ಗಂಟೆಗೆ ವ್ಯಾಯಾಮ ಮಾಡುತ್ತಿದ್ದರು. ಇದರಿಂದಾಗಿ ಅವರ ಆರೋಗ್ಯದಲ್ಲಿ ಏರುಪೇರು ಕಂಡುಬಂದಿತ್ತು. ಹೀಗಾಗಿ ಈ ಏರುಪೇರನ್ನು ಹೋಗಲಾಡಿಸಲು ಪರಿಹಾರ ಕೋರಿ ನನ್ನ ಬಳಿ ಬಂದಿದ್ದರು.
ಅವರಿಗೆ ಪ್ರತಿದಿನ ರಾತ್ರಿ 10 ಗಂಟೆಗೆ ಮಲಗಲು ಹಾಗೂ ಬೆಳಿಗ್ಗೆ 7 ಗಂಟೆಗೆ ಸಲಹೆ ನೀಡಿದೆ. ಅದಕ್ಕೆ ಹೊಂದಿಕೊಳ್ಳಲು ಅವರಿಗೆ ಕಷ್ಟವಾಯಿತು. ಆದರೆ ನಿಧಾನವಾಗಿ ಅದಕ್ಕೆ ಹೊಂದಿಕೊಂಡರು. ಕೇವಲ ಒಂದೇ ವಾರದಲ್ಲಿ ಅವರ ಆರೋಗ್ಯದಲ್ಲಿ ಸುಧಾರಣೆ ಕಂಡುಬಂದಿತು.
ಈ ಸುಧಾರಣೆಗೆ ಕಾರಣವಾಗಿದ್ದು ಮತ್ಯಾರೂ ಅಲ್ಲ ಆಕೆಯ ದೇಹ. ಯಾವುದೇ ಬಗೆಯ ಮಾತ್ರೆ ತೆಗೆದುಕೊಳ್ಳದೆ, ವಿಶೇಷ ಆಹಾರ ಸೇವಿಸದೆ ಕೇವಲ ನಿದ್ದೆ ಸಮಯದಲ್ಲಿ ಬದಲಾವನೆ ಮಾಡುವ ಮೂಲಕ ದೇಹಕ್ಕೆ ಚೈತನ್ಯ ದೊರೆತಿತ್ತು. ಅದರಿಂದ ಅವರ ಸಮಸ್ಯೆ ಪರಿಹಾರವಾಗಿತ್ತು. ಅಂದರೆ ಇನ್ನೊಂದು ರೀತಿಯಲ್ಲಿ ಹೇಳುವುದಾದರೆ ಅವರು ಪ್ರಕೃತಿಗೆ ವಿರುದ್ಧವಾದ ನಿದ್ರಾ ಅಭ್ಯಾಸಗಳನ್ನು ರೂಢಿಸಿಕೊಂಡಿದ್ದರು. ಆ ಮಹಿಳೆ ಮತ್ತೆ ಪ್ರಕೃತಿಯ ನಿಯಮಾನುಸಾರ ನಿದ್ದೆ ಮಾಡಿದಾಗ ಅವರ ಸಮಸ್ಯೆಗೆ ಪರಿಹಾರ ಸಿಕ್ಕಿತ್ತು.
