ನವದೆಹಲಿ: ಕಳೆದ ಲೋಕಸಭೆ ಚುನಾವಣೆಯಲ್ಲಿ ಭಾರತೀಯ ಜನತಾ ಪಕ್ಷ(ಬಿಜೆಪಿ) ಭರ್ಜರಿ ಜಯಗಳಿಸಿದ್ದ ನಿಮಗೆಲ್ಲ ತಿಳಿದೆ ಇದೆ. ಫಲಿತಾಂಶ ದಿನ ಎಲ್ಲಾ ರಾಜಕೀಯ ಪಕ್ಷಗಳು ಸೇರಿದಂತೆ ದೇಶದ ಜನತೆ ಫಲಿತಾಂಶಕ್ಕಾಗಿ ಕಾತುರರಾಗಿದ್ದರು.
ಆದರೆ ಬಿಜೆಪಿ ಪ್ರಧಾನಿ ಅಭ್ಯರ್ಥಿಯಾಗಿದ್ದ ನರೇಂದ್ರ ಮೋದಿ ಅವರು ಮಾತ್ರ 2014, ಮೇ 16ರಂದು ಮತ ಎಣಿಕೆ ದಿನ ಟಿವಿ ಮುಂದೆ ಕೂರದೆ ಧ್ಯಾನಕ್ಕೆ ಶರಣಾಗಿದ್ದರು ಎಂಬ ವಿಷಯವನ್ನು ಲ್ಯಾನ್ಸ್ ಪ್ರೈಸ್ ಎಂಬುವರು ತಮ್ಮ ಹೊಸ ಪುಸ್ತಕದಲ್ಲಿ ಬರೆದಿದ್ದಾರೆ.
ನರೇಂದ್ರ ಮೋದಿ ಅಂದು ಮಧ್ಯಾಹ್ನ 12 ಗಂಟೆಯವರೆಗೂ ಯಾವ ಸಂಪರ್ಕವೂ ಇಲ್ಲದೇ ಧ್ಯಾನದಲ್ಲಿ ನಿರತರಾಗಿದ್ದರಂತೆ. ಟಿವಿ ಆನ್ ಆಗಿರಲಿಲ್ಲ; ಯಾವುದೇ ಕರೆಗಳನ್ನು ಸ್ವೀಕರಿಸುತ್ತಿರಲಿಲ್ಲ.
ಅಂದು ಮೋದಿ ದೇವರ ಪೂಜೆ, ಧ್ಯಾನದಲ್ಲಿ ತಲ್ಲೀನರಾಗಿದ್ದರು. ಮಧ್ಯಾಹ್ನ 12ಗಂಟೆ ನಂತರವಷ್ಟೇ ಅವರು ಫೋನ್ ಕರೆಗಳನ್ನು ಸ್ವೀಕರಿಸಲು ಆರಂಭಿಸಿದ್ದು. ಅವರಿಗೆ ಮೊದಲ ಕರೆ ಮಾಡಿದ್ದು ಅಂದಿನ ಅಧ್ಯಕ್ಷರಾಗಿದ್ದ ರಾಜನಾಥ್ ಸಿಂಗ್, ಚುನಾವಣೆಯಲ್ಲಿ ಬಿಜೆಪಿಗೆ ಬಹುಮತ ನಿಶ್ಚಿತ ಎಂದು ರಾಜನಾಥ್ ಸಿಂಗ್ ಹೇಳಿದಾಗಲಷ್ಟೇ ಮೋದಿಗೆ ಗೆಲುವಿನ ಅರಿವಾಗಿದ್ದು.
ಈ ವಿಷಯವನ್ನ ಲ್ಯಾನ್ಸ್ ಪ್ರೈಸ್ ಎಂಬುವವರು ತಮ್ಮ ಹೊಸ ಪುಸ್ತಕದಲ್ಲಿ ಬರೆದಿದ್ದಾರೆ. "The Modi Effect: Inside Narendra Modi's Campaign to Transform India" ಎಂಬ ಪುಸ್ತಕದಲ್ಲಿ ಮೋದಿ ಜೊತೆಗಿನ ಸಂದರ್ಶನದ ಅನೇಕ ವಿವರಗಳನ್ನ ದಾಖಲಿಸಿದ್ದಾರೆ. ಚುನಾವಣೆಯಲ್ಲಿ ಬಿಜೆಪಿಗೆ ಅಭೂತಪೂರ್ವ ಗೆಲುವು ದಕ್ಕಿಸಲು ಮೋದಿ ರೂಪಿಸಿದ ಕಾರ್ಯತಂತ್ರಗಳನ್ನ ಲ್ಯಾನ್ಸ್ ಪ್ರೈಸ್ ತಮ್ಮ ಪುಸ್ತಕದಲ್ಲಿ ಪ್ರಸ್ತಾಪಿಸಿದ್ದಾರೆ. ಲ್ಯಾನ್ಸ್ ಪ್ರೈಸ್ ಮಾಜಿ ಬ್ರಿಟನ್ ಪ್ರಧಾನಿ ಟೋನಿ ಬ್ಲೇರ್ ಅವರಿಗೆ ಮಾಧ್ಯಮ ಸಲಹೆಗಾರರಾಗಿದ್ದರು.
