ಕತ್ತಲ ಕೋಣೆಯ ಮ್ಯಾಜಿಕ್ ಎಂದೇ ಪ್ರಸಿದ್ಧವಾದ ಸಿನೆಮಾ ಕಲೆಗೆ ವಿಶ್ವದಾದ್ಯಂತ ಇದು ಸಂಕ್ರಮಣ ಕಾಲ. ಭಾರತದ ಮಟ್ಟಿಗೆ, ಕರ್ನಾಟಕಕ್ಕೂ ಈ ಮಾತು ಅನ್ವಯ. ತಂತ್ರಜ್ಞಾನದಲ್ಲಿ ಆಗಿರುವ ಬೆಳವಣಿಗೆಯಿಂದ, ಚಲನಚಿತ್ರ ತಯಾರಿಕೆ ಪ್ರತಿಭಾವಂತರಿಗೆ-ಆಸಕ್ತರಿಗೆ ಕೈಗೆಟಕುವಷ್ಟು ಹತ್ತಿರವಾಗಿದೆ. ಹೀಗಿದ್ದೂ, ಸಿನೆಮಾ ಮಾಡಿ ಮುಗಿಸುವ ಹಾದಿಯೇನು ಸುಗಮವಾಗಿಲ್ಲ. ಪಟ್ಟಭದ್ರ ಹಿತಾಸಕ್ತಿಗಳ ನಡುವೆಯೇ ಸಿನೆಮಾ ವಿತರಣಾ ಮಾರ್ಗ, ಚಿತ್ರಮಂದಿರಗಳ ಮಾಲೀಕತ್ವ, ಮತ್ತಿತರ ಪ್ರಮುಖ ಸಂಪನ್ಮೂಲಗಳು ವಶದಲ್ಲಿರುವುದರಿಂದ ಸವಾಲಂತೂ ಇದ್ದೆ ಇದೆ. ಇಂತಹ ಸವಾಲುಗಳನ್ನು ಮೀರಿ, ಹೇಗೋ ಸಂಪನ್ಮೂಲಗಳ ಕೊರತೆಯನ್ನು ನೀಗಿಸಿಕೊಂಡು, ಅಥವಾ ವಿನೂತನ ಮಾರ್ಗಗಳಲ್ಲಿ ಅವುಗಳನ್ನು ಕ್ರೋಢೀಕರಿಸಿಕೊಂಡು, ಸಾಮಾಜಿಕ ಜಾಲತಾಣಗಳ ಮೂಲಕ ವಿಭಿನ್ನವಾಗಿ ಪ್ರಚಾರ ಮಾಡಿ, ಪ್ರೇಕ್ಷಕರ ಗಮನ ಸೆಳೆಯಲು ಸಫಲವಾಗಿ, ಮೊದಲಿಗೆ ಸಣ್ಣ ಮಟ್ಟದಲ್ಲಿ, ಬಾಡಿಗೆ ಇಲ್ಲದ ಮಲ್ಟಿಪ್ಲೆಕ್ಸ್ ಸ್ಕ್ರೀನ್ ಗಳಲ್ಲಿ ಸಿನೆಮಾ ಬಿಡುಗಡೆ ಮಾಡಿ, ಜನರ ಬಾಯಿಂದ ಬಾಯಿಗೆ ಹರಿದಂತೆ, ಚಿತ್ರಮಂದಿರಗಳನ್ನು ಹೆಚ್ಚಿಸಿಕೊಂಡು ಸಾಧಾರಣ ಯಶಸ್ಸು ಕಂಡು ಮೆಚ್ಚುಗೆಗೆ ಪಾತ್ರವಾದ ಬೆರಳೆಣಿಕೆಯ ಸಿನೆಮಾಗಳಾದರು ಕನ್ನಡ ಚಿತ್ರರಂಗದಲ್ಲಿ ಮೂಡಿ ಬಂದದ್ದೇ ಈ ವರ್ಷದ ಮುಖ್ಯಾಂಶಗಳಲ್ಲಿ ಒಂದು!