ಒಂದು ದಶಕಕ್ಕೂ ಮೀರಿದ ನನ್ನ ವೃತ್ತಿ ಬದುಕಿನಲ್ಲಿ ನಾನು ಮತ್ತು ನನ್ನ ತಂಡ ಅಸಂಖ್ಯ ಬಗೆಯ ರೋಗಿಗಳಿಗೆ ಚಿಕಿತ್ಸೆ ನೀಡಿದ್ದೇವೆ. ಅವರಲ್ಲಿ ಪ್ರಾಣಾಂತಿಕ ಕಾಯಿಲೆಯಾದ ಕ್ಯಾನ್ಸರ್ ನಿಂದ ಬಳಲುತ್ತಿರುವವರೂ ಸೇರಿದ್ದಾರೆ. ಅತ್ಯಪರೂಪದ ಕಾಯಿಲೆಯಿಂದ ಬಳಲುತ್ತಿದ್ದವರೂ ಸೇರಿದ್ದಾರೆ. ಅವರಿಗೆ ಔಷಧೋಪಚಾರದ ಜೊತೆಗೇ ಆರೋಗ್ಯಕರ ಜೀವನಶೈಲಿ ರೂಢಿಸಿಕೊಳ್ಳಬೇಕಾದ ಅಗತ್ಯತೆಯೂ ಬೇಕಾಗುತ್ತದೆ. ಸಕೇಡಿಯನ್ ಜೀವನಶೈಲಿಯತ್ತ ಅವರಿಗೆ ಮಾರ್ಗವನ್ನು ತೋರಬೇಕಾಗುತ್ತದೆ.
ಸಕೇಡಿಯನ್ ಜೀವನಶೈಲಿಯನ್ನು ಅನುಸರಿಸುವುದು ಎಂದ ಮಾತ್ರಕ್ಕೆ ಎಲ್ಲಾ ಸುಖ ಸಂತೋಷಗಳನ್ನು ತ್ಯಜಿಸಬೇಕು ಎಂದು ತಿಳಿಯಬೇಕಿಲ್ಲ. ಸಾಮಾಜಿಕ ಬದುಕನ್ನು ಹೊಂದುವುದರ ಜೊತೆ ಜೊತೆಗೇ ಇದನ್ನು ಅಳವಡಿಸಿಕೊಳ್ಳಬಹುದು. ನಿಜ ಹೇಳಬೇಕೆಂದರೆ ಸಕೇಡಿಯನ್ ರಿದಂ ಎನ್ನುವುದು ಹೊಚ್ಚ ಹೊಸ ಪದ್ಧತಿಯೇನಲ್ಲ. ಪ್ರಕೃತಿ ನಮಗೋಸ್ಕರವೇ ರೂಪಿಸಿದ ಜೀವನ ಶೈಲಿ ಅದು.
ನಮ್ಮ ಪೂರ್ವಜರು ಸಕೇಡಿಯನ್ ರಿದಂ ಅನುಸಾರವೇ ಬದುಕು ಕಟ್ಟಿಕೊಂಡಿದ್ದರು. ಆದರೆ ನಾವಿಂದು ಆಧುನಿಕ ಜೀವನದ ಭರಾಟೆಯಲ್ಲಿ ಅದರಿಂದ ಬಹು ದೂರ ಸಾಗಿ ಬಂದುಬಿಟ್ಟಿದ್ದೇವೆ. ಹೀಗಾಗಿ ನಾವೆಲ್ಲರೂ ಮತ್ತೆ ಸಕೇಡಿಯನ್ ರಿದಂ ಜೀವನಶೈಲಿಯತ್ತ ಮರಳಬೇಕಿದೆ. ಅದಕ್ಕಾಗಿ ನಾವು ಮಾಡಬೇಕಿರುವುದಿಷ್ಟೇ. ಮೊದಲು ಅದರ ಕುರಿತು ಚೆನ್ನಾಗಿ ತಿಳಿದುಕೊಳ್ಳಬೇಕು ನಂತರ ನಮ್ಮ ಜೀವನದಲ್ಲಿ ಅಳವಡಿಸಿಕೊಳ್ಳಬೇಕು.
ನಮ್ಮ ಮೆದುಳಿನಲ್ಲಿರುವ ಹೈಪೊಥಾಲ್ಮಸ್ ಭಾಗದಲ್ಲಿಯೇ ನಮ್ಮ ದೇಹದ ಮಾಸ್ಟರ್ ಗಡಿಯಾರ ಇರುವುದು. ನಮ್ಮ ದೇಹದ ಎಲ್ಲಾ ಕ್ರಿಯೆಗಳ ಗಡಿಯಾರಗಲನ್ನು ಅದುವೇ ನಿಯಂತ್ರಿಸುತ್ತದೆ. ಇದೇ ಭಾಗ ಸಕೇಡಿಯನ್ ರಿದಂ ಅನ್ನೂ ನಿಯಂತ್ರಿಸುತ್ತದೆ. ಅತ್ಯಂತ ಚಿಕ್ಕ ಸಂಗತಿಗಳಿಂದ ಮೊದಲಾಗಿ ಸಂಕೀರ್ಣ ಸಂಗತಿಗಳೂ ಇದರ ವ್ಯಾಪ್ತಿಗೆ ಒಳಪಟ್ಟಿರುತ್ತದೆ. ಒಳ್ಳೆಯ ನಿದ್ದೆ, ಶಕ್ತಿ, ಭಾವನೆಗಳು, ಹೃದಯ ಬಡಿತದ ನಿಯಂತ್ರಣ, ರಕ್ತದೊತ್ತಡ, ಸಕ್ಕರೆ ಅಂಶ, ಜೀರ್ಣ ವ್ಯವಸ್ಥೆ, ರೋಗನಿರೋಧಕ ಶಕ್ತಿ, ದೇಹದ ತಾಪಮಾನ ಹೀಗೆ ಹಲವನ್ನು ಹೈಪೊಥಾಲ್ಮಸ್ ನಿಯಂತ್ರಣ ಮಾಡುತ್ತದೆ. ಈ ಮಾಸ್ಟರ್ ಗಡಿಯಾರ ಕೆಲಸ ಮಾಡದೆ ನಿಂತುಹೋದರೆ ದೇಹದಲ್ಲಿ ಏರುಪೇರು ಉಂಟಾಗುತ್ತದೆ.
ಈ ಭಾಗದ ಪ್ರಮುಖ ಕೆಲಸ ಮಿಕ್ಕೆಲ್ಲಾ ಭಾಗಗಳಿಗೆ ಸಿಗ್ನಲ್ ಕಳುಹಿಸುವುದು. ಬೆಳಕನ್ನು ಅವಲಂಬಿಸಿ ಈ ಭಾಗ ಕಾರ್ಯ ನಿರ್ವಹಿಸುತ್ತದೆ ಎಂದರೆ ಅಚ್ಚರಿಯಾಗಬಹುದು. ಬೆಳಕು ಮತ್ತು ಕತ್ತಲು ಇದನ್ನು ಗ್ರಹಿಸಿ ಅದರ ಆಧಾರದಲ್ಲಿ ದೇಹದ ವಿವಿಧ ಅಂಗಗಳಿಗೆ ಹೈಪೊಥಾಲ್ಮಸ್ ಭಾಗದಿಂದ ಸೂಚನೆಗಳು ರವಾನಿಸಲ್ಪಡುತ್ತವೆ.
ವ್ಯಕ್ತಿಯೊಬ್ಬ ನಿದ್ದೆ ಮಾಡುವ ಸಮಯದಲ್ಲಿ ಕೆಲಸ ಮಾಡಿದಾಗ ಮತ್ತು ಬೇರೆ ಟೈಂ ಜೋನಿನ ದೇಶಕ್ಕೆ ವಿಮಾನ ಪ್ರಯಾಣ ಮಾಡಿದ ಸಂದರ್ಭದಲ್ಲಿ ಈ ಹೈಪೊಥಾಲ್ಮಸ್ ಭಾಗಕ್ಕೆ ಗೊಂದಲವಾಗುತ್ತದೆ. ರಾತ್ರಿ ಯಾವುದು ಹಗಲು ಯಾವುದು ಎಂಬುದು ಅದಕ್ಕೆ ತಿಳಿಯುವುದಿಲ್ಲ. ಬೇರೊಂದು ದೇಶಕ್ಕೆ ವಿಮಾನಪ್ರಯಾಣ ಮಾಡಿದ ಸಂದರ್ಭ ಈ ವಿದ್ಯಮಾನವನ್ನು ಸಾಮಾನ್ಯವಾಗಿ ಗಮನಿಸಬಹುದು. ಅದನ್ನೇ ಜೆಟ್ ಲ್ಯಾಗ್ ಎನ್ನುತ್ತಾರೆ. ಸ್ವಲ್ಪ ಸಮಯದ ನಂತರ ಪರಿಸ್ಥಿತಿ ತಹಬದಿಗೆ ಬಂದು ಸರಿಯಾಗುತ್ತದೆ. ಆದರೆ ಅದೇ ಅಭ್ಯಾಸ ಮಾಡಿಕೊಂಡಾಗ ಅನಾರೋಗ್ಯ ತಲೆದೋರುತ್ತದೆ.
ಅಪಾಯಕಾರಿಯಗಲೂ ಬಲ್ಲುದು. ಅಧಿಕ ರಕ್ತದೊತ್ತಡ, ರೋಗ ನಿರೋಧಕ ಶಕ್ತಿ ಕುಂದುವಿಕೆ, ಮಾನಸಿಕ ಆರೋಗ್ಯದಲ್ಲೂ ಏರುಪೇರು ಹೀಗೆ ಹಲವು ಸಮಸ್ಯೆಗಳು ಕಾಡಬಲ್ಲುದು. ಉತ್ತಮ ಆಹಾರ ಸೇವನೆ, ಯೋಗ, ಪ್ರಾಣಯಾಮ, ಪ್ರಾರ್ಥನೆ ಇವೆಲ್ಲಾ ಮಾಡಿದರೂ ಜೈವಿಕ ಗಡಿಯಾರದ ವ್ಯವಸ್ಥೆಗೆ ತಕ್ಕಂತೆ ಇರದಿದ್ದರೆ ಅಪಾಯ ಕಟ್ಟಿಟ್ಟ ಬುತ್ತಿ.
ಅಪಕ್ವ ಜೀವನಶೈಲಿಯಿಂದ ಜೈವಿಕ ಗಡಿಯಾರಕ್ಕೆ ಹಾನಿ ತಗುಲುತ್ತದೆ. ಇನ್ನೂ ಖಚಿತವಾಗಿ ಜೈವಿಕ ಗಡಿಯಾರ ಹಾಳುಗೆಡವುವ ಅಂಶಗಳನ್ನು ಈ ಕೆಳಗೆ ನೀಡಲಾಗಿದೆ.
ರಾತ್ರಿ ಪಾಳಿ ಕೆಲಸ
ಜೆಟ್ ಲ್ಯಾಗ್ (ಬೇರೆ ಟೈಮ್ ಜೋನ್ ದೇಶಕ್ಕೆ ವಿಮಾನ ಪ್ರಯಾಣ)
ದೂರ ಪ್ರಯಾಣ ಮತ್ತು ನಿಯಮಿತ ಪ್ರಯಾಣ
ಕೆಫೀನ್, ತಂಬಾಕು, ಆಲ್ಕೊಹಾಲ್, ಮಾದಕವಸ್ತು ಮತ್ತು ಸಾಮಾಜಿಕ ಜಾಲತಾಣಗಳ ಬಳಕೆ
ಮೆನೊಪಾಸ್ ಅಥವಾ ಪ್ರೆಗ್ನನ್ಸಿ ಸಮಯದ ಹಾರ್ಮೋನ್ ಬದಲಾವಣೆ
ರಾತ್ರಿ ಎಲೆಕ್ಟ್ರಾನಿಕ್ ಪರದೆಯ ನೀಲಿ ಬೆಳಕಿಗೆ ಹೆಚ್ಚಾಗಿ ತೆರೆದುಕೊಂಡಾಗ
ನಿದ್ದೆ, ಆಹಾರ ಸೇವನೆ ಮತ್ತು ವ್ಯಾಯಾಮದ ಸಮಯವನ್ನು ಆಗಾಗ ಬದಲಿಸುತ್ತಿರುವುದು
ಈ ಪ್ರಯೋಜನಕಾರಿಯ ಸಕೇಡಿಯನ್ ಜೀವನಪದ್ಧತಿಯನ್ನು ಅಳವಡಿಸಿಕೊಳ್ಳಲು ಹಣ ತೆರಬೇಕೆ? ಅದಕ್ಕೆ ಉತ್ತರ ಇಲ್ಲಿದೆ. ಖಂಡಿತವಾಗಿಯೂ ಹಣ ತೆರಬೇಕಿಲ್ಲ. ಯಾರು ಬೇಕಾದರೂ ತಮ್ಮ ದಿನಚರಿಯನ್ನು ಸಕೇಡಿಯನ್ ಪದ್ಧತಿಯ ಅನುಸಾರ ರೂಪಿಸಿಕೊಳ್ಳುವುದರ ಮೂಲಕ ಅದರ ಪ್ರಯೋಜನವನ್ನು ಪಡೆದುಕೊಳ್ಳಬಹುದು. ಅದರಿಂದ ಉಂಟಾಗುವ ಬದಲಾವಣೆಯನ್ನು ಬಹಳ ಬೇಗನೆ ಗುರುತಿಸಬಹುದಾಗಿದೆ. ಅಲ್ಲದೆ ದಿನವಿಡೀ ಮನಸ್ಸು ಮತ್ತು ದೇಹ ಉಲ್ಲಸಿತವಾಗಿರುತ್ತದೆ.
ನೆನಪಿಡಿ, ಸಕೇಡಿಯನ್ ಜೀವನಶೈಲಿಯನ್ನು ಅಭಿವೃದ್ಧಿಪಡಿಸಿರುವುದು ಅತಿ ದೊಡ್ಡ ತಜ್ಞರು. ಅದು ಯಾರೆಂದು ತಿಳಿದುಕೊಳ್ಳಬೇಕೇ? ಇನ್ಯಾರೂ ಅಲ್ಲ ಪ್ರಕೃತಿ! ಸಕೇಡಿಯನ್ ಜೀವನಶೈಲಿಯನ್ನು ಪಾಲನೆ ಮಾಡಲು ಕಠಿಣವಾಗುತ್ತಿದೆಯೇ? ಹಾಗಾದರೆ ನಿಮಗೆ ಅನುಕೂಲವಾಗುವ ಹಾಗೆ ಮಾರ್ಪಾಡುಗಳನ್ನು ಮಾಡಿಕೊಳ್ಳಬಹುದು. ಆ ಮೂಲಕ ನಿಮಗೆ ಬೇಕಾದ ಮಾದರಿಯಲ್ಲೇ ಸಕೇಡಿಯನ್ ಜೀವನಶೈಲಿಯನ್ನು ರೂಢಿಸಿಕೊಳ್ಳಬಹುದು. ಕಾಲ ಬದಲಾದರೂ ನಮ್ಮ ದೇಹ ಮತ್ತು ಅದರ ಕಾರ್ಯವಿಧಾನ ಬದಲಾಗದು. ಪ್ರಕೃತಿ ಕೂಡಾ ಅದೇ ರೀತಿ.
(ಹೆಚ್ಚಿನ ಮಾಹಿತಿಗೆ ಲೇಖಕರ 'A New Way of Living - Circadian Rhythm' ಪುಸ್ತಕವನ್ನು ಉಚಿತವಾಗಿ ಡೌನ್ ಲೋಡ್ ಮಾಡಿಕೊಳ್ಳಬಹುದು.)
ಮೂಲ ಲೇಖಕರು: ಲ್ಯೂಕ್ ಕುಟಿನ್ಹೊ
ಲೈಫ್ ಸ್ಟೈಲ್ ಕೋಚ್ ಮತ್ತು ಬರಹಗಾರರು
Advertisement